Nyimbo 145 - Bhukhu la Kuyamba

Nyimbo yakudumbiza ya Dhaveti.

¹ Ninkukuzani Mulungu wangu, imwe mambo! Nin'dalisa dzina lanu kufika lini nalini.

² Ntsiku zentse nin'zakudalisani! Ndichidumbiza dzina lanu kufika lini nalini!

³ Chawuta ninkulu, pomwe anfunika kudumbiziwa kwene-kwene, ukulu wake ngwakuchita lini kupsaga.

⁴ M'badwe un'zawilikiza mabasa yanu kum'badwe unango, uchizalewa bzamabasa yanu makulu.

⁵ Ukulu wawulemelelo wandemela wanu, namabasa yanu yan'dabwisa, nin'zalingilila.

⁶ Wanthu an'zalalikila mphamvu zamabasa yanu yan'gopsa, pomwe ine nin'zalewa bzawukulu wanu.

⁷ An'zathulula mbili yakukoma kwanu kuzinji, an'zayimba achikuwa bzachilungamo chanu.

⁸ Chawuta niwakukoma ntima nawachifundo, wakuchedwa kuchita ukali, pomwe wantsisi zikulu.

⁹ Chawuta niwabwino kwawentse, pomwe chifundo chake chili pabzentse bzaadalenga.

¹⁰ Mabasa yanu yentse yan'zakutendani, imwe Chawuta, pomwe wantsisi wanu wentse an'zakudalisani!

¹¹ An'zalewa ulemelelo wawumambo wanu, achizalewa bzamphamvu zanu,

¹² kudziwisa wana wawanthu bzamphamvu zanu, nawulemelelo wawukulu wawumambo wanu.

¹³ Umambo wanu niwumambo um'mala lini kufika lini nalini, pomwe kutonga kwanu kunfika kum'badwe nam'badwe wentse.

¹⁴ Chawuta an'tsigila wentse ali kugwa, pomwe anilamusa wentse wakukotamisiwa.

¹⁵ Maso yawentse yan'dikhila kwayimwe, imwe muniwapasa chakudya munyengo chayiyo.

¹⁶ Munfungula janja lanu, imwe mun'khutisa kufuna kwachinthu chentse chamoyo.

¹⁷ Chawuta niwakulungama munjila zake zentse, pomwe niwantsisi m'mabasa yake yentse.

¹⁸ Chawuta ali pafupi nawentse an'chemela kwayiye, nawentse an'chemela kwayiye mwachadidi.

¹⁹ An'dzadzikisa bzinfuniwa naawo animugopa, pomwe anibva kulila kwawo achiwachiza.

²⁰ Chawuta an'chengeta wentse animufuna, koma wakuyipa wentse an'zaacheneka.

²¹ Mulomo wangu un'zalewa dumbizo la Chawuta, pomwe lekani nyama yentse idalise dzina lake lakuyela, kufika lini nalini!