Nyimbo 144 - Bhukhu la Kuyamba

Mambo antenda Mulungu nathangwe lakukunda

Nyimbo ya Dhaveti.

¹ Ngaadalisiwe Chawuta mwala wangu, uyo anfundisa manja yangu nkhondo, nabzala bzangu kumenya;

² ntsisi zangu, napakuchinjilizika pangu; pakubisala pangu nampulumusi wangu; nchinjilizo yangu, kwanimpotela; uyo aniyikha mishowo yawanthu pantsi pake.

³ Imwe Chawuta, ko munthu n'chinyi kuti mumudziwe, panango mwana wamunthu kuti mumukumbuke?

⁴ Munthu aninga mpuye, ntsiku zake zininga n'thunzi umpita.

⁵ Imwe Chawuta, kotamisani kudzulu kwanu, bulukani! Phatani mapili yachoke utsi!

⁶ Chelumisani mpheni abalaliseni! Thusani misewe yanu athamangiseni!

⁷ Thamulani janja lanu kuchoka padzulu! Ndichizeni, ndipulumuseni! Kuchoka m'madzi mazinji, kuchoka kujanja lawanthu wapezi;

⁸ awo ana milomo inilewa magunkha, awo janja lawo ladidi, nijanja ladidi lamagunkha.

⁹ Imwe Mulungu, nin'zayimba nyimbo inyowani kwayimwe; pabhanjo lathambo khumi nin'zayimbila imwe.

¹⁰ Imwe mumpulumusa mazimambo, mun'tsudzula Dhaveti mulanda wanu kubhemba lakuyipa.

¹¹ Ndiphateni, ndipulumuseni kujanja lawanthu wapezi; awo ana milomo inilewa bzakunama, awo janja lawo ladidi, nijanja ladidi lamagunkha.

¹² Pamwepo wana wathu kuwubwana wawo, an'zakhala ninga mbewu zakukhuma; wana wathu wachikazi an'zachita ninga ntsigilo zam'magonyo, zidatemelewa kumanga n'zinda;

¹³ magwangwa yathu yan'zadzala, nachakudya chanshowo wentse; mabila yathu yan'zabala masawuzande, masawuzande khumi-khumi mumbuto zakudyesela zathu;

¹⁴ ng'ombe zathu zin'zalemedwa nawana, pasayike impoloza panango kutaza kubala; pasayike kulila kwanyathwa mumbuto zakudyesela!

¹⁵ Niwakudala awo wanthu anfikiliwa namadaliso yakutenepo! Niwakudala wanthu, awo Chawuta ndiye Mulungu wawo!