Nyimbo 143 - Bhukhu la Kuyamba

Pemphelo lakukumbila thandizo

Nyimbo ya Dhaveti.

¹ Imwe Chawuta, ibvani pemphelo langu! Tetekelani kukumbila kwangu! Mukukhulupilika kwanu ndidayileni, muchilungamo chanu!

² Lekani kubwelesa utongi kwamulanda wanu; pakuti palibe wakulungama pamaso panu, pawentse wamoyo.

³ Pakuti n'zondi anilonda moyo wangu; waphwanyila umoyo wangu pantsi; wachita kuti ndikhale mun'dima ninga wanthu adafa kale.

⁴ Nakutenepo n'zimu wangu um'mala mphamvu mwayine, ntima wangu ukubva mantha nkati mwangu.

⁵ Ninkumbuka ntsiku zakale, ninilingilila bzentse bzamudachita, ninkumbukisisa bzidachitiwa namanja yanu.

⁶ Ninsumusila manja yangu kwayimwe; moyo wangu unibva nyota yayimwe ninga mbuto yakuwuma. Selah.

⁷ Kulumizani kundidayila, imwe Chawuta! N'zimu wangu wamalidwa! Lekani kubisa nkhope yanu kwayine, pakuti ningakhale ninga wale aniyenda kudindi.

⁸ Lekani ndibve ntsisi zanu machibese, pakuti mwayimwe nin'themba! Ndifundiseni njila yakufamba nayo, pakuti kwayimwe ninsumusa moyo wangu!

⁹ Ndipulumuseni, imwe Chawuta kwaazondi wangu! Nin'thawila kwayimwe kuzabisala!

¹⁰ Ndifundiseni kuchita kufuna kwanu, pakuti imwe, ndimwe Mulungu wangu! Lekani n'zimu wanu wabwino unditsogolele, munjila yakuthasama!

¹¹ Nathangwe ladzina lanu, imwe Chawuta, ndimusuluzeni! Muchilungamo chanu ndichoseni munthamu!

¹² Muntsisi zanu malani azondi wangu! Mucheneke wentse anin'zonda, pakuti ndine mulanda wanu.