Nyimbo 142 - Bhukhu la Kuyamba

Pemphelo lakukumbila thandizo

Masikili ya Dhaveti, paakhali mphako. Pemphelo.

¹ Fala langu kwa Chawuta, ninilila; fala langu kwa Chawuta, ninkumbila kukomelewa ntima.

² Ninthulula madandawulo yangu pamaso pake, ninilewa kushupika kwangu pamaso pake.

³ N'zimu wangu pawum'mala mphamvu, imwe mun'dziwa njila yangu! Munjila yaninfamba, adanditeya ukhukha.

⁴ Nin'nyangana kujanja ladidi ndichiwona, koma palibe anin'dziwa; palibe mbuto yakuthawila, palibe munthu aniniwonambo.

⁵ Ninilila kwayimwe, imwe Chawuta ndiniti; imwe ndimwe pakupotela pangu, chigawo changu mudziko lawanthu wamoyo.

⁶ Ibvani kulila kwangu, pakuti ndamala mphamvu kwene-kwene! Ndipulumuseni kwawanthu aninsawusa; pakuti ana mphamvu kuposa ine!

⁷ Ndibuliseni muchitokisi, kuti nditende dzina lanu! Wakulungama an'zandizungunuka; pakuti mun'zandichitila bzizinji.