Nyimbo 141 - Bhukhu la Kuyamba

Pemphelo lamawulo

Nyimbo ya Dhaveti.

¹ Nin'chemela kwayimwe Chawuta, kulumizani kubwela kwayine! Ibvani fala langu, panin'chemela kwayimwe!

² Khazikisani pemphelo langu likhale bzakununkhila pamaso panu! Kusumusa kwanin'chita manja yangu kuchite ninga ntsembe yakumawulo!

³ Ikhani nkhalilizi pamulomo wangu, imwe Chawuta, khalani mudanyangana nsuwo wamilomo yangu!

⁴ Ntima wangu ngawuleke kulemelela kubzakuyipa, kubzipasa basa nabzinthu bzakuyipa, muchipani chawanthu an'chita bzakuyipa; lekani kuti ndidye bzakudya bzankhuli!

⁵ Lekani munthu wabwino andimenye, panango anditsimule, nintsisi, lekani nsolo wangu uleke kubzilamba, nimafuta yansolo wangu; pakuti nthawe zentse pemphelo langu nilakumenyana nabzakuyipa bzawo.

⁶ Atongi wawo paan'zathusiwa kunkholomole, pamwepo an'zabva mafala yangu kuti yankondwelesa.

⁷ Ninga nyakulima antukunula pantsi, nakutenepo mabondo yathu yan'zatayiwa pamulomo wambuto yawanthu wakufa.

⁸ Koma maso yangu yali kwayimwe, imwe Chawuta Mfumu wangu; nimpotela kwayimwe, lekani kundisiya ndilibe kuchinjilizika!

⁹ Ndichinjilizeni kuwukhukha waadanditeya, nakumilapu yawanthu an'chita bzakuyipa!

¹⁰ Lekani wakuyipa wentse agwele mumawukonde yawo! Ine ndichipita bwino-bwino.