Nyimbo 140 - Bhukhu la KuyambaPemphelo lukukumbila kuchinjiliziwa Kwanyakuyimbisa. Nyimbo ya Dhaveti. 1 Ndipulumuseni, imwe Chawuta kwawanthu wakuyipa! Kwawanthu wandewo, ndichengeteni! 2 Awo ampangana bzakuyipa m'mitima yawo, ntsiku yentse an'khala achitokonya nkhondo. 3 An'noza malilimi yawo ninga nyoka, pantsi pamilomo yawo pana ululu wachipili. Selah. 4 Ndikhalilizeni, imwe Chawuta, kuchoka m'manja mwawanthu wakuyipa! Ndichengeteni kwawanthu wandewo, ampangana kupilingisha minyendo yangu! 5 Wanthu wakubzikuza anditeya mulapu, nathambo adapfuthula ukonde, munyantsi mwanjila adanditeya ukhukha. Selah. 6 Ninti kwa Chawuta, “Ndimwe Mulungu wangu; teyani makutu kufala lakukumbila kwangu, imwe Chawuta!” 7 Imwe Chawuta Mfumu wangu, mpulumusi wangu wakulimba! Mudafinika nsolo wangu pantsiku yankhondo. 8 Imwe Chawuta, lekani kupasa wakuyipa bzaanfuna! Lekani kuchita kuti bzaampangana bzisumukile! Selah. 9 Atsogoleli waawo adandizungunuka, lekani kushupa kwamilomo yawo kuwagwanile! 10 Lekani masimbe yakuphsa yaagwele! Lekani aathuse m'moto! Lekani aathuse m'madindi! Ataze kubulamo. 11 Lekani wamulomo aleke kuzika mizi mudziko; lekani chakuyipa chisodze munthu wandewo kuti chim'menye! 12 Nin'dziwa kuti Chawuta aniyimilila nkhani yawakushupika, pomwe antonga ansaya mwakulinganiza. 13 Chadidi wakulungama an'zatenda dzina lanu; wakukonkholoka an'zakhala pamaso panu. |
Bhaibheri reChikunda © Bible Society of Zimbabwe
Bible Society of Zimbabwe