Nyimbo 135 - Bhukhu la Kuyamba

Nyimbo yakudumbiza

¹ Aleluya! Dumbizani dzina la Chawuta! Dumbizani, imwe alanda wa Chawuta,

² imwe muniyima munyumba ya Chawuta, mubzintalo bzanyumba ya Mulungu wathu!

³ Aleluya! Pakuti Chawuta niwabwino; imbilani dzina lake pakuti linkondwelesa!

⁴ Pakuti Chawuta adabzisankhulila Jakobho, Izraeli achiyichita chinthu chake.

⁵ Pakuti ine nin'dziwa kuti Chawuta ninkulu, kuti Mfumu wathu ali padzulu kuposa amilungu wentse.

⁶ Chentse chaanfuna Chawuta, an'chita; kudzulu napantsi, munyanja nam'maboo mwentse.

⁷ Iye ndiye an'chitisa kuti mitambo isumuke kudamalila dziko, ndiye ankonza mpheni zamvula, am'bwelesa chonzi kuchoka kumagwangwa yake.

⁸ Iye ndiye adapha wana wakuyamba wa Ijipiti, wawanthu nawabzifuwo;

⁹ pakati pako, iwe Ijipiti, adatuma bzilatizo nabzidabwiso, kwa Farawo naalanda wake wentse;

¹⁰ ndiye adacheneka wamadziko azinji, achipha mazimambo yamphamvu,

¹¹ Sihoni mambo waa Amori, na Ogi mambo wa Bhashani nawumambo wentse wa Kenaani,

¹² adapeleka dziko lawo kuchita nthaka, nthaka ya Izraeli wanthu wake.

¹³ Dzina lanu, imwe Chawuta lim'mala lini, mbili yanu, imwe Chawuta kum'badwe nam'badwe.

¹⁴ Pakuti Chawuta an'zayimilila wanthu wake, achizachitila chifundo alanda wake.

¹⁵ Bzifanikizo bzawamadziko nisiliva nagolidhe, basa lamanja yamunthu.

¹⁶ Bzina milomo, koma bzinilewa-lewa lini, bzina maso, koma bziniwona lini,

¹⁷ bzina makutu, koma bzinibva lini, pomwe bzilibe mpuye mumilomo yabzene.

¹⁸ Awo am'bzikonza ngaakhale ninga ibzo! Wentse an'themba nayibzo!

¹⁹ Imwe nyumba ya Izraeli, dalisani Chawuta! Imwe nyumba ya Aroni, dalisani Chawuta!

²⁰ Imwe nyumba ya Levi, dalisani Chawuta! Imwe mun'gopa Chawuta, dalisani Chawuta!

²¹ Ngaadalisiwe Chawuta kuchoka mu Ziyoni, uyo an'khala mu Jerusalema. Aleluya!