Nyimbo 132 - Bhukhu la Kuyamba

Kupemphelela Tembele

Nyimbo yakukwila nayo.

¹ Imwe Chawuta kumbukani Dhaveti, nthamu zentse zidamuchitikila;

² kulumbila kwaadachita kwa Chawuta, nakulumbila kwaadachita kwa Nyamphamvu wa Jakobho,

³ “Nin'zapita lini mutenti yanyumba yangu, panango kugona pachalimba pangu.

⁴ Nin'chita lini kuti maso yangu yagone, panango kuti bzikope bzangu bziwodzile,

⁵ kufikila ndawonela Chawuta mbuto, mbuto yakukhala Nyamphamvu wa Jakobho.”

⁶ Wonani! Tidalibvela mu Efurata, tidaliwona m'munda wa Jaari.

⁷ “Tiyendeni kumbuto yake yakukhala, tiyendeni tikotamile pampondelela nzayo zake!”

⁸ Sumukani, imwe Chawuta muyende kumbuto yanu yampumulo! Imwe na Bhokisi la Chibvano champhamvu zanu.

⁹ Lekani anyantsembe wanu abvale chilungamo! Lekani wantsisi wanu akuwe kwakusekelela!

¹⁰ Nathangwe lamulanda wanu Dhaveti, lekani kulamba nkhope yawakudzodzewa wanu!

¹¹ Chawuta adalumbila kwa Dhaveti, kulumbila kwakukhulupilika, bzaan'zasaya kuleka kuchita: “Kuchokela mum'badwe wako, m'bodzi nin'zamukhazika pampando wawumambo wako.

¹² Wana wako akateyeza chibvano changu, nawumboni wangu wanin'zaafundisa, wana wawombo pomwe kufika lini nalini, an'zakhalambo pampando wako wawumambo.”

¹³ Pakuti Chawuta wasankhula Ziyoni; wayifuna kuti ikhale mbuto yake yakukhala:

¹⁴ “Iyi nimbuto yangu yakupumulila kufika lini nalini, pano nin'zakhala, pakuti ndapafuna.

¹⁵ Nin'zadalisa Ziyoni nabzinthu bzizinji, nin'zakhutisa amphayi wayene nachakudya.

¹⁶ Anyantsembe wake nin'zaabvadzika chipulumuso, wantsisi wake achizakuwa kwakusekelela.

¹⁷ Pamwepo nin'zamelesela Dhaveti nyanga; ndakonzela mwenje wakudzodzewa wangu.

¹⁸ Azondi wake nin'zaabvadzika manyazi, koma payiye ngundu yake in'zachita mbili.”