Nyimbo 118 - Bhukhu la Kuyamba

Nyimbo yakutenda

¹ Tendani Chawuta, pakuti niwabwino! Pakuti ntsisi zake zim'mala lini!

² Lekani Izraeli iti, pakuti ntsisi zake zim'mala lini.

³ Lekani nyumba ya Aroni iti, pakuti ntsisi zake zim'mala lini.

⁴ Lekani awo an'gopa Chawuta ati, pakuti ntsisi zake zim'mala lini.

⁵ Ndili munthamu zangu, ndidachemela Chawuta, Chawuta adandidayila achindiyikha mumbuto yakupfuthuka.

⁶ Chawuta ali kumbali kwangu, nin'gopa lini, ko munthu angandichitenyi?

⁷ Chawuta ali kumbali kwangu, nin'thandizi wangu, nin'zanyangana kukundiwa kwaawo anin'zonda.

⁸ Bzili bwino kuthawila kwa Chawuta, pana kuthemba namunthu.

⁹ Bzili bwino kuthawila kwa chawuta, pana kuthemba namanduna.

¹⁰ Mishowo yentse yawanthu idandizungunuka; mudzina la Chawuta ndidaacheneka!

¹¹ Adandizungunuka, adandizungunuka mbali zentse; mudzina la Chawuta ndidaacheneka!

¹² Adandizungunuka ninga nyuchi, adathima ninga moto waminga; mudzina la Chawuta ndidaacheneka!

¹³ Mudandigwinya mwamphamvu, bzakutofuna kugwa, koma Chawuta adandithandiza.

¹⁴ Mphamvu zangu nanyimbo yangu ni Chawuta, iye wakhala chipulumuso changu.

¹⁵ Fala lakukuwa kwakukondwa, lachipululuso, lili m'matenti yawakulungama: Janja ladidi la Chawuta linkunda,

¹⁶ janja ladidi la Chawuta linkuziwa, janja ladidi la Chawuta linkunda!

¹⁷ Ninfa lini, koma nin'khala wamoyo, ndichilongosola mabasa ya Chawuta.

¹⁸ Chawuta adandilanga kwene-kwene, koma alibe kundipeleka kuyimpfa.

¹⁹ Ndifungulileni misuwo yachilungamo! Kuti ndipite napamwepo, ndichikatenda Chawuta.

²⁰ Uwu ninsuwo wa Chawuta; wakulungama ampita napamwepo.

²¹ Ninkutendani pakuti mwandidayila, mwawa chipulumuso changu.

²² Mwala uwo udalambiwa naanyakumanga, ndiwo wakhala mwala una basa likulu, wapagonyo.

²³ Uku nkuchita kwa Chawuta; chin'dabwisa m'maso mwathu!

²⁴ Iyi nintsiku yaadakonza Chawuta; tin'zakondwa tichisekelela mwayiyo.

²⁵ Tichizeni, taphata minyendo yanu, imwe Chawuta! Imwe Chawuta, taphata minyendo yanu, tipaseni kusumukila!

²⁶ Ngaadalisiwe uyo am'bwela mudzina la Chawuta! Tinkudalisani kuchokela munyumba ya Chawuta.

²⁷ Chawuta ni Mulungu, ndiye adatipasa mwenje. Mangililani ntsembe yakusekelela nathambo, kuminyanga yapaatali yantsembe!

²⁸ Imwe ndimwe Mulungu wangu, nin'zakutendani; ndimwe Mulungu wangu nin'zakukuzani.

²⁹ Tendani Chawuta pakuti niwabwino! Pakuti ntsisi zake zim'mala lini!