Nyimbo 109 - Bhukhu la Kuyamba

Kwanyakuyimbisa. Nyimbo ya Dhaveti.

¹ Lekani kukhala chete, imwe Mulungu wakudumbiziwa kwangu!

² Pakuti wakuyipa nawamagunkha agwanula milomo yawo kwayine, achindilewa namalilimi yakunama.

³ Andizungunuka namafala yachizondo, achimenyana nayine palibe mulandu.

⁴ Kubwezela chikondi changu, anininamizila, koma ine nimpemphela.

⁵ Nakutenepo anim'bwezela chakuyipa pachabwino, chizondo pachifundo changu.

⁶ Sankhulani munthu wakuyipa atsutsane naye! Lekani munthu wakunama ayime kujanja lake ladidi!

⁷ Akatongewa ngaaphatiwe namulandu, lekani pemphelo lake likhale ninga kutaza!

⁸ Ntsiku zake ngazichepe, munango ngaatole mbuto yake!

⁹ Wana wake ngaakhale alibe apayi! Nkazi wake ngaakhale n'dziche!

¹⁰ Wana wake ngaazungayile kwene-kwene, achimbakumbila! Achichoka m'mathele mwaan'khala, achimbakapsaga chakudya!

¹¹ Lekani adamukweletesa amuphatile bzentse bzaanabzo! Wanthu wapezi ngaamutolele bzentse bzaadaseyenza!

¹² Ngapaleke kuwoneka munthu animubvela ntsisi, panango kukomela ntima nkhungwa zake zilibe apayi.

¹³ M'badwe wake ngaawuchenekewe! Dzina lake lileke kubveka kum'badwe um'bwela!

¹⁴ Bzakuyipa bzaazipayi wake ngabzikumbukiliwe na Chawuta! Kutaza kwaamayi wake ngakuleke kuthimiwa!

¹⁵ Ngabzikhale pamaso pa Chawuta nthawe zantse, kuti nkhumbusila yawo igwatiwe padziko lapantsi!

¹⁶ Pakuti alibe kukumbukila kuchita ntsisi, koma adateyela amphayi, nawakusaya nawakutaya ntima kufikila kuyimpfa.

¹⁷ Adafuna kutembelela; matembelelo ngayabwele payiye! Akhafuna lini daliso; ngalikhale kutali nayiye!

¹⁸ Adabzibvadzika tembelelo ninga chakubvala chake, ngalipite n'thupi mwake ninga madzi, ninga mafuta m'mabondo yake!

¹⁹ Ngalikhale ninga chakubvala chaam'bzifinika nacho, ninga n'cheka waambzimanga nawo ntsiku zentse!

²⁰ Uwu ngawuwe mpagalo waanyakundipasa milandu, kuchoka kwa Chawuta, waawo anilewa bzakuyipa pawumoyo wangu!

²¹ Koma imwe, Chawuta Mfumu wangu; ndichitileni nathangwe ladzina lanu; pakuti ntsisi zanu n'zabwino, ndipulumuseni!

²² Pakuti ndine mphayi, ninsaya; ntima wangu wapwetekeka nkati mwangu.

²³ Ndanyangalika ninga chibvuli-bvuli mawulo, ndasasamuliwa ninga bombo.

²⁴ Mabondo yangu yatetemela nathangwe lakubzinyima chakudya; thupi langu lawonda nakusaya mafuta.

²⁵ Ndakhala chinthu chakunyozeka kwayiwo, akandiwona ankwetekwedza misolo.

²⁶ Ndithandizeni, imwe Chawuta Mulungu wangu! Ndichizeni kuteyeza ntsisi zanu!

²⁷ Lekani adziwe kuti ili nijanja lanu! Imwe Chawuta, ndimwe mwachichita!

²⁸ Antembelela, koma imwe mun'zadalisa! Aninimukila, koma an'zanyazisiwa, mulanda wanu an'zakondwa!

²⁹ Lekani animpasa milandu abvadzikiwe mpelu! Ngaafinikiwe namanyazi yawo kuchita ninga chakubvala!

³⁰ Namulomo wangu nin'zatenda Chawuta kwene-kwene; nin'zamudumbiza pakati pagunyenye.

³¹ Pakuti aniyima kunjanja ladidi lawuyo ansaya, achimuchiza kwaawo antonga moyo wake.