Nyimbo 108 - Bhukhu la Kuyamba

Chmbo. Nyimbo ya Dhaveti.

¹ Ntima wangu wakhazizika, imwe Mulungu! Nin'zayimba ndichidumbiza namoyo wangu wentse!

² Lamuka, iwe banjo nachipendani! Nin'zalamusa madandakucha!

³ Nin'zatenda imwe Chawuta, pakati pawanthu. Nin'zayimba ndichidumbiza imwe, pakati pamadziko.

⁴ Pakuti ntsisi zanu n'zikulu padzulu pakudzulu, kukhulupilika kwanu kunfika kumitambo.

⁵ Kuziwani imwe Mulungu padzulu pakudzulu! Lekani mbili yanu ikhale padziko lentse!

⁶ Kuti wamunfunisisa apulumusiwe, thandizani najanja lanu ladidi, mundidayile!

⁷ Mulungu adalewa-lewa ali mumbuto yake yakuyela: “Nin'zakunda, nin'zagawa Shekemu, nin'zagawanisa gowa la Sukoti.

⁸ Giliyadhi niyangu, Manase niyangu, Efulemu nichapewu changu, Judha nimpsimbo yangu yawumambo.

⁹ Moabhi nichombo changu chakusambila, pa Edhomu nin'thusa shango zangu, pa Filisitiya ninkuwa kwakukunda.”

¹⁰ Ko mbani an'zandifikisa kuguta lakuchinjilizika? Mbani an'zanditsogolela ku Edhomu?

¹¹ Ko mulibe kutitaya, imwe Mulungu? Ko muniyendambo lini nawankhondo wathu, imwe Mulungu?

¹² Tithandizeni kwaazondi wathu! Pakuti thandizo lamunthu nilapezi.

¹³ Mwa Mulungu tin'chita mphamvu, ndiye ampoda-ponda azondi wathu.