Nyimbo 107 - Bhukhu la Kuyamba

Mulungu ngaadumbiziwe pakuti niwabwino

¹ Tendani Chawuta, pakuti niwabwino; pakuti ntsisi zake zim'mala lini!

² Lekani wakulombolewa na Chawuta alewe tenepo, waadalombola kujanja lan'zondi;

³ waadakocheza kuchoka kumadziko, kuchoka kumabveladzuwa nakumadokelo, kuchoka kudzulu nakunyantsi.

⁴ Wentse adazungayila muchipululu, munjila yakumbuto yakuwuma; achisaya guta lakukhala;

⁵ adabva njala nanyota, moyo wawo udakomoka nkati mwawo.

⁶ Pamwepo adalila kwa Chawuta mukushupika kwawo, iye adaapulumusa munthamu zawo.

⁷ Adaatsogolela nanjila yakukonkholoka, mpaka adafika kuguta laadakakhala.

⁸ Lekani atende Chawuta nathangwe lantsisi zake! Nabzidabwiso bzake kwawana wawanthu!

⁹ Pakuti an'khondwesa ana nyota, wanjala aniwakhutisa nabzinthu bzabwino.

¹⁰ Adakhala mun'dima namun'thunzi wayimpfa, wakupambiwa munyathwa namusimbi;

¹¹ pakuti adapandukila mafala ya Mulungu, adanyoza lango la Nyakudzulu-dzulu.

¹² Mitima yawo idapsipa nabasa lakuwuma, adagwa pantsi, palibe adaathandiza.

¹³ Pamwepo adalila kwa Chawuta mukushupika kwawo, iye adaapulumusa munthamu zawo;

¹⁴ adaachosa mun'dima namun'thunzi wayimpfa, achigwata macheni yawo.

¹⁵ Lekani atende Chawuta nathangwe lantsisi zake! Nabzidabwiso bzake kwawana wawanthu!

¹⁶ Pakuti am'phwanya bzitseko bzankuwa, an'gwata pakati napakati migwele yasimbi.

¹⁷ Adakhala malombe nathangwe lakutaza kwawo, nathangwe labzakuyipa bzawo, adawona nyathwa.

¹⁸ Adanyantsiwa nachakudya chentse, adafendela pafupi namisuwo yayimpfa.

¹⁹ Pamwepo adalila kwa Chawuta mukushupika kwawo, iye adaapulumusa munthamu zawo.

²⁰ Adatuma fala lake achiwapolesa, achiwapulumusa kuchoka kumadindi yawo.

²¹ Lekani atende Chawuta nathangwe lantsisi zake! Nabzidabwiso bzake kwawana wawanthu.

²² Lekani apeleke ntsembe yakutenda, alalikile mabasa yake munyimbo zakusekelela.

²³ Adayenda kunyanja m'mabote makulu, kachita malonda m'madzi mazinji;

²⁴ adawona mabasa ya Chawuta, nabzidabwiso bzake m'boo;

²⁵ iye adalewa, achilamusa mphepo yankhongolo, iyo idazasumusa mabimbi.

²⁶ Yadakwila n'dzulu, yachiyenda m'maboo; moyo yawo idasungunuka munyathwa;

²⁷ antepuka, an'dzedzeleka ninga munthu waledzela, nzelu zake zentse zamala.

²⁸ Pamwepo adalila kwa Chawuta mukushupika kwawo, iye adaapulumusa munthamu zawo;

²⁹ adanyamaliza nkhongolo, mabimbi yanyanja yadatompha.

³⁰ Pamwepo adakondwa pakuti kudanyamala, adaayendesa kugombe kwaakhafuna.

³¹ Lekani atende Chawuta nathangwe lantsisi zake! Nabzidabwiso bzake kwawana wawanthu!

³² Lekani amukuze pagunyenye lawanthu! Amudumbize pansonkhano waakulu-akulu.

³³ Ansandula tukamadzi kukhala chipululu, ntsantsa zamadzi kukhala mbuto zakuwuma;

³⁴ dziko lamichelo kukhala mbuto yamunyu, nathangwe labzakuyipa bzawanthu an'khala m'mwemo.

³⁵ Adasandula chipululu kukhala mathawale yamadzi, dziko lakuwuma kukhala ntsantsa zamadzi.

³⁶ Kumweko an'khazika wanthu wanjala, iwo achikhazikisa guta lakukhala;

³⁷ am'bzala minda, achibzala mivayini, achikolola bzizinji.

³⁸ Aniwadalisa, iwo achiwanda kwene-kwene, a'chepesa lini bzifuwo bzawo.

³⁹ An'chepesewa, achidelezewa pantsi, nathangwe lakupondelelewa, kushupika nakusuwa,

⁴⁰ an'thululila manyozo pamanduna, achiwachita kuti azungayile mumbuto zapezi-pezi, zilibe njila;

⁴¹ koma iye ansumusa wakusaya kuchoka munyathwa, achichita mabanja yawo ninga bzifuwo.

⁴² Wakukonkholoka am'bziwona achikondwa, wakuyipa wentse an'gwanila milomo yawo.

⁴³ Uyo ana nzelu ngaatetekele bzinthu ibzi; lekani wanthu adziwisise ntsisi za Chawuta.