Nyimbo 105 - Bhukhu la Kuyamba

Mulungu nawanthu wake

¹ Tendani Chawuta! Chemelani dzina lake! Dziwisani mabasa yake kwawanthu wentse!

² Imbani kwayiye, imbani nyimbo zakudumbiza kwayiye! Lalikilani bzidabwiso bzake!

³ Dumbani mudzina lake lakuyela! Lekani mitima yaawo ampsaga Chawuta isekelele!

⁴ Psagani Chawuta namphamvu zake! Psagani nkhope yake nthawe zentse!

⁵ Kumbukilani bzidabwiso bzake bzaadachita! Bzidabwiso bzake nakutonga kwamulomo wake.

⁶ Imwe m'badwe wa Abhurahamu, mulanda wake, wana wa Jakobho waadasankhula!

⁷ Iye ndiye Chawuta Mulungu wathu, mitemo yake ili mudziko lentse.

⁸ Ankumbukila chibvano chake kufika lini nalini, fala laadalewa kumibadwe sawuzande,

⁹ chibvano chaadachita na Abhurahamu, chipangano chaadalumbila kwa Isaki.

¹⁰ Adachitsimikiza kwa Jakobho kukhala ntemo, kwa Izraeli, chibvano chinfika lini nalini,

¹¹ adati, “Kwayiwe nin'zapeleka dziko la Kenani, kukhala chigawo chanthaka yanu.”

¹² Paakhali ang'ono-ng'ono, wakuchepa kuwelengeka, alendo;

¹³ achifamba-famba dziko nadziko, achichoka muwumambo unango achiyenda muwunango,

¹⁴ alibe kubvumiza wanthu kuti aapondelele, adatsimula mazimambo nathangwe lawo,

¹⁵ adati, “Lekani kuphata-phata wakudzodzewa wangu! Lekani kupweteka maprofita yangu!”

¹⁶ Paadachemela chilala mudziko, adacheneka chakudya chentse;

¹⁷ adatsogoza munthu patsogolo pawo, Jozefi, uyo adagulisiwa kukhala mulanda.

¹⁸ Minyendo yake idapwetekeka nasimbi, khosi lake likhadayikhiwa chigoli chasimbi,

¹⁹ mpaka fala lake lachitika, fala la Chawuta lidamuyesa.

²⁰ Mambo adatuma wanthu kamutsudzula, ntongi wawanthu adamutsudzula;

²¹ adamuchita mbuya wanyumba yake, ntongi wabzinthu bzake bzentse;

²² achifundisa manduna yake bzaakhafuna, akulu-akulu wake, nzelu.

²³ Pamwepo Izraeli adabwela ku Ijipiti, Jakobho adakhala mudziko la Hamu ninga mulendo.

²⁴ Chawuta adawandisa wanthu wake kwene-kwene, achiwalimbisa kuposa azondi wawo.

²⁵ Adasandula mitima yawo kuti azonde wanthu wake, kuti aphate uyanga alanda wake.

²⁶ Adatuma Mozisi mulanda wake, na Aroni uyo waadasankhula.

²⁷ Iwo adachita bzilatizo bzake pakati pawo, nabzidabwiso mudziko la Hamu.

²⁸ Adatuma n'dima, kunja kudapsipa; alibe kupandukila mafala yake.

²⁹ Adasandula madzi yawo kukhala gazi, adachitisa kuti ntsomba zawo zife.

³⁰ Dziko lawo lidafakanya achule, ne muzinyumba zamazimambo yawo.

³¹ Adalewa-lewa, nchenche zizinji zidabwela, ntsawawa, mudziko lawo lentse.

³² Adasandula mvula kukhala matalala, nampheni zikhang'ayima mudziko lawo lentse.

³³ Adacheneka mivayini namikuyu yawo, achityola miti yamudziko lawo.

³⁴ Adalewa-lewa, dzomba nkubwela, mabombo yakusaya kuwelengeka;

³⁵ yadadya bzakumela bzentse mudziko lawo, yadadya michelo yam'minda mwawo.

³⁶ Adapha wana wakuyamba wentse wamudziko lawo, bzentse bzakuyamba bzamphamvu zawo.

³⁷ Adatsogolela Izraeli ili na Siliva nagolidhe, pakhalibe ne m'bodzi pakati pamishowo yake adakhukhumudwa.

³⁸ Ijipiti idakondwa wanthu paadachoka, pakuti akhaagopa kwene-kwene.

³⁹ Adapfuthula ntambo kuwagwanila, moto kuwawinikila usiku.

⁴⁰ Adakumbila, iye nkuwabwelesela nchelela, adaakhutisa nazingwa yakudzulu.

⁴¹ Adafungula mwala, madzi nkuthubuka, yadayelela mumbuto zakuwuma ninga kamadzi.

⁴² Pakuti adakumbukila fala lake lakuyela, namulanda wake Abhurahamu.

⁴³ Adachosa wanthu wake nakusekelela, wakusankhuliwa wake nachiwowo chakukondwa.

⁴⁴ Adaapasa mbuto zawamadziko, iwo adatola nthaka yamichelo yamabasa yawanthu,

⁴⁵ kuti azachengete malango yake, ateyeze mafundiso yake. Dumbizani Chawuta!