Nyimbo 104 - Bhukhu la Kuyamba

Kudumbiza Nyakulenga

¹ Dalisa Chawuta, iwe moyo wangu! Imwe Chawuta Mulungu wangu ndimwe nkulu kwene-kwene! Imwe mudabvala ndemela nawukulu,

² mudabzibvadzika mwenje ninga chakubvala. Mudapfuthula kudzulu ninga tenti,

³ adayimisa ntsigilo zanyumba yake m'madzi, an'chita mitambo ngolo yake, ankwila pamaphaphilo yamphepo,

⁴ an'chita mphepo kukhala atumiki wake, moto namalilimi alanda wake.

⁵ Mudakhazika dziko lapantsi patsinde palene, lintekenyeka lini.

⁶ Mudaligwanila naboo kuchita ninga chakubvala, madzi yadayima padzulu pamapili.

⁷ Pamudatsimula madzi yadathawa, payadabva kulilima kwanu yadamwazika.

⁸ Mapili yadafumphuka, magowa yadayenda pantsi, kumbuto yamudayakhazikisila.

⁹ Imwe mudayikha malile yakuti yaleke kupitilila, yaleke kuzanyuza pomwe dziko lapantsi.

¹⁰ Mudatuma ntsantsa kathubukila m'mikulo, madzi yadayelela pakati pamapili,

¹¹ tudapasa madzi bzilombo bzentse bzan'thengo, mbidzi zichikhondwa pamwepo.

¹² Mbalami zan'dzulu zim'manga bzisakila m'mwemo, zichiyimba zili m'mithayi.

¹³ Muli kunyumba zanu kudzulu, mun'thiliza mapili dziko lin'khuta namichelo yamabasa yanu.

¹⁴ Mum'melesa upsa kuti ng'ombe zidye, nambewu zakuti munthu alime. Kuti dziko libale chakudya,

¹⁵ navinyu yakukondwesa ntima wamunthu, namafuta yakuyetimisa nkhope yake, nachakudya chakulimbisa ntima wamunthu.

¹⁶ Miti ya Chawuta in'khuta madzi, misidhari yaku Lebhanoni yaadabzala.

¹⁷ M'mwemo mbalami zim'manga bzisakila, bzikonongo, miyi yabzene m'miti yamisayipulasi.

¹⁸ Mapili matali, njangululu, m'minyala, nimwambila.

¹⁹ Mudalenga mwezi kuwonesa nthawe, dzuwa lin'dziwa nthawe yakunyula.

²⁰ Mudalenga n'dima uchiwa usiku, bzilombo bzan'thengo bzentse pabzinfamba.

²¹ Wana wamphondolo an'khumbzila chakudya, achipsaga chakudya chawo kwa Mulungu.

²² Dzuwa palim'bula, zim'bwelela, zin'gona mumbuto mwazene.

²³ Munthu aniyendambo, kaphata basa lake, basa lake mpaka kumawulo.

²⁴ Imwe Chawuta, nkuwanda lini kwamabasa yanu kumweko! Bzentse bzimwebzi mudabzikonza nanzelu, dziko lidadzala nabzakulengewa bzanu.

²⁵ Kuno kuna nyanja ikulu yakufunguka, m'mwemo muna bzakulengewa bzinsaya kuwelengeka, bzikulu nabzing'ono.

²⁶ M'mwemo munfamba mabote makulu, na Leviyatani wamudalenga kuti ambasenzekelamo.

²⁷ Bzentse bzimwebzi bzin'nyanganila kwayimwe, kuti mubzipase chakudya nanthawe.

²⁸ Mum'bzipasa, ibzo bzin'gwezeka; mumpfuthula janja lanu, ibzo bzin'khuta nabzinthu bzabwino.

²⁹ Mum'bisa nkhope yanu, ibzo bzin'bva mantha; mun'chosa mpuye wanu, ibzo bzinifa; bzichibwelela kudongo labzene.

³⁰ Muntuma n'zimu wanu, ibzo bzinilengewa, munkonza pomwe nkhope yapantsi.

³¹ Mbili ya Chawuta ngayikhale kufika lini nalini! Chawuta ngaasekelele namabasa yake!

³² An'nyangana padziko, lintekenyeka; am'phata mapili, yam'bula utsi.

³³ Nin'zayimbila Chawuta, malinge ndina moyo, nin'zayimbila Mulungu wangu nyimbo zakudumbiza panthawe yakulalama kwangu.

³⁴ Kulingilila kwangu ngakumukomela, pakuti ninsekelela mwa Chawuta.

³⁵ Lekani wanthu wakutaza amaliziwe padziko, lekani wakuyipa amaliletu! Dalisa Chawuta iwe moyo wangu! Dumbizani Chawuta!