Nyimbo 102 - Bhukhu la Kuyamba

Pemphelo lamunthu ali panthamu, paakhalibe mphamvu achithululila madandawulo yake pamaso pa Chawuta.

¹ Imwe Chawuta, ibvani pemphelo langu! Lekani kulila kwangu kufike kwayimwe!

² Lekani kubisa nkhope yanu kwayine, ntsiku yakushupika kwangu! Teyani khutu lanu kwayine! Ndidayileni mwakukulumiza pantsiku yanin'chemela,

³ pakuti ntsiku zangu zinkoboka muwutsi, mabondo yangu yaniphsa ninga mbawula,

⁴ ntima wangu wawuma nakufota ninga upsa, pakuti niniyebwa kudya chakudya changu.

⁵ Nathangwe lakubuwula kwangu, mabondo yangu yamamatila kunyama yangu.

⁶ Ndakhala ninga dzidzi wamuchipululu, ninga dzidzi wam'mathele.

⁷ Nimphuphudza ndidapenya, ninga mbalami ili yokha padzulu panyumba.

⁸ Ntsiku yentse azondi wangu anin'nyoza, awo aninseka anilumbila nadzina langu.

⁹ Pakuti ninidya dotha ninga chakudya, ninsanganisa misozi nachakumwa changu,

¹⁰ nathangwe lawukali nankwiyo wanu, pakuti mudandidzuntsa muchindithusa kutali.

¹¹ Ntsiku zangu zininga n'thunzi untalimpha, ninfota ninga upsa.

¹² Koma imwe Chawuta muntonga kufika lini nalini, nkhumbusila yanu infika kumibadwe wentse.

¹³ Imwe mun'zasumuka kuzabvela chifundo Ziyoni, pakuti ndiyo nthawe yakumukomela ntima, nthawe idataliwa yafika.

¹⁴ Pakuti alanda wanu anfuna minyala yayene, achibvelambo chifundo dongo layene.

¹⁵ Madziko yan'zagopa dzina la Chawuta. Mazimambo yentse yadziko, mbili yanu.

¹⁶ Pakuti Chawuta an'zamanga pomwe Ziyoni, an'zawoneka mumbili yake.

¹⁷ An'zatetekela pemphelo lawakushupika, an'zanyozela lini kukumbila kwawo.

¹⁸ Lekani ibzi bzinembelewe m'badwe um'bwela, kuchitila kuti wanthu anati alengewa azadumbize Chawuta.

¹⁹ Pakuti adanyangana pantsi ali kudzulu kumbuto yake yakuyela. Ali kudzulu Chawuta adanyangana dziko,

²⁰ kuti abve kubuwula kwawakupambiwa, kuti atsudzule awo adatongelewa impfa;

²¹ kuti wanthu alalikile dzina la Chawuta mu Ziyoni, dumbizo lake mu Jerusalemu,

²² wanthu nawumambo paankochezana, kuzatumikila Chawuta.

²³ Adandityola m'mabondo pandikhali mung'ono, adachepesa ntsiku zangu.

²⁴ Ninti, “Imwe Mulungu wangu, lekani kunditola, pakati pantsiku zangu, imwe wamagole yan'khala kwamibadwe yentse.”

²⁵ Kale-kale, mudayikha tsinde ladziko, pomwe kudzulu nibasa lamanja yanu.

²⁶ Bzin'zamala, koma imwe mun'khala, bzentse bzin'zasakala ninga chakubvala. Mun'zaataya ninga chakubvala, achimalilatu.

²⁷ Koma imwe mun'khala, magole yanu yam'mala lini.

²⁸ Wana waalanda wanu an'zakhala mwakuchinjilizika, mibadwe yawo in'zakhazikisiwa pamaso panu.