Nyimbo 10 - Bhukhu la Kuyamba

Pemphelo lakukumbila kulinganiza

¹ Chawuta, thangwe lanyi kuyima kutali? Ko mum'bzibisilanyi panthawe yatininga tina nthamu?

² Munthu wakuyipa anteyela amphayi achisamwa, chitani kuti wanthu amwewo aphatiwe nabzaankumbuka kuchita.

³ Munthu wakuyipa am'bzidalisa nabzinfuniwa nantima wake, wanthu wakulungwa antukwana Chawuta achimulamba.

⁴ Munthu wakuyipa nakubzifuna kwake, ampsaga lini Mulungu nee pang'ono pokha, nzelu zake zentse n'zakuti, kulibe Mulungu.

⁵ Njila zake zaanin'chita zinsumukila nthawe zentse, ntongelo wanu uli kutali kwene-kwene nayiye, azondi wake wentse aniwawona lini ninga chinthu.

⁶ Muntima mwake aninga achibziti, nin'tsukunyuka lini, kum'badwe nam'badwe niniwona lini chakuyipa.

⁷ Nkamwa mwake mudadzala nakutembelela, nakunama nakupondelela, kuntsi kwalilimi lake kuna umaluku nakuyipa basi.

⁸ Am'bisalila wanthu m'miyi, bzakabisila achimbapha wanthu alibe namilandu nayiye. Maso yake yachinyangana-nyangana wakushupika,

⁹ an'chita bzakubisalila ali mumbuto zawo bzin'chita mphondolo pachidzambwa. Kuti aphate wanthu amphayi, nawukonde wake aniwaphata achiwakwekweta.

¹⁰ Amwewo an'chita tsoka, am'phwanyiwa, ankotama, anigwa pantsi namphamvu zawakuyipa.

¹¹ Muntina mwake ankumbuka kuti, Mulungu wayebwa, wabisa nkhope yake, am'bziwona lini.

¹² Sumukani Chawuta! Mulungu, dzuntsani janja lanu! Lekani kuyebwa wanthu wakushupika!

¹³ Thangwe lanyi wakuyipa akulamba Mulungu, achilewa mumitima mwawo kuti, imwe munkumbuka lini?

¹⁴ Imwepo muniwona, muniwona nthamu nakushupika kwamunthu muntakula m'manja mwanu, munthu watsoka am'bzipeleka kwayimwe, ndimwe n'thandizi wankhungwa.

¹⁵ Tyolani janja lawakuyipa nawakuchita bzakuyipa! Psagani bzakuyipa bzawo, kufikila mwawona palibe!

¹⁶ Chawuta nimambo kufika lini nalini, mishowo in'nyangalika padziko lake.

¹⁷ Chawuta mwabva bzinfuna amphayi, mun'zalimbisa mitima yawo, mun'zatetekela,

¹⁸ kuti mulinganize nkhungwa nawakupondelelewa, kuchitila kuti munthu wapadziko alekeletu kugopsa anango.