Kuyamba 9 - Bhukhu la Kuyamba

Chibvano cha Mulungu na Nowa

¹ Mulungu adadalisa Nowa nawana wake, adati kwayiwo, “Balanani muwande, mudzadze dziko.

² Bzinyama bzentse bzapadziko nambalami zentse zan'dzulu nabzentse bzinkwawa namimba nantsomba zentse zamunyanja zin'zakugopani bzichizabva mantha nayimwe. Bzentse ndabziyikha m'manja mwanu.

³ Bzamoyo bzentse bzinfamba bzin'zakhala chakudya chanu, ninga kukupasani kwandidachita mbewu zentse ziwisi.

⁴ Koma lekani kudya nyama ina gazi, pakuti umoyo wanyama uli mugazi.

⁵ Pagazi lawumoyo wanu nin'zafuna longosolo, kubzinyama bzentse nakumunthu wentse nin'zafuna longosolo nakum'bale wamunthu wentse nin'zafuna longosolo lawumoyo wamunthu.

⁶ Wentse antaya gazi lamunthu, gazi lake linfunika kutayiwambo namunthu, pakuti Mulungu adalenga munthu kulingana nayiye pachake.

⁷ “Tsapano imwe balanani muwande mudzadze dziko.”

⁸ Mulungu adati kwa Nowa nakwawana wake wachimuna,

⁹ wonani, ndikuchita chibvano nayiwe, nakum'badwe wako un'zabwela,

¹⁰ nabzinyama bzentse bzawunabzo bziniti, mbalami nabzifuwo nabzinyama bzentse bzapadziko bzawunabzo, nabzentse bzawabula nabzo m'bote.

¹¹ Ndikuchita chibvano nayimwe chakuti, nin'zapha lini pomwe bzamoyo nachigumula. Kun'zachita lini pomwe madzi yachigumula yakucheneka wanthu padziko.

¹² Mulungu adati, “Ichi ndicho chilatizo chachibvano chandidachita nayimwe nabzamoyo bzawunabzo nakum'badwe wentse un'zabwela.

¹³ Ndayikha utati wangu m'mitambo kuti uwe chilatizo chachibvano changu nayiwe nadziko lentse.

¹⁴ Ndikabwelesa mitambo, utati ukawoneka m'mitambo,

¹⁵ pamwepo nin'zakumbuka chibvano changu chandachita nayiwe nabzamoyo bzentse, kun'zabvumba lini pomwe mvula yachigumula yakuzacheneka bzamoyo.

¹⁶ Utati ukawoneka m'mitambo, nin'zawunyangana ndichizakumbuka chibvano chin'khala kufika lini nalini chandachita nayiwe nabzamoyo bzentse bzapadziko.”

¹⁷ Mulungu adati kwa Nowa, “Ichi ndicho chilatizo chachibvano chandachita pakati payine nabzamoyo bzentse bzapadziko.”

Nowa nawana wake

¹⁸ Wana wa Nowa adabula mubote ni Shemu na Hamu na Jafeti. Hamu ndiye payi wa Kenani.

¹⁹ Awa ndiwo akhali wana wa Nowa atatu wachimuna, kwaamwewa ndiko kudachoka wanthu wentse ali padziko.

²⁰ Nowa akhali mulimi, ndiye munthu adayamba kubzala munda wamavayini.

²¹ Ntsiku inango iye adamwa vinyu nkuledzela, adagona mutenti yake alibe kubvala.

²² Hamu apayi wa Kenani, adawonela apayi wake, adabula panja nkukawuza akulu wake awili.

²³ Shemu na Jafeti adatakula nguwo, nkuyisumusa kufika m'mapewa yawo, achifamba chifutambuyo kafinika apayi wawo, adanyangana kumbali kuti aleke kuwawona ali pezi.

²⁴ Nowa paadalamuka pakuledzela kwake, adadziwa bzikhadachita mwana wake wachimuna mung'ono.

²⁵ Iye adati, “Kenani ngaatembelelewe, ngaawe mulanda kwaabale wake.”

²⁶ Adazati pomwe, “Ngaadalisiwe Chawuta Mulungu wa Shemu, Kenani ngaawe mulanda wa Shemu.

²⁷ Mulungu ngaakwizilize Jafeti, akhale m'matenti ya Shemu, Kenani awe mulanda wake.”

²⁸ Pambuyo pamadzi yachigumula, Nowa adazakhala kwamagole mazana matatu namakumi mashanu (350).

²⁹ Nowa adakhala padziko kwamagole mazana pfemba namakumi mashanu (950), pamwepo iye adazafa.