Kuyamba 8 - Bhukhu la Kuyamba

Kumala kwachigumula

¹ Koma Mulungu adakumbuka Nowa nabzinyama bzentse nabzifuwo bzaakhanabzo m'bote. Mulungu adachita kuti padziko pachite chonzi, pamwepo madzi nkuyamba kuphwilila.

² Ntsantsa zamaboo namazhanela yakudzulu bzidafunga, mvula yakudzulu idaleka kubvumba.

³ Nakutenepo madzi yadaphwilila padziko. Kudapita ntsiku dzana namakumi mashanu (150) madzi yachindophwilila.

⁴ M'mwezi wachinomwe, ntsiku yakhumi nanomwe yamwezi umwewo, bote lidatsama paphili la Ararati.

⁵ Madzi yadapitiliza kuphwilila kufikila mumwezi wakhumi. Pantsiku yakuyamba yamwezi wakhumi, ntsonga zamapili zidawoneka.

⁶ Pakudapita ntsiku makumi manayi, Nowa adafungula zhanela labote laadakonza,

⁷ nkutuma khunkubwe. Ilo likhandozungunika kufikila madzi yawuma pantsi.

⁸ Pamwepo Nowa adazatuma pomwe njiwa kuti ikawone kuti panango madzi yaphwilila padziko,

⁹ koma njiwa idasaya pakukhala, idazabwelela kubote pakuti padziko pakhachana madzi. Nakutenepo iye adachosa janja lake nkuphata njiwayo, achiyibweza m'bote.

¹⁰ Adayimila kwantsiku zinomwe, nkubulisa pomwe njiwa ile m'botemo.

¹¹ Chakumawulo njiwa idabwelela kwa Nowa idaluma kamuti kawisi kamuolivi. Pamwepo Nowa adadziwa kuti madzi padziko yaphwilila.

¹² Adayimila pomwe kwantsiku zinomwe, nkubulisa pomwe njiwa ile, koma njiwayo ilibe kuzabwelela.

¹³ Mugole lamazana matanthatu nagole libodzi (601) ya Nowa, pantsiku yakuyamba yamwezi wakuyamba, madzi yadawuma padziko. Nowa adachosa ntsodzi yabotelo, paadanyangana adawona kuti pantsi pakhadatowuma.

¹⁴ Mumwezi wachiwili, pantsiku yamakumi mawili nanomwe, pantsi pakhadatowumilatu.

¹⁵ Mulungu adati kwa Nowa,

¹⁶ “Bula mubote nankazi wako nawana wako naaloola wako.

¹⁷ Ubulise bzentse bzamoyo bzawunabzo bziniti, mbalami nabzifuwo nabzinkwawa namimba, kuchitila kuti bzibalane bzidzadze pomwe dziko.”

¹⁸ Nakutenepo Nowa adabula mubote pabodzi nankazi wake nawana wake naaloola wake.

¹⁹ Nyama zentse nambalami nabzinkwawa namimba, bzidabula m'botemo kuteyeza mishowo yabzene.

Nowa ampeleka ntsembe

²⁰ Nowa adamangila Chawuta mbuto yakupelekela ntsembe, adatola nyama zentse zakuchena nambalami zentse zakuchena, nkupeleka mpfupo yakutenthelatu atali.

²¹ Chawuta adabva n'nunkho wabwino wantsembeyo, iye adati chamuntima mwake, “Nin'zatembelela lini pomwe dziko nathangwe lamunthu, pakuti nkhumbukila zantima wamunthu n'zakuyipa kuyambila pawung'ono wake. Nin'zacheneka lini pomwe bzamoyo ninga bzandachita ibzi.

²² Padziko pan'zakhala nanthawe yakubzala nayakukolola nayakujejela nayakuphsa nayachilimo nayamphepo nayamasikati nayawusiku.”