Kuyamba 7 - Bhukhu la Kuyamba

Chigumula

¹ Chawuta adati kwa Nowa, “Pita mubote nabanja lako, pakuti ndawona kuti ndiwe wekha wakulungama pam'badwe wentse uli padziko.

² Panyama zakuchena utakule mikono minomwe nazikazi zinomwe. Koma panyama zakupsipa utakule ziwili, ikono nayikazi.

³ Utakule mbalami zamishowo yentse, zikazi zinomwe nazimuna zinomwe, kuchitila kuti zikhale zamoyo padziko lentse lapantsi.

⁴ Kupita kwantsiku zinomwe kuchoka lelo, nin'zabvumbisa mvula padziko kwantsiku makumi manayi (40) usiku namasikati. Bzentse bzamoyo bzandidalenga, nin'zabzicheneka padziko.”

⁵ Nakutenepo Nowa adachita bzentse bzaadawuziwa na Chawuta kuti achite.

⁶ Nowa akhana magole mazana matanthatu (600), padachitika chigumula padziko.

⁷ Nowa nankazi wake nawana wake naaloola wake adapita mubote kuti aleke kufa namadzi yachigumula.

⁸ Bzinyama bzakuchena nabzakupsipa nambalami nabzentse bzinkwawa namimba,

⁹ bzili bziwili-bziwili, chimuna nachikazi, ninga kuwuziwa kukhadachitiwa Nowa na Mulungu.

¹⁰ Kudapita ntsiku zinomwe madzi yachigumula nkubwela padziko.

¹¹ Nowa paakhana magole mazana matanthatu (600), mumwezi wachiwili, ntsiku yakhumi nanomwe, ndiyo ntsiku idafunguka ntsantsa zentse zamaboo, namazhenela yentse yakudzulu yadafunguka.

¹² Mvula idabvumba padziko kwantsiku makumi manayi usiku namasikati.

¹³ Ntsiku imweyo Nowa nankazi wake nawana wake wachimuna atatu, Shemu na Hamu na Jafeti naaziloola wake adapita m'bote,

¹⁴ pabodzi nanyama kuteyeza mishowo yazene, bzifuwo kuteyeza mishowo yabzene, nabzentze bzinkwawa namimba kuteyeza mishowo yabzene, nambalami zentse kuteyeza mishowo yazene, mbalami zanshowo nanshowo.

¹⁵ Bzakulengewa bzamoyo bzakusiyana-siyana bzidapita mubote na Nowa bzili bziwili-bziwili,

¹⁶ kuteyeza kuwuziwa kwaakhadachitiwa Nowa na Mulungu. Pamwepo Chawuta adafunga nsuwo.

¹⁷ Madzi yachigumula yadapitiliza kubvumba padziko kwantsiku makumi manayi. Madzi yadawanda, bzidazachitisa kuti botelo liyangamale padzulu pamadzi.

¹⁸ Madzi yadapitiliza kuwanda padziko, bote nkuyangamala padzulu.

¹⁹ Madzi yadadzala nkunyuza maphili yentse matali yapadziko,

²⁰ yadanyuza mapili kufika mamita manomwe.

²¹ Bzinyama bzentse bzamoyo bzikhali padziko, mbalami nabzifuwo nabzinkwawa namimba pabodzi nawanthu nkufa.

²² Bzinthu bzentse bzamoyo bzikhali pabziko bzidafa.

²³ Chawuta adapha bzentse bzamoyo padziko, wanthu nabzinyama nambalami. Kudasala Nowa nabzentse bzaakhanabzo m'bote.

²⁴ Madzi yadadzala padziko lapantsi kwantsiku dzana namakumi mashanu.