Kuyamba 6 - Bhukhu la Kuyamba

Kutaza kwawanthu

¹ Wanthu paadayamba kuwanda padziko, adabala wana wachitsikana.

² Wana wa Mulungu adazawona kuti wana wawanthu wachitsikana akhabaliwa akhadakoma nkhope, adatakula waakhafuna nkuloola.

³ Pamwepo Chawuta adati, “N'zimu wangu un'zakhala lini pamunthu kufika lini nalini, pakuti nimunthu wanyama. Nakutenepo munthu an'zakhala lini padziko kwamagole yampita dzana namakumi mawili.” (120)

⁴ A Nefilimu akhali padziko lapantsi muntsiku zimwezo napambuyo pache, wana wa Mulungu paadabwela kuzaloola wana wawanthu achibala nawo wana. Amwewa akhali wanthu wam'phamvu wakale akhadziwika kwene-kwene.

⁵ Chawuta adawona kuti kuyipa kwamunthu padziko kukhadakula, bzentse bzaan'khala achikumbuka mumitima yawo m'bzakuyipa bzokha-bzokha.

⁶ Chawuta adakumbuka kuti “Ninga ndilibe kukonza wanthu padziko.”

⁷ Pamwepo Chawuta adati, “Nin'chosapo wanthu wentse wandidalenga padziko, wanthu nabzilombo nabzinkwawa namimba, nambalami. Ninkungula kuti ndidabzilengelanyi.”

⁸ Nowa ankomelewa ntima na Chawuta.

Nowa

⁹ Iyi ndiyo nkhani ya Nowa. Nowa akhali munthu wakulungama, akhali munthu akhalibe mulandu pam'badwe wake wentse. Nowa adafamba na Mulungu.

¹⁰ Nowa akhana wana atatu, Shemu na Hamu na Jafeti.

¹¹ Mulungu adawona kuti dziko ladzala nankhondo.

¹² Tsapano Mulungu adawona kuti padziko padzala nakudzonga, wanthu wentse akhadzonga padziko lapantsi.

¹³ Mulungu adati kwa Nowa, “Ndakumbuka bzakupha wanthu wentse, pakuti dziko ladzala nankhondo. Wonani, niwachenekela kubodzi nadziko.

¹⁴ Tsono iwe bzikonzele bote labwino lamatabwa, uyikhe bzipinda nkati mwalene, ulitsutsute nabelewu nkati nakunja kwalene.

¹⁵ Botelo ulikonze tenepa, muwutali mwalene lichite mamita dzana namakumi matatu namatatu (133), muwufupi mwalene muchite mamita makumi mawili namawili (22), kuyenda n'dzulu kuchite mamita khumi namatatu (13).

¹⁶ Pabote limwelo uyikhepo ntsodzi, pakati pantsodzi nachengo usiyepo mbuto infika masendimita makumi manayi namanayi (44). Nkati mwalene mukhale nambuto zitatu, yapantsi, yapakati nayapadzulu. Pambali pambotelo uyikhepo nsuwo.

¹⁷ Wonani, ine nin'zabvumbisa mvula yachigumula padziko, in'zacheneka bzinthu bzentse bzamoyo bzili padziko. Bzentse bzili padziko bzin'zafa.

¹⁸ Koma ine nin'zachita chibvano nayiwe. Iwe nankazi wako nawana wako naaloola wako mupite mubote.

¹⁹ Pabzinyama bzentse bzamoyo bzamishowo yentse utakule bziwili-bziwili upite nabzo mubote, kuti bzikhale bzamoyo pabodzi nayimwe, ngabziwe bzimuna nabzikazi.

²⁰ Utole bziwili-bziwili, mbalami kuteyeza mishowo yazene nabzentse bzin'kwawa padziko kuchitila kuti bzikhale bzamoyo.

²¹ Utakule chakudya chakusiyana-siyana, chako nachabzinyamabzo.”

²² Nowa adachita bzentse bzaadawuziwa na Mulungu kuti achite.