Kuyamba 45 - Bhukhu la Kuyamba

Jozefi aniwuza abale wake kuti iye mbani

¹ Pamwepo Jozefi adataza kubzilimbisa patsogolo pawanthu akhali pamwepo, iye adalila nkuti, chitani kuti wanthu wentse achoke pana ine. Palibe waakhanaye paadawuza abale wake, kuti iye mbani.

² Adalila mphele bzakuti a Ijipiti wentse adabva, nawanyumba ya Farawo adabvambo.

³ Jozefi adati kwaabale wake, ndine Jozefi! Ko apayi wangu achana moyo? Koma abale wake alibe kumudayila, pakuti adanyala kuwona kuti achalipo!

⁴ Nakutenepo Jozefi adati kwaabale wake, fikani pafupi nayine, ndaphata minyendo. Iwo paadafika pafupi, iye adati, ndine m'bale wanu Jozefi wamudagulisa ku Ijipiti.

⁵ Tsapano imwe lekani kushupika panango kubzikalipila nathangwe lakuti mudandigulisa kuno; pakuti Mulungu adandituma patsogolo panu kuchiza umoyo wawanthu.

⁶ Pakuti njala yakhala mudziko kwamagole mawili, pomwe kwasala magole mashanu yakusaya kulima panango kukolola.

⁷ Mulungu adandituma patsogolo panu kuti ndikuchizileni anango, azasaleko padziko lapantsi, kukuchengetelani wamoyo azinji.

⁸ Nakutenepo ndimwe lini mudandibwelesa kuno, ni Mulungu. Ndiye andidachita apayi wa Farawo nambuya wanyumba yake yentse nanduna yadziko lentse la Ijipiti

⁹ Kulumizani yendani kwaapayi wangu mukati kwayiwo, “Mwana wanu Jozefi wati, Mulungu adandichita mbuya wa Ijipiti yentse, bwelani kuno kuna ine, lekani kuchedwa.

¹⁰ Mun'zakhala mudziko la Gosheni, pafupi nayine, imwe nawana wanu, nawana wawana wanu, namabila yanu nang'ombe zanu nabzentse bzamunabzo.

¹¹ Kumweko nin'zakuchitilani bzentse, pakuti kwasala magole mashanu yanjala, pakuti imwe nawanyumba yanu nabzentse bzamunabzo muleke kushupika.”

¹² Tsapano maso yanu yakuwona, namaso yamung'ono wangu Bhenjemani yakuwona kuti nimulomo wangu ukulewa-lewa nayimwe.

¹³ “Munfunika kawuza apayi wangu bzandemela yangu yentse mu Ijipiti, nabzentse bzamwawona. Kulumizani mubwelese apayi wangu kuno.”

¹⁴ Pamwepo adakumbatila mung'ono wake Bhenjemani, nkuyamba kulila, Bhenjemani nkuyambambo kulila.

¹⁵ Adamphsoda abale wake wentse. Paadamaliza kuchita tenepo abale wake adayamba kulewa-lewa naye.

¹⁶ Fala palidafika munyumba ya Farawo kuti abale wa Jozefi abwela, Farawo namanduna yake paadabzibva adakondwa kwene-kwene.

¹⁷ Farawo adati kwa Jozefi, “Wuza akulu wako kuti, ‘Chitani ibzi: kwizikani mitolo yanu pabzifuwo bzanu muyende kudziko la Kenani;

¹⁸ mukatole apayi wanu nawanyumba zanu, mubwele kuno, ine nin'zakupasani mbuto yabwino mu Ijipiti, muchizadya bzamafuta bzamudziko.’

¹⁹ Pomwe mukaawuze kuti, ‘Chitani ibzi, takulani ngolo kuchoka mudziko la Ijipiti, zakukatakulisa wana wanu naakazi wanu, mubwele naapayi wanu kuno.

²⁰ Lekani kukumbuka bzombo bzanu, pakuti bzabwino bzili muno mu Ijipiti nibzanu.’ ”

²¹ Wana wa Izraeli adachita tenepo, Jozefi adaapasa ngolo kuteyeza fala lidachoka kwa Farawo, adaapasa mbuwa yapawulendo.

²² Adapasa abale wake wentse bzakubvala bzinyowani, koma Bhenjemani adampasa mazana matatu yamashekele yasiliva nabzakubvala bzishanu.

²³ Kwaapayi wake adatumiza ibzi: madhonki khumi yakhadatakula bzinthu bzabwino bzaku Ijipiti. Madhonki makazi khumi yakhadatakula mphunga nazingwa, nambuwa yaapayi wake yapawulendo.

²⁴ Jozefi adagonekana naabale wake, iwo paadayamba ulendo wawo Jozefi adati, “Lekani kashupana munjila pakuyenda.”

²⁵ Nakutenepo iwo adachoka mu Ijipiti achiyenda ku Kenani kwaapayi wawo Jakobho.

²⁶ Adaawuza kuti, “Jozefi achana moyo, ndiye akutonga mudziko lentse la Ijipiti” Pamwepo ntima wake udashupika, pakuti alibe kuwakhulupilila.

²⁷ Koma paadawuziwa mafala yentse ya Jozefi, yaadalewa kwayiwo, napaadawona ngolo zidatumiziwa na Jozefi kuzaatakula, n'zimu waapayi wawo Jakobho udamusuluziwa.

²⁸ Izraeli adati, “Bzakwana; Jozefi mwana wangu achana moyo! Niniyenda kamuwona ndinati ndafa.”