Kuyamba 44 - Bhukhu la Kuyamba

Kusayika kwa khomeshi

¹ Jozefi adawuza mulanda wake akhanyanganila munyumba mwake kuti, “Dzadza masakha yaamuna awa nachakudya chaankwanisa kutakula, uyikhe masheleni yamunthu yekha-yekha musakha lake,

² uyikhe khomeshi yangu yasiliva musakha lamung'ono wawo, masheleni yawagula nayo chakudya uyayikhe pomwe musakhamo.” Mwamunayo adachita bzaadawuziwa na Jozefi.

³ Mangwana yache machibese-bese amunawo adawuziwa kuti ayende bzawo ulendo wawo namadhonki yawo.

⁴ Koma paadandoti buleni muguta, adafamba kanthawe kang'ono-ng'ono, Jozefi adati kwamwamuna akhanyanganila munyumba mwake, “Teyela amuna wale, ukaaphata uwabvunze kuti, ‘Thangwe lanyi kubwezela chakuyipa pana chabwino? Thangwe lanyi mwaba khomeshi yasiliva yamambo?

⁵ Ko sindiyo yaamwela mbuya wangu inimudziwisa bzin'zachitika kutsogolo? Mwataza pakuchita tenepo.’ ”

⁶ Paadakaaphata adaawuza mafala yamweyo.

⁷ Iwo adati kwayiye, “Ko thangwe lanyi mbuya wangu kulewa mafala yatenepo kwayise? Ise alanda wanu tingachite lini chinthu chatenepo.

⁸ Wonani, masheleni yatidawona mumasakha yathu pakuyamba sitidabwelela nayo, kuchoka kudziko la Kenani; ko tingabe tani siliva panango golidhe kuchoka munyumba yambuya wako?

⁹ Umweyo wamuti muwone ana komeshi imweyo ngaaphewe. Anango tichizakhala alanda wambuya wangu.”

¹⁰ Iye adati, “Nin'chita bzamwalewa, wandichawona ana komeshi ndiye achakhala mulanda wangu, koma anango wentse achakhala alibe mulandu.”

¹¹ Nakutenepo munthu wentse adabulusa sakha lake, nkulitsudzula.

¹² Iye adayamba kunyangana musakha yankulu mpaka kwang'ono wawo. Khomeshi idazawoneka ili musakha ya Bhenjemani.

¹³ Pamwepo iwo adang'amba bzakubvala bzawo. Munthu wentse adayikha ntolo wake padhonki lake achibwelela kuguta.

¹⁴ Judha naabale wake adayenda kunyumba kwa Jozefi, adakamuwona aliko, iwo adamukotamisa nkhope zawo pantsi patsogolo pake.

¹⁵ Jozefi adati, kwayiwo, “Ko n'chinyi chamwachita? Ko mukhadziwa lini kuti munthu ninga ine ninilotela chadidi?”

¹⁶ Judha adati, “Tingati tani kwayimwe mbuya wathu? Tingalewenyi, ko tingabzichenese tani? Mulungu wawona chakuyipa chaalanda wanu; wonani ndise akapolo wambuya wathu, ise tentse nayiye ana janja lawoneka nakhomeshi.”

¹⁷ Jozefi adati kwayiwo, “Ningachite lini tenepo. Munthu aninga wawoneka ana komeshi ndiye achakhala mulanda wangu. Imwe anango mungayende kwaapayi wanu, mufambe mun'delekho.”

Judha ankumbila Bhenjemani

¹⁸ Judha adafika pafupi na Jozefi, adati kwayiye, “Ndaphata minyendo mbuya wangu, lekani mulanda wanu, alewe-lewe nayimwe. Lekani kundikalipila pakuti imwe mudandolingana na Farawo.

¹⁹ Mbuye wangu adabvunza alanda wake kuti, ‘Ko muna apayi panango m'bale?’

²⁰ Ise tidati kwambuya wathu, ‘Yinde tina apayi, nikhalamba, namung'ono wathu waadabala akalamba, koma nkulu wake ndiye adafa. Koma iye ndiye adasala ali yekha munyumba mwaamayi wake. Apayi wake animufuna kwene-kwene.’

²¹ Pamwepo imwe mudati kwayise alanda wanu, ‘Mubwele naye ndizamuwone.’

²² Ise tidati kwambuya wathu, ‘Mwana umweyo angasiyane lini naapayi wake, pakuti akasiyana nawo, apayi wakewo angafe.’

²³ Pamwepo imwe mudati kwaalanda wanu, ‘Mukaleka kubwela namung'ono wanuyo, mun'zawona lini nkhope yangu pomwe.’

²⁴ Patidafika kwamulanda wanu payi wathu, tidaawuza mafala yambuya wathu.

²⁵ Apayi wathu paadati, ‘Yendani pomwe mukatigulileko tuchakudya,’

²⁶ ise tidati, ‘Tiniyendako lini pomwe. Mung'ono wathu tikayenda naye ise tiniyenda; pakuti tingakawonane nankhope yamunthu ule, kusala kwakuti mung'ono wathu tayenda naye.’

²⁷ Pamwepo mulanda wanu, apayi wathu adati, ‘Imwe mun'dziwa kuti nkazi wangu adandibalila wana awili,

²⁸ munango adandisiya, pamwepo ine ndidati, Chadidi wang'ambiwa-ng'ambiwa, ndilibe kuzamuwona pomwe.’

²⁹ Mukanditolela uyu pomwe, chakuyipa chikakachitika payiye, muniyendesa nsolo wangu wayimvi kumbuto yawanthu wakufa.

³⁰ Nakunetepo ine ndikabwelela kwamulanda wanu apayi wathu, mwanayu palibe, pakuti umoyo wawo udaphatana nawumoyo wamwanayu,

³¹ akakawona kuti mwanayu palibe, ankafa. Ise alanda wanu tinkayendesa nsolo wayimvi waapayi wanthu mulanda wanu kumbuto yawanthu wakufa nashungu.

³² Pakuti ndidalumbila kwaapayi wangu kuti, ‘Ndikaleka kubwelela naye kwayimwe, nin'zakhala namulandu kwaapayi wangu kwawumoyo wangu wentse.’

³³ Ndaphata minyendo lekani mulanda wanu asale pambuto yamwanayu kuti akhale kapolo wambuya wangu, lekani iye ayende naakulu wake.

³⁴ Ko ningabwelele tani kwaapayi ndilibe mwanayu? Nin'gopa kawona chakuyipa chinkachitika kwaapayi wangu.”