Kuyamba 43 - Bhukhu la Kuyamba

Akulu wa Jozefi am'bwelela ku Ijipiti na Bhenjemani

¹ Njala idakula mudziko la Kenani.

² Paadadya chakudya chaadabwela nacho kuchoka ku Ijipiti, apayi wawo adati, “Yendani pomwe mukagule chakudya ching'ono-ng'ono.”

³ Koma Judha adati kwaapayi wake, “Mwamunayo adatichenjezelatu, adati, ‘Mun'zawona lini nkhope yangu, kunja kwakuti mwabwela namung'ono wanu.’

⁴ Koma mukatituma pabodzi namung'ono wathu, tiniyenda kakugulilani chakudya;

⁵ koma mukalamba kuti tiyende naye, nayisembo pomwe tiniyenda lini, pakuti mwamunayo adati, ‘Mun'zawona lini nkhope yangu, kunja kwakuti mwabwela namung'ono wanu.’ ”

⁶ Izraeli adati, “Mudachitilanyi bzakuyipa tenepo? Thangwe lanyi mudawuza munthuyo kuti muna mung'ono wanu munango?”

⁷ Iwo adati, “Mwamuna umweyo adatibvunzisisa, adazabvunza nabzaabale wathu, adazatibvunzambo pomwe nabzayimwe adati, ‘Ko apayi wanu achali wamoyo? Ko muna munango mung'ono wanu?’ Nakutenepo tikhandodayila bzaakhatibvunza, tilibe kudziwa kuti iye achati bwelani namung'ono wanu.”

⁸ Judha adati kwaapayi wake Izraeli, “Tipaseni Bhenjemani tiyende naye, kuti imwe nayise nawana wathu tileke kufa nanjala.

⁹ Ine chadidi-chadidi ndichawona kuti ali bwino. Ndikaleka kubwela naye, mulandu uzakhale payine. Ndikaleka kubwelela naye kwayimwe, mulandu umwewo uzakhale kwayine kufika lini nalini.

¹⁰ Pakuti ninga tilibe kutaya nthawe, tikhadatobwelela kawili kentse.”

¹¹ Pamwepo apayi wawo Izraeli adati, “Peno ntenepo mungachite tenepo, nkuluyo mumutakulilembo michelo yabwino yamudziko m'masakha yanu, muyendesele munthuyo mpfupo, tubhalumu, natuwuchi, nagumu, namula, namanduwi yapisitachiyo namaalimondi.

¹² Izraeli adawuza wana wake kuti atakule masheleni yakukagula nayo chakudya namasheleni yaadawona m'masakha yawo. Pakuti bzidachitikabzo panango kukhali kuphonya kwaanyakugulisa.

¹³ Takulani mung'ono wanuyo muyende pomwe kwamwamuna umweyo.

¹⁴ Mulungu Nyam'phamvu zentse, achite kuti mwamunayo akakuchitileni chifundo, akakubvumileni kukabwelela na Bhenjemani na Simiyoni. Ndikatayikidwa nawana wangu, ndatayikidwa.”

¹⁵ Nakutenepo amunawo adatakula mpfupo zaakhadapasiwa namasheleni yakukagula nayo chakudya nayakukabweza. Adasumuka nkuyenda ku Ijipiti pabodzi namung'ono wawo Bhenjemani, adafika achiwonana na Jozefi.

¹⁶ Tsapano Jozefi paadaawona kuti akhana mung'ono wawo Bhenjemani, iye adati kwamulanda akhanyanganila munyumba mwake, “Yenda nawanthu awa kunyumba kwangu, ukaphe chifuwo uphike chakudya, pakuti lelo masikati achadya nayine kunyumba kwangu.”

¹⁷ Mwamunayo adachita bzaadawuziwa na Jozefi, adayenda nawo wentse kunyumba kwa Jozefi.

¹⁸ Amunawo paadayendesewa kunyumba kwa Jozefi adagopa kwene-kwene, iwo adati, “Kuno tabweleselewa masheleni yadayikhiwa mumasakha yathu pawulendo watidabwela pakuyamba. Watibwelesa kuno kuti atimange atichite alanda wake, achititolela madhonki yathu.”

¹⁹ Nakutenepo adazayenda kwawakuyanganila munyumba mwa Jozefi nkulewa-lewa naye ali pansuwo wanyumba.

²⁰ Iwo adati, “Mbuye wathu, nkakuyamba lini kubwela kuzagula chakudya,

²¹ koma patidayima kuti tigone, tidatsudzula mitolo yathu nkuwona masheleni yamunthu yekha-yekha musakha lamuthu yekha-yekha, yentse yakukwana. Lelo tabwela nayo masheleni yamweyo.

²² Tabwela namasheleni yakugula nayo chakudya. Koma tilibe kudziwa kuti masheleni yatidawona mumasakha yathu yadayikhiwa nayani.”

²³ Mwamunayo adati, “Lekani kugopa, Mulungu wanu, Mulungu waapayi wanu, ndiye adakuyikhilani masheleni yamweyo mumasakha yanu. Ndine ndidayatambila masheleni yanu.” Pamwepo adabwelesa Simiyoni kwayiwo.

²⁴ Mulanda umweyo adayenda nawo kunyumba kwa Jozefi. Adaapasa madzi achisamba minyendo yawo. Adapasa madhonki yawo chakudya.

²⁵ Amunawo adakonzeka mpfupo zawo zakuzapasa Jozefi, pakuti adabva kuti achabwela masikati achizadya nawo pabodzi.

²⁶ Jozefi paadapita munyumba, amunawo adamutambila achimpasa mpfupo zawo. Adakotama pantsi patsogolo pake.

²⁷ Jozefi adaabvunza utano, adati kwayiwo, “Ko apayi wanu wamudati akalamba ali tani? Ko achana moyo?”

²⁸ Iwo adati, “Mulanda wanu, apayi wathu ali bwino, achana moyo.” Adamukotamila achimulemekeza.

²⁹ Jozefi adanyangana nkuwona mung'ono wake Bhenjemani, mwana waamayi wake, iye adati, “Ko uyu ndiye mung'ono wanu wakumalizila wamudandiwuza? Mulungu ngaakubvele ntsisi mwanangu.”

³⁰ Pamwepo Jozefi mwakukulumiza, adapsaga mbuto yakulilila, pakuti ntima wake ukhadasuwa mung'ono wake. Adapita muchipinda chankati achikalila m'mwemo.

³¹ Adasamba kumaso nkubula. Pamwepo iye adabzilimbisa, adati, “Pakulani chakudya.”

³² Jozefi adampakulila payekha, iwombo pawokha, wanthu wachi Ijipiti waakhadya nawo, pawokhambo, thangwe lakuti wanthu wachi Ijipiti akhadya lini chakudya naa Hebheru, pakuti nichinthu chinyantsa kwaa Ijipiti.

³³ Abale wake adakhala adanyanganana na Jozefi, kuteyeza kubadwa kwawo kuchoka kwawakuyamba kufika kwawakumalizila, paadawona kuti ndiko kukhala kwaakhadachita adakankhamuka.

³⁴ Chakudya chikhapakuliwa chichichoka pathebulu ya Jozefi. Koma chakudya cha Bhenjemani chikhali chizinji kupita chawo kampetewa kashanu. Nakutenepo adamwa, nkuledzela nkukondwa pabodzi na Jozefi.