Kuyamba 41 - Bhukhu la Kuyamba

Jozefi anilapanula maloto yamambo

¹ Pakudapita magole mawili, Farawo adalota adayima mphepete mwakamadzi ka Nayilo.

² Pamwepo adawona ng'ombe zinomwe zikazi zabwino zakunenepa, zichibula m'madzi zichidya mumitete.

³ Adazawona pomwe ng'ombe zikazi zinomwe zakuyipa zakuwonda zichibula mu Nayilo zichikayima pakhana ng'ombe zile zikazi zakunenepa, mphepete mwakamadzi.

⁴ Ng'ombe zakuyipa, zakuwonda zile zidadya zabwino, zakunenepa zinomwe. Pamwepo Farawo adalamuka.

⁵ Adagona pomwe nkulota kachiwili; adalota ngala zinomwe zatiligu zakukhuma, zabwino zikhali patsinde ibodzi.

⁶ Adazawona pomwe ngala zinomwe zikhalibe kukhuma, zidawumisiwa namphepo yakumabveladzuwa.

⁷ Ngala zikhalibe kukhuma zidameza ngala zakukhuma, pamwepo Farawo nkulamuka, adazadziwa kuti kukhali kulota.

⁸ Mangwana yache, Farawo paadalamuka adashupika kwene-kwene. Nakutenepo adazatuma wanthu kachemela anyamatsenga wentse wamu Ijipiti nawakuchenjela, nkuwalongosolela maloto yake, koma palibe adakwanisa kuyalapanula.

⁹ Tsapano nkulu waanyakupeleka vinyu adati kwa Farawo, “Lelo ndazawona kutaza kwangu.

¹⁰ Imwe mambo pamudambatikalipila, inepo nankulu waanyakuphika zingwa muchitiyikha mujeli kunyumba yankulu waakhalilizi,

¹¹ tidalota maloto usiku umwewo. Maloto yake nayangu yakhana bzayakhalewa.

¹² Tikhana mu Hebheru waching'ono kumweko, mulanda wankulu wakunyanganila mujelimo; patidamuwuza maloto yathu iye adalapanula maloto yamuthu yekha-yekha kuteyeza kulota kwatidachita.

¹³ Kulapanula kwaadachita malotoyo kwayise ndibzo chayibzo bzidazachitika, ine ndidazabwezelewa pabasa langu, wakunyanganila wakuphika adazaphewa.”

¹⁴ Nthawe imweyo Farawo adatuma munthu kachemela Jozefi. Adamuchosa mujeli, achimugela ndebvu. Adampasa bzakubvala bzabwino, achimuyendesa kwa Farawo.

¹⁵ Farao adati kwa Jozefi, “Ndalota, koma palibe wakwanisa kulapanula malotoyo. Tsapano ndawuziwa kuti iwe unkwanisa kulapanula maloto.”

¹⁶ Jozefi adati kwa Farawo, “Ine ndekha ningakwanise lini, Mulungu ndiye ankwanisa kulapanula maloto yanu.”

¹⁷ Pamwepo Farawo adati kwa Jozefi, “Ndidalota ndidayima mphepete mwakamadzi ka Nayilo,

¹⁸ ndidawona m'madzi muchibula ng'ombe zikazi zinomwe zabwino zakunenepa, zichidya mumitete.

¹⁹ Kudazabula pomwe zinango ng'ombe zinomwe zikazi zakuyipa, zakuwonda, zikhadandosala mabondo basi, ndinati ndawona ng'ombe zakutenepo muno mu Ijipiti.

²⁰ Ng'ombe zakuyipa, zakuwonda zidadya ng'ombe zinomwe zakunenepa.

²¹ Koma zakuwonda pazidadya zakunenepa, palibe akhakwanisa kudziwa kuti zadya zakunenepa, pakuti zidandowa zakuwondoloka ninga bzazikhali pakuyamba, pamwepo ndidazalamuka.

²² Mumaloto yangu ndidazalota, ngala zinomwe zambewu zakukhuma, zabwino zikhali patsinde ibodzi.

²³ Padazabulambo pomwe ngala zinomwe zikhana mbewu zitete zakufota zikhalibe kukhuma, zikhadawumisiwa namphepo yakumabveladzuwa.

²⁴ Ngala zinomwe zitete zakufota zidameza ngala zinomwe zakukhuma. Ndidalongosolela anyamatsenga maloto yangu, koma palibe ne m'bodzi wawo adakwanisa kulapanula malotoyo.”

²⁵ Pamwepo Jozefi adati kwa Farawo, “Mambo, maloto yanu yentse yali mawili yanilewa chinthu chibodzi. Mulungu wakuwonesani imwe bzaanfuna kuchita.

²⁶ Ng'ombe zinomwe zikazi zakunenepa bzinilewa magole manomwe, ngala zinomwe zakukhuma bzinilewa magole manomwe. Maloto yamweyo yanilewa chinthu chibodzi.

²⁷ Ng'ombe zinomwe zikazi zakuyipa zakuwonda zidamalizila kubula nangala zinomwe zikhalibe kukhuma, zidawumisiwa namphepo yakumabveladzuwa, bzinilewa magole manomwe yanjala in'zachitika kutsogolo.

²⁸ Ibzi bzin'zachitika ninga kukuwuzani kwandachita imwe mbuya wangu pakuyamba, Mulungu wakuwonesani bzin'zachitika kutsogolo.

²⁹ Kumbwela magole manomwe yampfumba mudziko lentse la Ijipiti,

³⁰ pambuyo pampfumba, kun'zabwela magole manomwe yanjala, pamwepo an'zayebwa mfumba yentse mudziko la Ijipiti, pakuti njala in'zameza dziko.

³¹ Mpfumba in'zakumbukiwa lini mudziko, nathangwe lakuti njala in'zachitika in'zakhala ikulu kwene-kwene.

³² Maloto yanu yabwezelewa kawili, pakuti Mulungu ndibzo bzawakumbuka kuchita. Mulungu an'zachita kuti bzichitike tsapanopa.

³³ “Tsapano imwe sankhulani munthu ankumbuka pomwe wakuchenjela, mumuyikhe anyanganile dziko la Ijipiti.

³⁴ Farawo ngaapitilize kusankhula wakunyanganila mudziko, atole chachishanu, pambewu zaanilima mudziko la Ijipiti, pamagole manomwe yampfumba.

³⁵ Ngaakhonkobze chakudya chentse pamagole yampfumba yakubwela, Farawo aapase mvumo yakuyikha chakudya m'maguta yaniyikhiwa chakudya, achichengete.

³⁶ Chakudya chimwecho ngachiyikhiwe pambali mudziko, kuchitila magole manomwe yanjala in'zagwela Ijipiti, kuchitila kuti dziko lizaleke kuchenekeka nanjala.”

Jozefi an'chitiwa ntongi mu Ijipiti

³⁷ Farawo nanduna zake zentse adakondwa nanzelu zidapelekewa na Jozefi.

³⁸ Pamwepo Farawo adati kwaalanda wake, “Ko tingamuwone kuponi munthu adalingana nawuyu, ana n'zimu wa Mulungu?”

³⁹ Nakutenepo Farawo adati kwa Jozefi, “Pakuti Mulungu wawonesa kale bzentse ibzi kwayiwe, palibe munango ankumbuka pomwe wakuchenjela ninga iwe,

⁴⁰ iwe un'khala ntongi nkulu wapan'zinda wangu. Wanthu wangu wentse achachita bzawun'zalewa. Koma pankhani zawumambo ndine nkulu kuposa iwe.”

⁴¹ Farawo adati kwa Jozefi, “Ndakuchita ntongi padziko lentse la Ijipiti.”

⁴² Nakutenepo Farawo adachosa lingi yachidhindo kujanja lake achibvadzika Jozefi, adam'bvadzika bzakubvala bzabwino bzalineni, achim'bvadzika cheni yagolidhe n'khosi.

⁴³ Mambo adachita kuti Jozefi akwile mungolo yachiwili yawumambo, kutsogolo kwake kukhana wanthu akhakuwilila kuti, “Mugodamileni!” Ndiko kuyikhiwa kudachitiwa Jozefi kuwa ntongi wamu Ijipiti yentse.

⁴⁴ Farawo adati kwa Jozefi, “Ndine Farawo, palibe munthu an'chita chinthu chawunsaya kudziwa iwe mudziko lentse la Ijipiti.”

⁴⁵ Farawo adapasa Jozefi dzina lachi Ijipiti lakuti Zafenatipaniya, adampasa nkazi akhachitiwa Asenati, mwana wa Potifera nyantsembe wamu Oni. Nakutenepo Jozefi adafamba mudziko lentse la Ijipiti.

⁴⁶ Jozefi akhana magole makumi matatu, paadapasiwa basa namambo Farawo waku Ijipiti, Jozefi adachoka kukhana Farawo achikafambila dziko lentse la Ijipiti.

⁴⁷ Pamagole manomwe yampfumba, dziko lapantsi mudachita chakudya chizinji kwene-kwene.

⁴⁸ Jozefi adagwezeka chakudya mudziko la Ijipiti m'magole manomwe yampfumba. Adagwezeka chakudya mumaguta; adagwezeka chakudya mumaguta yentse, chikhachoka m'minda ikhadazungunuka maguta.

⁴⁹ Nakutenepo Jozefi adagwezeka chakudya chizinji kwene-kwene, ninga n'chenga wamunyanja, kufikila adazaleka kuchipima, pakuti chikhapimika lini.

⁵⁰ Magole yanjala yanati yafika, Jozefi akhadatobala wana awili wachimuna na Asenati mwana wa Potifera, nyantsembe wa Oni.

⁵¹ Jozefi adapasa mwana wake wakuyamba dzina lakuti, Manase adati, “Mulungu wachita kuti ndiyebwe kushupika kwangu, nawanyumba yaapayi wangu.”

⁵² Mwana wake wachiwili adampasa dzina lakuti, Efulemu, bzichilewa kuti, “Mulungu wandipasa wana ndili mudziko lakushupika kwangu.”

⁵³ Magole manomwe yampfumba yakhali mudziko la Ijipiti yadafika pakumala;

⁵⁴ magole manomwe yanjala yadayamba, kuteyeza kulewa kwadachita Jozefi. Madziko yanango yentse yakhana njala, koma mudziko la Ijipiti ndimo mukhana chakudya.

⁵⁵ Mudziko la Ijipiti pamukhana njala, wanthu adalila kwa Farawo achifuna chakudya. Koma Farawo adati kwaa Ijipiti wentse, “Yendani kwa Jozefi mukachite bzaankakuwuzani.”

⁵⁶ Nakutenepo njala payidakula mu Ijipiti, Jozefi adafungula magwangwa, nkuyamba kugulisila chakudya wanthu wamu Ijipiti, pakuti njala ikhadakula mudziko la Ijipiti.

⁵⁷ Pomwe madziko yentse yapantsi yadayenda ku Ijipiti kukhana Jozefi kuzagula chakudya, pakuti njala ikhadakula padziko lentse lapantsi.