Kuyamba 4 - Bhukhu la Kuyamba

Kayini na Abhelo

¹ Tsapano Adhamu adadziwa nkazi wake Eva, iye adaphata pathupi nkubala Kayini, adati, “Ndabala munthu, ndathandiziwa na Chawuta.”

² Adazabala pomwe m'bale wake waadapasa dzina lakuti Abhelo. Abhelo akhachengeta mabila, Kayini adawa mulimi padziko.

³ Nakufamba kwanthawe Kayini adayendesa ntsembe yake kwa Chawuta kuchoka kumichelo yapantsi,

⁴ Abhelo adayendesambo chakuyamba chamabila yake, nabzipindi bzakununa bzachifuwocho. Chawuta adakondwa na Abhelo nantsembe yake,

⁵ Chawuta alibe kutambila Kayini nantsembe yake. Pamwepo Kayini adakalipa kwene-kwene, nkudodomesa pamaso.

⁶ Chawuta adati kwa Kayini, “Thangwe lanyi kukalipa? Thangwe lanyi kudodomesa nkhope?

⁷ Ko ukachita bwino ungaleke kutambiliwa? Ukaleka kuchita bwino, chakuyipa chinkutsandila pansuwo chichifuna iwepo, koma iwe unfunika kukunda.”

⁸ Kayini adati kwam'bale wake Abhelo, “Tiyende n'thengo,” paakhali n'thengomo, Kayini adasandukila m'bale wake Abhelo, nkumupha.

⁹ Pamwepo Chawuta adati kwa Kayini, “M'bale wako Abhelo ali kuponi?” Iye adati, “Nin'dziwa lini kuti ali kuponi. Ko ine ndine nin'chengeta m'bale wangu?”

¹⁰ Chawuta adati, “N'chinyi chawachita? Fala lagazi lam'bale wako lili kulila kwayine kuchoka pantsi.

¹¹ Tsapano watembelelewa mudziko lino, lidamwa gazi lam'bale wako wawudapha namanja yako.

¹² Pawun'zalima mudongo limwelo un'zakolola lini. Un'zawa munthu wakuzungayila wakundofamba padziko.”

¹³ Kayini adati kwa Chawuta, “Chilango chamwandipasa n'chikulu, nin'chikwanisa lini kuchitakula.

¹⁴ Lelo mwandithamangisa padziko, ndachoka patsogolo panu, ndaakuzungayila ndikundofamba-famba nadziko. Munthu wentse an'gumana nayine an'zandipha.”

¹⁵ Chawuta adati kwayiye, “Ntenepo lini! Munthu wentse anipha Kayini, an'zalangiwa kadapetewa kanomwe.” Chawuta adayikha chilatizo pa Kayini, kuchitila kuti munthu aninga wamuwona aleke kumupha.

¹⁶ Kayini adachoka patsogolo pa Chawuta, nkuyenda kakhala kudziko la Nodhi chakumabveladzuwa kwa Edheni.

M'badwe wa Kayini

¹⁷ Kayini adadziwa nkazi wake, iye adaphata pathupi nkubala Enoki. Adamanga guta, guta limwelo adalipasa dzina lamwana wake wachimuna, Enoki.

¹⁸ Enoki akhali apayi wa Iradhi, Iradhi akhali apayi wa Mehuyaeli, Mehuyaeli akhali apayi wa Metusayeli, Metusayeli akhali apayi wa Lameki.

¹⁹ Lameki akhana akazi awili, wakuyamba akhachitiwa Adha, wachiwili akhachitiwa Zila.

²⁰ Adha adabala Jabhali, uyo akhali payi wawanthu akhakhala m'matenti, akhafuwa bzifuwo.

²¹ Dzina lam'bale wake likhachitiwa Jubhali, uyo akhali payi wawanthu aniliza banjo namitolilo.

²² Zila adabala Tubhali Kayini, uyo akhakonza bzinthu bzentse bzankuwa nabzasimbi. Nana wa Tubhali Kayini akhachitiwa Naama.

²³ Lameki adati kwaazikazi wake, “Adha na Zila, ibvani fala langu! Imwe azikazi wa Lameki tetekeleni bzandikulewa ine! Ine ndidapha munthu, adandipweteka, mwamuna waching'ono nathangwe lakundimenya!

²⁴ Peno munthu anipha Kayini anilangiwa kadapetewa kanomwe, munthu anipha lameki an'zalangiwambo kadapetewa makumi manomwe nanomwe.”

Seti na Enoki

²⁵ Adhamu adadziwa pomwe nkazi wake, nkubala mwana wachimuna waadapasa dzina lakuti Seti, iye adati, “Mulungu wandipasa pomwe mwana pambuto ya Abhelo ule adaphewa na Kayini.”

²⁶ Seti adabala mwana wachimuna waadapasa dzina lakuti Enoshi. Nthawe imweyo wanthu adayamba kuchemela dzina la Chawuta.