Kuyamba 34 - Bhukhu la Kuyamba

Dhina ampsipisiwa

¹ Tsapano Dhina mwana wachikazi wa Leya, waadabalila Jakobho, adayenda kazungila akazi wamudziko la Kenani.

² Shekemu mwana wa Hamori mu Hivi, nduna yamudziko adamuwona, adamuphata achigona naye, achimunyazisa.

³ Iye datolewa ntima na Dhina mwana wachikazi wa Jakobho; adamufuna achilewa-lewa naye, mafala yabwino yakumufuna.

⁴ Nakutenepo Shekemu adalewa-lewa naapayi wake Hamori adati, “Ndilooleleni ntsikana uyu akhale nkazi wangu.”

⁵ Tsapano Jakobho adabva kuti Dhina mwana wake wachikazi akhadapsipisiwa; koma wana wake wachimuna akhali nthengo nabzifuwo. Jakobho adanyamala mpaka iwo abwela.

⁶ Hamori apayi wa Shekemu adayenda kwa Jakobho achikalewa-lewa naye.

⁷ Wana wa Jakobho adabwela kuchoka nthengo, paadabva bzikhadachitika, adashupika achikalipa kwene-kwene, pakuti bzidachita Shekemu, kwaa Izraeli bzikhanyazisa.

⁸ Koma Hamori adalewa-lewa nawo, adati, “Mwana wangu Shekemu akufuna mwana wanu wachikazi; ndaphata minyendo yanu, mpaseni kuti amuloole.

⁹ Ngatiloolelaneni, ise tiloole wana wanu, imwe muloolembo wathu.

¹⁰ Imwe mukhale pabodzi nayise, mungakhale pentse pamunfuna; khalani muchichita malonda m'mwemo, kuti mukhalembo nambuto.”

¹¹ Shekemu adati pomwe kwaapayi wa Dhina nakwaazimano wake, “Ndichitilemboni bwino, bzentse bzamuti mulewe ninkupasani.

¹² Lewani mpagalo nampfupo yanyakuloodwa, ninkupasani bzamuninga mwalewa; chaninfuna ine nkundipasa mwana wanu kuti akhale nkazi wangu.”

¹³ Wana wa Jakobho adadayila Shekemu naapayi wake Hamori, bzakuwaphata kumaso, pakuti Shekemu akhadapsipisa kale nana wawo Dhina.

¹⁴ Iwo adati kwayiwo, “Tingachite lini tenepo, kupeleka nana wathu kwamunthu alibe kugwatiwa khanda lanyama lachimuna, pakuti kwayise nichinthu chinyazisa.

¹⁵ Ise tintobvuma kuchita tenepo, imwe mukachita ninga ise, amuna wentse wakwanu akagwatiwa khanda lanyama lachimuna.

¹⁶ Mukatenepo pan'zakhala nakuloolelana pakati payimwe nayise. Ise tin'zalooza kwayimwe, wana wanu achizaloolambo kwayise, tin'zakhala nayimwe tichizakhala wanthu abodzi.

¹⁷ Koma mukaleka kutetekela bzatalewa, bzakugwatiwa khanda lanyama lachimuna, tintakula mwana wathu tichiyenda naye.”

¹⁸ Mafala yawo yadakondwesa Hamori namwana wake Shekemu.

¹⁹ Mulumbwana umweyo alibe kuchedwa kubzichita, pakuti akhafuna mwana wa Jakobho. Shekemu akhakuziwa kwene-kwene mubanja lake lentse.

²⁰ Hamori namwana wake Shekemu adayenda kunsuwo waguta kwaadakalewa-lewa nawanthu waguta lawo, adati,

²¹ “Wanthu awa akukhala bwino nayise; ninga akhala bzawo mudziko lino achichita malonda yawo, pakuti mukanyangana dziko lino ndikulu; ngatiloolelaneni nawo, wana wathu ambaloola wana wawo, wana wawombo ambaloola wana wathu.

²² Koma wanthu awa antobvuma kukhala nayise, tichikhala wanthu abodzi, mwamuna wentse ali pakati pathu akagwatiwa khanda lanyama lachimuna ninga bzaali iwo.

²³ Ko chuma chawo nabzifuwo bzawo sibzin'zakhala bzathumbo? Nakutenepo ngatibvaneni nawo, kuti akhale nayise.”

²⁴ Wanthu wentse adayenda kunsuwo waguta adabvuma bzidalewedwa na Hamori namwana wake Shekemu; mwamuna wentse adayenda kunsuwo waguta adagwatiwa khanda lanyama lachimuna.

²⁵ Pantsiku yatatu, achali kuwawiwa, wana awili wa Jakobho Simiyoni na Levi, azimano wa Dhina, adatakula mabhemba yawo nkupita muguta mwakusaya kugopa, nkupha amuna wentse.

²⁶ Adapha Hamori namwana wake Shekemu nabhemba, adatakula Dhina munyumba mwa Shekemu nkuyenda naye.

²⁷ Wana wa Jakobho adayenda kukhana bzitanda, nkupamba guta, nathangwe lakuti nana wawo akhadapsipisiwa;

²⁸ adatola mabila yawo, namadhonki yawo, nabzentse bzikhali muguta nan'thengo,

²⁹ nachuma chawo chentse, nawana wawo wentse naakazi wawo, nabzentse bzikhali muzinyumba zawo, adabzipamba achibzichita bzawo.

³⁰ Pamwepo Jakobho adati kwa Simiyoni na Levi, “Mwandibwelesela nyathwa, mwachita kuti ndinunkhe, kwawanthu wamudziko lino, a Kenani naa Perezi; ise ndise ang'ono-ng'ono, akakochezana adanyanganana nayine an'zandicheneka, ine nawanyumba yangu.”

³¹ Koma iwo adati, “Angaphate nana wathu ninga hule?”