Kuyamba 30 - Bhukhu la Kuyamba

¹ Koma Rakelo paadawona kuti akubalila lini Jakobho wana, adachitila nchanje nkulu wake Liya. Rakelo adati kwa Jakobho, “Ndipase wana, ukaleka ninifa.”

² Koma Jakobho adakalipila Rakelo nkuti, “Ko ine ndatola mbuto ya Mulungu?” Pakuti ndiye adachitisa kuti uleke kubala.

³ Pamwepo Rakelo adati kwa Jakobho, “Tola mulandakazi wangu Bhiliha ugone naye, kuti andibalile mwana.”

⁴ Rakelo adapeleka Bhiliha kwa Jakobho kuti akhale nkazi wake. Nakutenepo Jakobho adadziwana naye.

⁵ Bhiliha adaphata pathupi nkubalila Jakobho mwana wachimuna.

⁶ Rakelo adapasa mwana umweyo dzina lakuti Dhani nkuti, “Mulungu wandiyenzanisa pomwe wabva fala langu, wandipasa mwana wachimuna.”

⁷ Bhiliha mulanda wa Rakelo adaphata pathupi pomwe nkubala mwana wachimuna wachiwili.

⁸ Pamwepo Rakelo adati, “Ndapolowana nanana wangu, ndichimukunda.” Nakutenepo mwanayo adampasa dzina lakuti Nafitali.

⁹ Liya paadawona kuti wayima kubala, adapeleka mulanda wake Zilipa kwa Jakobho kuti akhale nkazi wake.

¹⁰ Mulanda wa Liya Zilipa adabalila Jakobho mwana wachimuna.

¹¹ Liya adati, “Ndachita mwayi!” Mwanayo adampasa dzina lakuti Gadhi.

¹² Mulanda wa Liya Zilipa adabalila Jakobho mwana wachimuna wachiwili.

¹³ Pamwepo Liya adati, “Ndikukondwa, akazi wentse an'zandichemela kuti kukondwa, adampasa dzina lakuti Asheri.”

¹⁴ Munthawe yakukolola tiligu, Rubheni adayenda kumunda kwaadakawona yamichelo yamandirekisi, adachela micheloyo achikapasa amayi wake Liya. Rakelo adati kwa Liya, “Ndaphata minyendo ndipasembo manango mamandirekisi yawabweleselewa namwana wako.”

¹⁵ Liya adati, “Ko kunditolela kwawudachita mwamuna kwachepa? Lelo uno waakufuna kunditolela pomwe mamandirekisi yandabweleselewa namwana wangu.” Rakelo adati kwa Liya, “Ukandipasa mamandirekisi yawabweleselewa namwana wako, Jakobho an'gona nayiwe usiku walelo.”

¹⁶ Chakumawulo Jakobho paadachoka kumunda, Liya adati kwayiye, “Usiku walelo unkagona kunyumba kwangu, ndapagali kale kwa Rakelo mamandirekisi yandabweleselewa namwana wangu.” Jakobho usiku umwewo adayenda kagona naye.

¹⁷ Mulungu adabva pemphelo la Liya, iye adaphata pathupi, nkubala mwana wachimuna wachishanu.

¹⁸ Liya adati, “Mulungu wandipasa mpagalo wangu, pakuti ndapeleka mulanda kwa mwamuna wangu.” Mwanayo adampasa dzina lakuti Isakari.

¹⁹ Pamwepo Liya adaphata pomwe pathupi, achibala mwana wachitanthatu.

²⁰ Liya adati, “Pakuti Mulungu wandipasa mfupo yabwino; tsapano mwamuna wangu achandilemekeza, pakuti ndam'balila wana wachimuna atanthatu.” Mwanayo adampasa dzina lakuti Zebhuluni.

²¹ Liya adazabala mwana wachikazi achimpasa dzina lakuti Dhina.

²² Mulungu adazakumbukila Rakelo, nkubva pemphelo lake, achifungula mimba yake.

²³ Rakelo adaphata pathupi achibala mwana wachimuna, iye adati, “Mulungu wachosa kunyazisiwa kwangu.”

²⁴ Mwanayo adampasa dzina lakuti Jozefi kulewa kuti, “Chawuta ngaandipase pomwe munango mwana wachimuna.”

Chibvano cha Jakobho na Labhani

²⁵ Rakelo paadabala Jozefi, Jakobho adati kwaatebzala wake Labhani, “Lekani ndiyende, ndibwelele kwathu kudziko langu.

²⁶ Ndipaseni akazi wangu nawana wangu wandidaphatila basa kwayimwe ndiyende, pakuti imwe mun'dziwa kuti ndidakuphatilani basa.”

²⁷ Koma Labhani adati, “Leka ndikuwuze, ndidabzidziwa nakulotela kuti Chawuta adandidalisa nathangwe layiwe.

²⁸ Ulewe mpagalo wawukufuna ndikupase.”

²⁹ Jakobho adati kwayiye, “Imwe mun'dziwa kukuphatilani basa kwandidachita, nabzifuwo bzanu kukhala kwabzidachita nayine.

³⁰ Pandidafika pano, mukhana bzifuwo bzing'ono-ng'ono, koma bzidazawanda. Chawuta adakudalisani nathangwe layine. Tsono ine nin'zaseyenzelambo lini nyumba yangu?”

³¹ Labhani adati, “Ko ndikupase chinyi?” Jakobho adati, “Palibe chamungandipase, koma mukandichitila ibzi, nimpitiliza kukubusilani mabila yanu;

³² Koma ine lelo lekani ndipitemo mumabila yanu, ndichosemo mabila yentse yamawala-mawala nayamadodo-madodo namapsipa nambuzi zamadodo-madodo nazamawala-mawala, bzimwebzi ndibzo bzikhale mpagalo wangu.

³³ Kukhulupilika kwangu kun'zawoneka patsogolo, pamun'zabwela kuzanyangana mpagalo wangu. Mbuzi zentse zin'zawoneka zilibe mawala, namabila mapsipa, bzikazawoneka nayine, mun'zadziwa kuti ndidakubelani.”

³⁴ Labhani adati, “Bzili bwino! Ngabzichitike ninga bzawalewa.”

³⁵ Koma ntsiku imweyo Labhani adachosa mbuzi zikono zikhana mitsetse-mitsetse nazamadodo-madodo, nambuzi zikazi zikhana mawala-mawala nazamadodo-madodo, nazentse zikhana mawala machena, namabila yentse mapsipa, achibzipasa wana wake,

³⁶ achiwayendesa kuwulendo wa ntsiku zitatu. Pamwepo Jakobho adasala achibusa mabila ya Labhani yakhadasala.

³⁷ Jakobho adatola tumiti tuwisi twamupopula natwamualimondi natwamupuleni, akhati apa wakwatula apa wasiya apa wakwatula apa wasiya, kuwonesa magamba machena patumitito.

³⁸ Adayikha tumitito twaadakwatula mukhamwela mabila, pakuti kumweko ndiko kukhakwililana mabila, payakhabwela kuzamwa madzi,

³⁹ mabilayo payakhakwililana patsogolo patumitito, mabilayo yadayamba kubala wana wamitsetse-mitsetse nawamawala-mawala nawamadodo-madodo.

⁴⁰ Jakobho adapatula mabila makazi nambuzi zikazi pazikhakwililiwa, akhabzinyanganisa kumabila ya Labhani yamitsetse-mitsetse, nayentse mapsipa, kuchitila kuti yazabale wana wamitsetse nawamadodo-madodo. Nakutenepa Jakobho adachitambo mabila yake, achiyayikha payokha.

⁴¹ Mabila yakulimba payakhafika pafupi nakubala, Jakobho akayikha tumiti patsogolo pamabilayo kuti yakwililane nkati mwatumitito, kuti yabale,

⁴² koma yale zakuvuwa akhayapitisa lini mule mukhana tumitito, nakutenepo yentse mabila yakuvuwa yakhali ya Labhani, yakulimba yakhali ya Jakobho.

⁴³ Nakutenepo Jakobho adakhupuka kwene-kwene, adawa namabila mazinji naalanda wachimuna nawachikazi nangamela namadhonki.