Kuyamba 3 - Bhukhu la Kuyamba

Kutaza kwamunthu

¹ Tsapano nyoka ikhadachenjela kuposa nyama zentse zan'thengo zidalengewa na Chawuta Mulungu. Iyo idati kwankazi, “Ko Mulungu adalewa kuti, ‘Leka kudya michelo yamiti yam'munda muno?’ ”

² Nkazi adati kwanyokayo, “Michelo yamiti yam'munda muno tingadye,

³ koma Mulungu adati, ‘N'chelo wamuti uli pakati pamunda tileke kuwudya panango kuwuphata, tikawudya tin'zafa.’ ”

⁴ Koma nyokayo idati kwankaziyo, “Mun'zafa lini.

⁵ Pakuti Mulungu an'dziwa kuti, mukawudya maso yanu yan'zafunguka, mun'zalingana na Mulungu, kudziwa chabwino nachakuyipa.”

⁶ Nkaziyo paadawona kuti mutiwo niwabwino kudya, pomwe kuti ukhawoneka bwino m'maso, ukhachitisa kuti munthu achenjele, adatola n'chelo wamutiwo nkudya, adapasambo mwamuna wake, iyembo nkudya.

⁷ Pamwepo maso yawo wentse ali awili yadafunguka, adadziwa kuti akhali pezi, adabzisonela masamba yamuti wankuyu nkubvala.

⁸ Iwo adabva n'jinchi wa Chawuta Mulungu achifamba-famba m'munda nthawe yakujenjelela chakumawulo, munthu nankazi wake adabisala Chawuta Mulungu nkati mwamiti yam'munda.

⁹ Koma Chawuta Mulungu adachemela munthuyo nkuti kwayiye, “Uli kuponi?”

¹⁰ Iye adati, “Ndabva kufamba-famba kwamukhachita m'munda, ndikhagopa, nathangwe lakuti ndikhali pezi, ndipo pandabisala.”

¹¹ Mulungu adati, “Mbani wakuwuza kuti uli pezi, ko wadya nchelo wamuti wandidakuwuza kuti uleke kudya?”

¹² Munthuyo adati, “Nkazi wamudandipasa ndiye adandipasa n'chelo wamutiwo, ine ndidadya.”

¹³ Pamwepo Chawuta Mulungu adati kwankaziyo, “Ko nchinyi ichi chawachita?” Nkazi adati, “Nyoka ndiyo yandipumphsa, ndipo pandadya.”

Kulangiwa kwamunthu na Mulungu

¹⁴ Pamwepo Chawuta Mulungu adati kwanyoka, “Nathangwe labzawachitabzi, iwe watembelelewa kuposa bzifuwo bzentse, pomwe kuposa bzilombo bzentse bzan'thengo. Un'zafamba uchikwawa namimba yako, un'zadya pfumbi, nthawe yentse yawumoyo wako.

¹⁵ Nin'zayikha chizondo pakati payiwe nankazi, pakati pawana wake nawana wako. An'zaphwanya nsolo wako, iwe un'zaluma chithatha chake.”

¹⁶ Kwankazi adati, “Nin'zathimiza kuwawiwa panthawe yawumphata pathupi, napanthawe yawun'zabala wana, koma un'zakhala uchifuna mwamuna wako, iye an'zakutonga.”

¹⁷ Kwa Adhamu adati, “Nathangwe lakutetekela fala lankazi wako, pomwe nakuti udadya n'chelo wamuti wandidakuwuza kuti, ‘Leke kuwudya,’ dziko latembelelewa thangwe layiwe, un'zashupika kwene-kwene kuti uwone chakudya chinchoka m'mwemo, ntsiku zawumoyo wako wentse.

¹⁸ Dziko lin'zakumelela minga nancheso, iwe un'zadya chakudya chan'thengo.

¹⁹ Mukaluma yapamaso pako ndimo mun'zachoka chakudya chako, kufikila wabwelela pantsi, pakuti ndiko kwawudatolewa, ndiwe dongo, un'zabwelela kudongo.”

²⁰ Munthu adapasa nkazi wake dzina lakuti Eva, pakuti ndiye akhali amayi wawanthu wentse wamoyo.

²¹ Chawuta Mulungu adakonzela Adhamu nankazi wake chakubvala chamakanda, nkuwabvadzika.

Adhamu na Eva an'chosewa m'munda

²² Tsapano Chawuta Mulungu adati, “Wonani, munthu walingana nayise, waakudziwa chabwino nachakuyipa. Anfunika lini kubvumiziwa kuchela n'chelo wamuti umpasa umoyo unsaya kumala achiwudya achikhala wamoyo kufika lini nalini.”

²³ Nakutenepo Chawuta Mulungu adachosa munthu m'munda wa Edheni, kuti akalime pantsi paadachoka.

²⁴ Iye adachosa munthuyo, nkuyikha makherubhi nabhemba likhang'ayima chakumabveladzuwa kwamunda wa Edheni, kuchichinjiliza njila ikhayenda kumuti wawumoyo.