Kuyamba 29 - Bhukhu la Kuyamba

Jakobho anfika m'muyi mwa Labhani

¹ Pamwepo Jakobho adayenda ulendo wake, nkufika mudziko lawanthu wakumabveladzuwa.

² Paadanyangana adawona n'chela m'munda, adawona mititi mitatu yamabila yakhadagona pambali, pakuti pan'chela umwewo ndipo pakamwela mabila. Koma mwala wachilemela ukhadafunga pamulomo wan'chelawo ukhali ukulu.

³ Anyakabusa paakhakocheza mabila yawo pan'chelawo, ndipo paakhachosa mwalawo achimwesa mabila yawo, achibwezela mwalawo pomwe pan'chela.

⁴ Jakobho adati kwayiwo, “Abale wangu mukuchoka kuponi?” Iwo adati, “Tikuchoka ku Harani.”

⁵ Jakobho adazati kwayiwo, “Ko mungadziweko Labhani mwana wa Nahori?” Anyakabusawo adati, “Tinimudziwa.”

⁶ Jakobho adazati, “Ko iye ali bwino.” Iwo adati, “Yinde iye ali bwino, wonani mwana wake Rakelo ndiye uyo ali kubwela namabila!”

⁷ Jakobho adati, “Wonani, pakuti yachali masikati, nthawe yakukocheza bzifuwo inati yakwana, mwesani mabila yanu muyende mukayadyese.”

⁸ Koma iwo adati, “Tingakwanise lini kufikila mabila yentse yakochela pabodzi, mwala wakungulusiwa pamulomo wan'chela; pamwepo tingamwese mabila.”

⁹ Jakobho paakhali kulewa-lewa naanyakabusawo, Rakelo adafika namabila yaapayi wake, pakuti ndiye akhali nyakabusa wayene.

¹⁰ Tsapano Jakobho paadawona Rakelo mwana wachikazi wa Labhani, mano waamayi wake namabila ya Labhani, Jakobho adayenda kakungulusa mwala ukhali pan'chela nkumwesa mabila ya Labhani mano waamayi wake.

¹¹ Pamwepo Jakobho adam'psoda Rakelo nkuyamba kulila kwakukondwa.

¹² Jakobho adati kwa Rakelo, “Ndine mwana wa Rabheka nana waapayi wako.” Rakelo adathamanga kunyumba achikawuza apayi wake, Labhani.

¹³ Labhani paadandobva mpfeso za Jakobho, mwana wanana wake, adathamanga kachungulana naye. Labhani paadafika pakhana nz'ukulu wake Jakobho adamukumbatila achimuphsoda. Adatola Jakobho achiyenda naye kunyumba kwake. Pamwepo Jakobho adalongosolela Labhani bzikhadachitika,

¹⁴ Labhani adati kwayiye, “N'chadidi, iwe ndiwe wabondo langu nawanyama yangu!” Jakobho adakhala na Labhani kwamwezi.

Jakobho am'phata basa kuti apasiwe Rakelo na Liya

¹⁵ Labhani adati kwa Jakobho, “Pakuti ndiwe m'bale wangu, ko ungandiphatile basa palibe mpagalo? Ndiwuze mpagalo wawungafune?”

¹⁶ Tsapano Labhani akhana wana awili wachikazi; dzina lankulu likhali Liya, dzina lamung'ono likhali Rakelo.

¹⁷ Maso ya Liya yakhali yakuthima, koma Rakelo akhadakoma wathupi labwino.

¹⁸ Jakobho adafuna Rakelo; iye adati, “Ninkuphatilani basa kwamagole manomwe muchizandipasa Rakelo mwana wanu mung'ono.”

¹⁹ Pamwepo Labhani adati, “Bzili bwino kuti ndimpeleke kwayiwe pana kuti ndimpeleke kwamunangombo munthu bzake, tsapano iwe khala nayine pano.”

²⁰ Nakutenepo Jakobho adaphata basa kwamagole manomwe kuti apasiwe Rakelo, kwayiye magole manomweyo yakhadandolingana nantsiku zing'ono-ng'ono pakuti akhafuna Rakelo kwene-kwene.

²¹ Pamwepo Jakobho adati kwa Labhani, “Ndipaseni nkazi wangu ndipite naye panyumba pakuti ntsiku zatidabvana zakwana.”

²² Labhani adazakocheza wanthu wentse akhali pafupi naye, achichita feshita.

²³ Usiku umwewo Labhani adapeleka Liya kwa Jakobho, Jakobho nkudziwana naye.

²⁴ Labhani adapeleka mulanda wake Zilipa kwa Liya kuti akhale nyabasa wake.

²⁵ Machibese Jakobho adazadziwa kuti wagona na Liya, iye adati kwa Labhani, “N'chinyi chamwachita kwayine? Ko ine sindidaphatila basa Rakelo? Ko thangwe lanyi mwandinamiza tenepa?”

²⁶ Labhani adati kwayiye, “Ntemo wathu ise tiniyamba lini kulooza mung'ono nkulu anati waloodwa.

²⁷ Maliza sondo yawuyu, nin'zakupasa pomwe munango wache, wawun'azaphatila basa kwamagole yanango manomwe.”

²⁸ Jakobho adachita tenepo, adamaliza sondo ya Liya; pamwepo Labhani adampasa mwana wake Rakelo kuti akhale nkazi wake.

²⁹ Labhani adapeleka mulanda wake Bhiliha kwa Rakelo kuti ambam'phatila basa.

³⁰ Nakutenepo Jakobho adazadziwana na Rakelo, adamufuna kuposa Liya. Adazaphatila pomwe basa Labhani kwamagole yanango manomwe.

Jakobho am'baliliwa wana

³¹ Chawuta paadawona kuti Liya akhafuniwa lini, adafungula mimba yake; koma Rakelo akhalibe mbeleko.

³² Liya adaphata pathupi achibala mwana wachimuna achimpasa dzina lakuti Rubheni, pakuti iye adati, “Pakuti Chawuta wawona kushupika kwangu; chadidi mwamuna wangu ati andifunembo.”

³³ Liya adaphata pathupi nkubala pomwe munango mwana wachimuna, iye adati, “Chawuta wandipasa pomwe munango mwana, pakuti adabva kuti nin'zondewa, wandipasa pomwe mwana uyu, achimpasa dzina lakuti Simiyoni.”

³⁴ Adazaphata pathupi pomwe, iye adati, “Ulendo uno mwamuna wangu ati andifunembo, pakuti ndam'balila wana atatu, mwanayo adampasa dzina lakuti Levi.”

³⁵ Liya adaphata pathupi pomwe nkubala mwana wachimuna, iye nkuti, “Ulendo uno nin'zadumbiza Chawuta.” Nakutenepo mwanayo adampasa dzina lakuti Judha, pamwepo adayima kubala.