Kuyamba 25 - Bhukhu la Kuyamba

M'badwe unango wa Abhurahamu

¹ Abhurahamu adaloola munango nkazi, dzina lake akhachitiwa Ketura.

² Ketura adam'balila, Zimurani na Jokishani na Medhani na Midhiyani na Ishibhagi na Shuwa.

³ Jokishani akhali apayi wa Shebha na Dhedhani. Wana wa Dhedhani akhali Ashurimu na Letushimu na Lewumimu.

⁴ Wana wa Midhiyani akhali Efa na Eferi na Hanoki na Abhidha na Elidha. Awa wentse akhali wana wa Ketura.

⁵ Abhurahamu adapasa mwana wake Isaki bzentse bzaakhanabzo.

⁶ Koma kwawana wankazi wapambali, Abhurahamu adaapasa mpfupo. Iye paakhachana moyo adaachosa pakhana mwana wake Isaki achiwayendesa kudziko lakumabveladzuwa.

Kufa kwa Abhurahamu nakuyikhiwa kwake

⁷ Abhurahamu adalalama padziko kwamagole dzana namakumi manomwe namashanu (175).

⁸ Pamwepo Abhurahamu adazamalizika watokalambilatu, nkhalamba yamagole mazinji, adayikhiwa kudayikhiwa wam'badwe wake.

⁹ Isaki na Ishimayeli, wana wake adamuyikha mumphako yapa Makipela, m'munda wa Efuroni mwana wa Zohari mu Hiti, chakumabveladzuwa kwa Mamure,

¹⁰ m'munda waadagula Abhurahamu kwa Efuroni mwana wa Zohari mu Hiti. Abhurahamu nankazi wake Sara adayikhiwa pamwepo.

¹¹ Pambuyo pakufa kwa Abhurahamu. Mulungu adadalisa mwana wake Isaki, Isaki adakhala pa Bheeri-lahayi-royi.

M'badwe wa Ishimayeli

¹² Uwu ndiwo m'badwe wa Ishimayeli, mwana wa Abhurahamu waadabaliliwa na Hagari mu Ijipiti, ule akhali mulanda wa Sara.

¹³ Aya ndiyo madzina yawana wa Ishimayeli. M'badwe umwewu udapasiwa madzina kuteyeza kubadwa kwawo; mwana wakuyamba wa Ishimayeli akhali Nebhayoti, kuchizabwela Kedhari na Adhibheyeli na Mibhusamu,

¹⁴ na Mishima na Dhuma na Masa,

¹⁵ na Hadhadhi na Tema na Jeturi na Nafishi na Kedhima.

¹⁶ Awa ndiwo wana wa Ishimayeli, aya ndiyo madzina yawo, kuteyeza miyi yawo, namatenti yawo, anemwanamambo khumi namawili kuteyeza madzinza yawo.

¹⁷ Ishimayeli adakhala kwamagole dzana namakumi matatu nanomwe (137), adamalizika achikayikhiwa kudayikhiwa wakwake.

¹⁸ Iwo adakhala kuchoka Havila kufika ku Shuri, ikhadanyanganana na Ijipiti, kumbali ya Asiriya; adakhala adanyanganana naabale wake wentse.

Kubaliwa kwa Esau na Jakobho

¹⁹ Uwu ndiwo m'badwe wa Isaki mwana wa Abhurahamu: Abhurahamu akhali apayi wa Isaki.

²⁰ Isaki akhana magole makumi manayi (40), paadaloola nkazi wake Rabheka mwana wa Bhetuyeli mu Aramu waku Padhaniaramu, nana wa Labhani mu Aramu.

²¹ Isaki adapemphela kwa Chawuta achikumbilila nkazi wake Rabheka, pakuti akhalibe mbeleko. Chawuta adabva pemphelo la Isaki, Rabheka nkuphata pathupi.

²² Wana adashupana m'mimba mwake, iye adati, “Tsono peno ntenepa chanin'khalila wamoyo n'chinyi?” Nakutenepo adazayenda kabvunza Chawuta.

²³ Chawuta adati kwayiye, “M'mimba mwako muna mishowo miwili, wanthu awili, wawun'zabala an'zakhala wakugawika. Munango an'zakhala wamphamvu kuposa munango, nkulu an'zatumikila mung'ono.”

²⁴ Nthawe yakubala kwake payidafika, adabala mapasa.

²⁵ Wakuyamba adabula ali wakuphsukuluka, thupi lake lentse likhadachita ninga n'khanjo wawukuse, achimpasa dzina lakuti Esau.

²⁶ Pambuyo pache padabula m'bale wake adaphata chithatha cha Esau, achimpasa dzina lakuti Jakobho. Isaki nthawe yaadabala wana amwewo akhana magole makumi matanthatu (60).

Esau an'gulisa ukulu wake wawumwana wakuyamba

²⁷ Wana amwewo adakula, Esau adakhala nkhumbalume nyabezi, munthu wan'thengo, Jakobho akhali munthu wakunyamala, akhafuna bzakukhala pamatenti.

²⁸ Isaki adafuna Esau, pakuti akhafuna kudya nyama yan'thengo yakham'bwelesela, koma Rabheka adafuna Jakobho.

²⁹ Ntsiku inango Jakobho paakhaphika phala, Esau adafika achichoka n'thengo wafa nanjala.

³⁰ Esau adati kwa Jakobho, “Leka ndidyeko phala lifuyila, pakuti ndikubva njala.” Ndibzo bzidazachitisa kuti achemelewe nadzina lakuti Edhomu.

³¹ Jakobho adati, “Yamba wandigulisila ukulu wako.”

³² Esau adati, “Pakuti ine ndaakufa nanjala, ukulu un'thandizanyi?”

³³ Jakobho adati, “Tsapano yamba walumbila kwayine.” Nakutenepo iye adalumbila kwayiye, adagulisila ukulu wake kwa Jakobho.

³⁴ Pamwepo Jakobho adapasa Esau zingwa naphala lanyemba, adadya nakumwa, adayenda ulendo wake. Ndiko kudzonga kudachita Esau ukulu wake.