Kuyamba 2 - Bhukhu la Kuyamba

¹ Nakutenepo dzulu napantsi bzidamala, nabzentse bzikhali m'mwemo.

² Ntsiku yachinomwe Mulungu adamaliza basa laakhachita, adapuma ntsiku yachinomwe kuphata basa lentse laadachita.

³ Nakutenepo Mulungu adadalisa ntsiku yachinomwe nkuyichita ntsiku yakuyela, nathangwe limwelo Mulungu adadalisa basa lentse laadachita lakulenga.

⁴ Uwu ndiwo m'mbadwe wakudzulu nawapantsi waadalenga. Ndiyo ntsiku Chawuta Mulungu yaadalenga kudzulu napantsi,

Munda wa Edheni

⁵ miti yanthengo ikhanati yawapo padziko, miti yanthengo ikhanati yamela, pakuti Chawuta Mulungu akhanati wabvumbisa mvula padziko. Palibe munthu akhalima,

⁶ koma madzi yadachoka pantsi ndiyo yadatotesa padziko.

⁷ Pamwepo Chawuta Mulungu adakonza munthu nadongo lapantsi, adamufemela mpuye wamoyo m'mphuno mwake, munthu adakhala wamoyo.

⁸ Chawuta Mulungu adabzala munda chakumabveladzuwa kwa Edheni, ndimo mwaadayikha munthu waadakonzayo.

⁹ Kuchoka mudongo Chawuta Mulungu adamelesa miti ikhawoneka bwino m'maso, pomwe ikhali chakudya chabwino, muti wawumoyo udabzaliwa pakati pamundawo, namuti wakudziwa chabwino nachakuyipa.

¹⁰ Kamadzi kakhayelela kachichoka mu Edheni kachithiliza mundawo, kakhachoka m'mwemo kachipatukana kuchita tukamadzi tunayi.

¹¹ Dzina lakakuyamba likhali Pishoni, ndiko kakhayelela kachizungunuka dziko la Havila, uko kukhana golidhe,

¹² golidhe yamudziko m'mwemo niyabwino, muna minyala yabhidheliyamu naya onikisi.

¹³ Dzina lakamadzi kachiwili likhali Gihoni, ndiko kakhayelela kachizungunuka dziko lentse la Kushi.

¹⁴ Dzina lakamadzi kachitatu likhali Tigirisi, ndiko kakhayelela chakumabveladzuwa kwa Asiriya. Kamadzi kachinayi kakhali Ufuratesi.

¹⁵ Chawuta Mulungu adatola munthu nkumuyikha m'munda wa Edheni kuti alime nakuwuchengeta.

¹⁶ Chawuta Mulungu adawuza munthu kuti, “Michelo yentse yam'munda muno ungadye mwakutsudzuka,

¹⁷ koma muti umpasa nzelu zakudziwa chabwino nachakuyipa leka kudya, pakuti ntsiku yawuniwudya un'zafa.”

¹⁸ Pamwepo Chawuta Mulungu adati, “M'bzabwino lini kuti munthu akhale ali yekha. Ninimukonzela nthandizi aniyendelana nayiye.”

¹⁹ Nakutenepo Chawuta Mulungu adatola dongo nkukonza nalo bzilombo bzakusiyana-siyana bzan'thengo nambalami zentse zan'dzulu. Adabzibwelesa kwa munthu kuti abzipase madzina.

²⁰ Munthuyo adapasa madzina bzifuwo bzentse, nambalami zentse zan'dzulu, nabzilombo bzentse bzan'thengo. Koma munthu akhanati wawona nthandizi akhayendelana nayiye.

²¹ Nakutenepo Chawuta Mulungu adachita kuti munthuyo agone tulo twakufa, paakhadagona tenepo iye adatola mbabvu yake ibodzi nkubwezapo pomwe nyama yake,

²² mbabvu imweyo yaadatola Chawuta Mulungu pamunthuyo ndiyo yaadakonza nayo nkazi, nkumpeleka kwamunthu.

²³ Pamwepo munthu adati, “Uyu tsapano ndiye bondo lamabondo yangu, nyama yanyama yangu. Iye an'zachemelewa kuti ‘Nkazi’, pakuti adachoka pamunthu.”

²⁴ Nakutenepo, mwamuna an'zasiya apayi wake naamayi wake, achimamatila kunkazi wake, achikhala nyama ibodzi.

²⁵ Pamwepo munthu nankazi wake wentse akhalibe kubvala, koma akhabva lini manyazi.