Kuyamba 18 - Bhukhu la Kuyamba

Abhurahamu antsimikiziwa mwana

¹ Chawuta adabziwonesa kwa Abhurahamu paakhali pamiti yamioki yaku Mamure, paakhadakhala pansuwo watenti yake, dzuwa lichipsa.

² Adanyangana nkuwona amuna atatu adayima pafupi nayiye. Paadandowawona adathamanga achikagumana nawo, achikotama pantsi.

³ Iye adati, “Mbuye wangu, peno mwandichitila chifundo, lekani kupitilila panyumba pamulanda wanu.

⁴ Ndikupaseni madzi, musambe nzaye zanu, mungapumule bzanu nyantsi mwamuti.

⁵ Ndikuphikileni zingwa mudye, muwone mphamvu pakufamba ulendo wanu.” Pakuti mwabwelambo kwamulanda wanu, nakutenepo iwo adati, “Chita bzawalewa.”

⁶ Abhurahamu adathamangila kutende kwake, adati kwankazi wake Sara, “Uchite bzakukulumiza, utakule mphimo zitatu zawufa wakunyodoka, ukanye uphike zingwa.”

⁷ Abhurahamu adayenda kuthanga labzifuwo bzake, adasankhula chimwana chang'ombe chakunenepa chabwino, achichipasa mulanda wake kuti akulumize kukonza.

⁸ Adatola khilimu, nankaka nanyama achibzipasa amunawo, iye nkuyima pana iwo munyantsi mwamuti iwo paakhadya.

⁹ Amunawo adazati kwa Abhurahamu, “Ko nkazi wako Sara ali kuponi?” Iye adati, “Ali mutenti.”

¹⁰ Chawuta adati, “Nin'zabwelela kwayiwe muchilimo, Sara nkazi wako an'zakhala namwana.” Sara akhali chakumbuyo kwatende achitetekela.

¹¹ Tsapano Abhurahamu na Sara akhadakalamba, Sara akhadayima kuyenda kumwezi.

¹² Nakutenepo Sara adaseka chamuntima, iye adati, “Pakuti ine ndakalamba, nambuya wangumbo pomwe wakalamba. Ko ine ningakomedwe nanyi?”

¹³ Chawuta adati kwa Abhurahamu, “Thangwe lanyi Sara waseka, akuti, ‘Ningachite mwana ine ndakalamba tenepa?’

¹⁴ Ko pana chintazika na Chawuta? Nthawe ikakwana panin'zabwelela muchilimo, Sara an'zakhala namwana wachimuna.”

¹⁵ Koma Sara adalamba, adati, “Ndilibe kuseka,” Pakuti akhagopa. Iye adati, “Nee, iwe waseka.”

Abhurahamu ampemphelela Sodhomu

¹⁶ Amunawo adachoka pamwepo, nkulungama ku Sodhomu, Abhurahamu nkuwapelekeza.

¹⁷ Pamwepo Chawuta adati, “Ningabisile Abhurahamu bzandikuyenda kachita ku Sodhomu,

¹⁸ ndichidziwa kuti Abhurahamu an'zakhala nshowo ukulu waphamvu, mishowo yentse yadziko lapantsi in'zabzidalisa nayiye.

¹⁹ Ningachite lini tenepo, pakuti ndidamusankhula kuti azawuze wana wake nam'badwe wake kuteyeza njila za Chawuta, pakuchita chilungamo nakulinganiza; kuchitila kuti Chawuta azachite kwa Abhurahamu bzaadamutsimisa.”

²⁰ Nakutenepo Chawuta adati kwa Abhurahamu, “Kulila kudanyanganana na Sodhomu na Gomora kwakula, pomwe chitazo chawo chakula kwene-kwene,

²¹ nakutenepo nim'buluka ndikawone panango akuchita bziniyendelana nakulila kwandidabva, peno nee ninkadziwa.”

²² Amuna awiliwo adachoka pamwepo nkulungama ku Sodhomu, koma Abhurahamu adasala adayima patsogolo pa Chawuta.

²³ Pamwepo Abhurahamu adafendela pafupi na Chawuta, nkuti, “Ko n'chadidi kuti mukuyenda kapha wanthu wakulungama pabodzi nawakuyipa?

²⁴ Ko peno muna wanthu wakulungama makumi mashanu (50) muguta, munkacheneka guta lentse, muchileka kalisiya nathangwe lawanthu makumi mashanu (50) wakulungama ali m'mwemo?

²⁵ Mungachite lini tenepo, kuphela kubodzi wakulungama nawakuyipa! Kuchita kuti wakulungama awoneke ninga wakuyipa pomwe! Mungachite lini tenepo! Ko ntongi wadziko lapantsi lentse anfunika lini kutonga bzabwino?”

²⁶ Chawuta adati, “Ndikawona mu Sodhomu muna wanthu makumi mashanu (50) wakulungama ninkaphwanya lini gutalo nathangwe lawanthu amwewo.”

²⁷ Abhurahamu adati, “Ndabzichitisa ndekha kulewa-lewa nayimwe Chawuta, ne ndingakhale munthu wakukonzewa nadongo nadotha.

²⁸ Ko peno pankasayika ashanu wakulungama pamakumi mashanu (50), munkaphwanya gutalo thangwe lakuti pasayika ashanu?” Iye adati, “Ninkaliphwanya lini ndikakawona muna makumi manayi naashanu” (45.)

²⁹ Abhurahamu adabvunza pomwe, nkuti, “Ko peno munkawona muna makumi manayi” (40.) Iye adati, “Ninkaliphwanya lini ndikakawona muna wanthu makumi manayi (40) wakulungama.”

³⁰ Abhurahamu adati, “Ndaphatha minyendo lekani kukalipa, ninfuna kubvunza pomwe Mfumu, ko pakachita wanthu wabwino makumi matatu” (30?) Iye adati, “Ninkaliphwanya lini ndikakawona muna wanthu makumi matatu” (30.)

³¹ Abhurahamu adati, “Wonani, Mfumu ndabzichitisa ndekha kulewa-lewa nayimwe. Ko munkawona muna wanthu wabwino makumi mawili” (20?) Iye adati, “Ndikakawona muna wanthu makumi mawili (20) wakukhulupilika ninkaphwanya lini gutalo.”

³² Abhurahamu adati, “Mfumu lekani kukalipa pakuti ninfuna kukubvunzani pomwe, ko mukakawona muna wanthu khumi?” Iye adati, “Nathangwe lawanthu khumi niniliphwanya lini.”

³³ Chawuta paadamala kulewa-lewa na Abhurahamu adayenda, Abhurahamu nkubwelela kumbuto kwake.