Kuyamba 16 - Bhukhu la Kuyamba

Hagari na Ishimayeli

¹ Tsapano Sarayi nkazi wa Abhuramu alibe kum'balila mwana, koma akhana mulanda wake wachikazi wanshowo wachi Ijipiti akhachitiwa Hagari.

² Sarayi adati kwa Abhuramu, “Wona, Chawuta adandichita kuti ndileke kubala wana. Yenda ukagone namulanda wangu panango angandibalile wana.” Abhuramu adabvuma bzidalewedwa na Sarayi.

³ Nakutenepo, Abhuramu paadakhala magole khumi mudziko la Kenani, Sarayi nkazi wa Abhuramu adatola Hagari mu Ijipiti, mulanda wake, nkumpeleka kwa Abhuramu mwamuna wake kukhala nkazi wake.

⁴ Abhuramu adagona na Hagari, iye nkuphata pathupi. Hagari paadadziwa kuti wawa napathupi adayamba kunyoza mbuya wake.

⁵ Pamwepo Sarayi adati kwa Abhuramu, “Ndiwe ukuchitisa kuti ndisawusiwe tenepa. Ndidakupasa mulanda wangu kuti awe nkazi wako, koma iye paadadziwa kuti waphata pathupi adayamba kundinyoza.” Nakutenepo Chawuta ngaatonge pakati payiwe nayine!

⁶ Abhuramu adati kwa Sarayi, “Wona, Hagari nimulanda wako ndiwe unimutonga, ungachite kwayiye bzawakumbuka.” Tsapano Sarayi adazaphata Hagari mwadima, mpaka iye adazathawa.

⁷ Ngilozi ya Chawuta idamuwona pantsantsa yamadzi muchipululu, ntsantsa ikhali pafupi nanjila ikhayenda ku Shuri.

⁸ Iyo idati, “Hagari mulanda wa Sarayi, ukuchoka kuponi pomwe ukuyenda kuponi?” Hagari adati, “Ndikuthawa mbuya wangu Sarayi.”

⁹ Ngilozi ya Chawuta idati kwayiye, “Bwelela kwambuya wako ukabzichepese kwayiye.”

¹⁰ Ngilozi ya Chawuta idazati pomwe kwa Hagari, “Nin'zawandisa m'badwe wako bzakusaya kuwelengeka.”

¹¹ Pamwepo ngilozi ya Chawuta idati, “Wona, iwe una pathupi, un'zabala mwana wachimuna wawun'zapasa dzina lakuti Ishimayeli, pakuti Chawuta wabva kulila kwako.

¹² An'zakhala dhonki lanthengo chayilo lamunthu, an'zakhala achishupana nawanthu wentse, pomwe wanthu wentse achishupana nayiye, an'zakhala pambuto idanyanganana naabale wake.”

¹³ Hagari adapasa dzina Chawuta uyo waadalewa-lewa naye lakuti, “Imwe ndimwe Mulungu aniwona.” Iye adati, “Ndawona Mulungu, koma ndilibe kufa.”

¹⁴ Nakutenepo n'chela umwewo adawupasa dzina lakuti Bheeri-lahayi-royi, n'chelawo uli pakati pa Kadheshi na Bheredhi.

¹⁵ Hagari adabalila Abhuramu mwana wachimuna. Abhuramu adapasa mwanayo waadabaliliwa na Hagari dzina lakuti Ishimayeli.

¹⁶ Abhuramu akhana magole makumi masele namatanthatu (86), Hagari paadam'balila Ishimayeli.