Kuyamba 13 - Bhukhu la Kuyamba

Kupatukana kwa Abhuramu na Loti

¹ Abhuramu adachoka mu Ijipiti, iye nankazi wake nabzentse bzaakhanabzo pabodzi na Loti nkuyenda ku Negebhu.

² Abhuramu akhadakhupuka kwene-kwene, pabzifuwo nasiliva nagolidhe.

³ Adachoka mu Negebhu nkuyenda mpaka adazafika ku Bheteli, kwaadambazika matenti yake pakuyamba, pakati pa Bheteli na Ayi,

⁴ pambuto yaakhadambamanga mbuto yakupelekela ntsembe pakuyamba, kumweko Abhuramu adachemela dzina la Chawuta.

⁵ Loti uyo adayenda na Abhuramu, akhalimbo pomwe namabila nang'ombe namatenti.

⁶ Nakutenepo mbuto imweyo ikhakwana lini kuti akhale pabodzi. Bzinthu bzawo bzikhali bzizinji kwene-kwene, bzikhakwanisika lini kuti akhale pabodzi,

⁷ pomwe anyakabusa wabzifuwo bza Abhuramu na Loti adayamba kushupana. Nthawe imweyo a Kenani naa Perezi akhakhala mudziko limwelo.

⁸ Abhuramu adati kwa Loti, “Anyakabusa wako nawangu ngaaleke kushupana, pakuti ndise wanthu wachibale.

⁹ Ko dziko sindilo lentse lawuli kuwona? Nakutenepo iwe nayine ngatipatukane. Iwe ukayenda kujanja lamanzele, ine niniyenda kujanja ladidi.”

¹⁰ Loti adanyangana nkuwona kuti muchigowa chamu Jorodhani, kufika ku Zoari kukhana madzi mazinji pentse-pentse ninga munda wa Chawuta, ninga bzikhadachita dziko la Ijipiti. Nthawe imweyo Chawuta akhanati waphwanya Sodhomu na Gomora.

¹¹ Nakutenepo Loti adasankhula chigowa chentse chamu Jorodhani, iye adazayenda kakhala kumabveladzuwa. Ndiko kupatukana kwaadachita awa awili.

¹² Abhuramu adakhala mudziko la Kenani, koma Loti adakhala pakati pamaguta yakhali muchigowa, adazika matenti yake pafupi na Sodhomu.

¹³ Tsapano wanthu waku Sodhomu akhali wakuyipa, wakuyipa akulu pamaso pa Chawuta.

Abhuramu aniyenda ku Hebhuroni

¹⁴ Chawuta adati kwa Abhuramu, pambuyo pakupatukana na Loti, “Nyangana, uwone kuchoka pambuto pawuli, chakudzulu nachakunyantsi, chakumabveladzuwa nachakumadokelo,

¹⁵ pakuti dziko lawukuwona nin'zalipeleka kwayiwe, nakukum'badwe wako kufika lini nalini.

¹⁶ Nin'zachita kuti m'badwe wako uwande ninga pfumbi lapadziko, kuti peno munthu ankwanisa kuwelenga pfumbi lapadziko lapantsi, m'mbadwe wakombo un'zakwanisa kuwelengeka.

¹⁷ Sumuka, famba muwutali namuwufupi mwadziko, pakuti ninilipeleka kwayiwe.”

¹⁸ Nakutenepo Abhuramu adachosa matenti yake achiyenda kakhala pamioki yapa Mamure mu Hebhuroni, kumweko adamangila Chawuta mbuto yakupelekela ntsembe.