Kuyamba 12 - Bhukhu la Kuyamba

Abhuramu an'chemelewa na Mulungu

¹ Chawuta adati kwa Abhuramu, “Choka mudziko lako, pakati paabale wako, uchoke panyumba yaapayi wako, uyende kudziko landichakuwonesa.

² Nin'zakuchita nshowo ukulu, pomwe nin'zakudalisa, nin'zachita kuti dzina lako likhale nambili, nakutenepo iwe un'zakhala daliso.

³ Nin'zadalisa ankudalisa, Nin'zatembelela ankutembelela. Mabanja yentse yapadziko yan'zakhala yakudalisiwa thangwe layiwe.”

⁴ Nakutenepo Abhuramu adayenda, ninga kuwuziwa kwaakhadachitiwa na Chawuta, adayenda pabodzi na Loti, Abhuramu paadachoka mu Harani akhana magole makumi manomwe nashanu (75).

⁵ Abhuramu adatola nkazi wake Sarayi na Loti mwana wam'bale wake, nachuma chake chentse chaakhanacho, naalanda waadawona mu Harani nkuyenda ku Kenani. Paadafika mu Kenani,

⁶ Abhuramu adapita namudziko m'mwemo achikakhala ku Shekemu pamuti ukulu wamuoki waku More. Nthawe imweyo a Kenani akhali mudziko limwelo.

⁷ Chawuta adabziwonesa kwa Abhuramu, adati kwayiye, “Dziko limweli ndichalipeleka kum'badwe wako.” Nakutenepo Abhuramu adamangila mbuto yakupelekela ntsembe Chawuta uyo adambabziwonesa kwayiye.

⁸ Adachoka pamwepo nkuyenda kuphili, chakumabveladzuwa kwaguta la Bheteli, kwaadakazika matenti yake. Bheteli likhali chakumadokelo, guta la Ayi likhali chakumabveladzuwa. Kumweko Adamangila Chawuta mbuto yakupelekela ntsembe, adachemela dzina la Chawuta.

⁹ Abhuramu adapitiliza ulendo wake mpaka adafika ku Negebhu.

Abhuramu mudziko la Ijipiti

¹⁰ Tsapano mudziko la Kenani mudagwa njala. Nakutenepo Abhuramu adayenda kakhala ku Ijipiti, pakuti njala ikhadakula mudziko.

¹¹ Paakhali pafupi kufika mu Ijipiti, iye adati kwankazi wake Sarayi, “Pakuti iwe ndiwe nkazi wabwino kwene-kwe,

¹² a Ijipiti akakuwona, iwo ankati, ‘Uyu ninkazi wake,’ ankandipha iwe achikusiya uli wamoyo.

¹³ Tsapano iwe ukaawuze kuti ndiwe nana wangu, ukatenepo iwo ankandipha lini, ankandichitila bwino thangwe layiwe.”

¹⁴ Abhuramu paadapita mu Ijipiti, wanthu wamu Ijipiti adawona kuti nkaziyo akhali wabwino.

¹⁵ Manduna yamambo Farawo paadamuwona, adadumbiza kwamambo Farawo kukoma nkhope kwaakhadachita. Nakutenepo Sarayi adazatolewa achiyendesewa kunyumba kwa mambo Farawo.

¹⁶ Tsapano Farawo adazaphata bwino Abhuramu nathangwe la Sarayi, adampasa mabila nambuzi nang'ombe namadhonki yaamuna naalanda wachimuna naalanda wachikazi nangamela.

¹⁷ Koma Chawuta adayikha mulili kwa Farawo nawamunyumba mwake, nathangwe la Sarayi nkazi wa Abhuramu.

¹⁸ Nakutenepo Farawo adazachemelesa Abhuramu, nkuti kwayiye, “Nchinyi chawachita kwayine? Thangwe lanyi ulibe kundiwuza kuti ninkazi wako?

¹⁹ Thangwe lanyi udati, ‘Ninana wako,’ nakutenepo ndidamutakula kuti akhale nkazi wangu? Tsapano, takula nkazi wako uyende naye!”

²⁰ Farawo adawuza wanthu kuti achose Abhuramu nankazi wake mudziko limwelo, nabzinthu bzake bzentse bzaakhanabzo.