Joshuwa 9 - Bhukhu la Kuyamba

Wanthu waku Gibheyoni ampumphsa Joshuwa

¹ Mazimambo yentse yakumadokelo yang'ambu ya Jorodhani, mudziko lamapili namubzigowa nawentse akhali mphepete mwanyanja ikulu ikhadanyanganana na Lebhanoni naa Amori naa Kenani naa Perezi naa Hivi naa Jebhusi, adabva bzidachitika.

² Wentse adakochezana pabodzi kumanga mpfundo ibodzi kamenyana na Joshuwa naa Izraeli.

³ Koma wanthu waku Gibheyoni adabva bzidachita Joshuwa kumaguta yaku Jeriko naku Ayi,

⁴ iwo adachita mwakuchenjela. Adatakula mbuwa pamadhonki yawo kuchita ninga atumiki akuchoka kutali. Pakuyenda ulendo wawo adatakula masakha yakung'ambika nabzikasi bzakhanda bzavinyu bzakubaduka bzakusonewa-sonewa.

⁵ Adabvala bzakubvala bzakung'ambika-ng'ambika, nashango zakusonewa-sonewa kunzayo zawo, mbuwa zawo nazingwa yawo bzikhadawuma kwene-kwene.

⁶ Tsapano adayenda kwa Joshuwa pamisasa yapa Giligali, adati kwa Joshuwa nakwawanthu wentse wa Izraeli, “Ise tachoka kudziko lakutali kwene-kwene, nakutenepo tinfuna kuchita chibvano nayimwe.”

⁷ Koma a Izraeli adati kwaa Hivi, “Panango mun'khala pakati pathu, tingachite tani chibvano nayimwe, wanthu watinsaya kudziwa kuti mun'choka kuponi?”

⁸ Iwo adati kwa Joshuwa, “Ndise alanda wanu.” Joshuwa adati kwayiwo, Ko ndimwe yani, mun'choka kuponi?

⁹ Iwo adati, “Ise alanda wanu tachoka kudziko lakutali, pakuti tidabva mbili yadzina la Chawuta Mulungu wanu, tidabva bzentse bzaadachita mu Ijipiti,

¹⁰ nabzentse bzaadachita kumazimambo mawili yaa Amori akhakhala kung'ambu kwa Jorodhani chakumabveladzuwa. Mambo Sihoni waku Heshibhoni namambo Ogi waku Bhashani akakhala mu Ashitaroti.”

¹¹ Akulu-akulu wathu nawanthu wentse wamudziko lathu adati kwayise, “Takulani mbuwa muyende ulendo mukagumane nawo, adati tikuwuzeni kuti, ‘Ise ndise alanda wanu, bwelani tichite chibvano nayimwe.’ ”

¹² “Nyanganani zingwa yathu, patidachoka nayo kwathu ninga mbuwa yathu tichibwela kuno ikhathuma, koma tsapano yawuma kwene-kwene.

¹³ Bzikasi bzathu bzakhanda bzakutakulila vinyu patidabzidzadza vinyu bzikhali bzinyowani, koma nyanganani muwone bzatong'ambika. Bzakubvala bzathu nashango zathu bzang'ambika pakuti tafamba ulendo utali.”

¹⁴ Wanthu wa Izraeli adatambila chakudya, koma alibe kubvunza mulomo wa Chawuta bzakuchita.

¹⁵ Joshuwa adayanjana nawo, nkuchita nawo chibvano achiwachita kuti akhale. Manduna yawo yagunyenye lawanthu yadalumbila kwayiwo.

¹⁶ Pakudamala ntsiku zitatu kuchoka pantsiku yaadachita chibvano nawanthu wale, a Izraeli adabva kuti wanthu waadachita nawo chibvano akhakhala nawo pafupi, achikhala pakati pawo.

¹⁷ Nakutenepo wana wa Izraeli adafuluka achikafika kumaguta yawo ntsiku yachitatu. Maguta yawo yakhali, Gibheyoni na Kefira na Bheeroti na Kiriyati-jeyarimu.

¹⁸ Koma wana wa Izraeli alibe kuwamenya, pakuti manduna yagunyenye lawanthu yakhadalumbila kwayiwo nadzina la Chawuta Mulungu wa Izraeli. Pamwepo wanthu wentse adang'ung'uzikila akulu-akulu wawo nabzankhani ikhadachitika pakati pawo.

¹⁹ Koma manduna yagunyenye yadati, “Pakuti ise tidalumbila kale nadzina la Chawuta Mulungu wa Izraeli, nakutenepo ise tinkwanisa lini kuwaphata-phata.

²⁰ Nathangwe lakulumbila kwatidachita, tin'zachita kuti iwo akhale wamoyo, pakuti ukali wa Mulungu ungatifikile.”

²¹ Manduna yadati kwayiwo, “Alekeni ali wamoyo. Nakutenepo adaaphatisa basa lakutema nkhuni nakutungila madzi gunyenye lentse lawanthu. Kuteyeza bzidalewedwa naakulu-akulu wawo.”

²² Joshuwa adaachemela nkuti kwayiwo, “Thangwe lanyi kutinamiza ise, kulewa kuti, ‘Tin'choka kutali,’ koma imwe muchikhala pakati pathu?

²³ Tsapano imwe mwatembelelewa, wanthu anango pakati panu an'zakhala alanda, wakutema nkhuni nakutunga madzi panyumba ya Mulungu wangu.”

²⁴ Iwo adadayila kwa Joshuwa, “Chadidi tidabzichita, pakuti ise alanda wanu, tidawuziwa kuti Chawuta Mulungu wanu, adawuza Mozisi mulanda wake kuti akupaseni dziko lentse, achipha wanthu wentse an'khala m'mwemo. Tsapano ise tidachita tenepo, nathangwe lakugopa kuphewa.

²⁵ Tsapano, ise tili m'manja mwanu, chitani bzabwino bzidalungama m'maso mwanu.”

²⁶ Nakutenepo Joshuwa adaapulumusa, kuchoka m'manja mwawana wa Izraeli, alibe kuzaapha.

²⁷ Koma kuyambila ntsiku imweyo, Joshuwa adaachita alanda wakutema nkhuni nakutungila madzi gunyenye lawanthu, pankochezana wanthu paatali yantsembe kwa Chawuta. Wanthu amwewa nalelo akuphata basa limwelo, pambuto zaaninga asankhula.