Joshuwa 8 - Bhukhu la Kuyamba

Kupambiwa nakuphwanyiwa kwaguta la Ayi

¹ Chawuta adati kwa Joshuwa, “Leka kugopa panango kushupika, takula wankhondo wentse wawunawo, yenda kamenye guta la Ayi. Wona, ndayikha m'manja mwako, mambo waku Ayi nawanthu wake naguta lake nadziko lake.

² Bzamudachita kuguta la Jeriko namambo walene, ndibzo bzamunkachita kuguta la Ayi namambo walene, koma sipodyo yamunkapamba m'mwemo, nabzifuwo bzikachite bzanu. Chitani bzakukalibisalila nakumbuyo kwalene.”

³ Nakutenepo Joshuwa adasumuka nawanthu wankhondo, achiyenda kuguta la Ayi. Joshuwa adasankhula amuna wamphamvu masawuzande makumi matatu, achiwatuma kuti ayende nawusiku.

⁴ Joshuwa adaawuza kuti, “Wonani, mukabisale chakumbuyo kwaguta, lekani kuyenda kutali naguta, koma mukakhale mudakonzeka.

⁵ Ine nawanthu wentse wandinawo tin'zafika paguta. Paan'zatibulila bzaadachita pakuyamba, ise tin'zaathawa.

⁶ Iwo paan'zachoka kuzatithamangisa, tin'zaayendesa kutali naguta, tikatenepo iwo an'zati, ‘Akuthawa bzaadachita pakuyamba.’

⁷ Pamwepo imwe mun'zabula mwamuninga mudabisala, muchikatola gutalo, pakuti Chawuta Mulungu wanu wayikha kale gutalo m'manja mwanu.

⁸ Mukatola guta limwelo mulitenthe namoto, kuteyeza bzidalewedwa na Chawuta, mukachite bzandikukuwuzani.”

⁹ Nakutenepo Joshuwa adaawuza kuti ayende, iwo adayenda kumbuto zawo kabisala, adakabisala pakati pa Bheteli na Ayi, chakumadokelo kwa Ayi. Koma Joshuwa usiku umwewo adagona pansasa pabodzi nawanthu wentse.

¹⁰ Mangwana yache Joshuwa adalamuka machibese-bese, nkukocheza wankhondo wake wentse naakulu-akulu wa Izraeli achiyenda kuguta la Ayi.

¹¹ Wankhondo wentse waakhanawo adayenda pabodzi na Joshuwa, adafendela pafupi naguta nkuzika matenti yawo chakudzulu kwaguta la Ayi, pakati pawo na Ayi pakhana gowa.

¹² Joshuwa adatola amuna masawuzande makumi mashanu, achiwawuza kuti akabisale pakati pa Bheteli na Ayi nachakumadokelo kwaguta.

¹³ Nakutenepo adayikha wankhondo wawo, nsasa wawo ukulu ukhali nachakudzulu kwaguta, wakumbuyo ukhali nachakumadokelo kwaguta. Joshuwa usiku umwewo adagona pakati pachigowa.

¹⁴ Mambo waku Ayi paadawona ibzi, iye nawanthu wake, nawanthu wentse wamuguta, adakulumiza kuyenda machibese-bese, kumpata wa Arabha adalungama kuchigowa cha Jorodhani kachita nkhondo naa Izraeli, koma alibe kudziwa kuti kukhana wanthu akhadakhaliliza kumbuyo kwaguta.

¹⁵ Joshuwa naa Izraeli wentse adathawila utowa, adathawila kunjila yakuchipululu kuchita ninga akundiwa.

¹⁶ Nakutenepo wanthu wentse akhali muguta la Ayi adachemelewa kuti azaathamangise. Paakhaathamangisa tenepo Joshuwa akhatowayendesa kutali naguta.

¹⁷ Palibe munthu adasala muguta la Ayi panango ku Bheteli, alibe kubula kuyenda kathamangisa a Izraeli. Iwo adasiya misuwo yamuguta idafungula, achithamangisa a Izraeli.

¹⁸ Pamwepo Chawuta adati kwa Joshuwa, “Lata dipa lili m'manja mwako ku Ayi, pakuti ndikuyikha guta limweli m'manja mwako.” Joshuwa adalata dipa laakhanalo kuguta.

¹⁹ Joshuwa paadandolata janja lake, wentse akhadabisala adabula mumbuto zawo, adakulumiza kuthamangila muguta achikalitola, achilitentha namoto.

²⁰ Nakutenepo wanthu waku Ayi paadanyangana kumbuyo adawona utsi pwititi muguta uchiyenda kudzulu, uchiyenda m'mitambo. Alibe kuzawona mphamvu zakuthawila uku panango uko, pakuti wanthu akhadathawila kuchipululu, adabwelela achiwathamangisa achiwamenya.

²¹ Joshuwa naa Izraeli waakhanawo, paadawona kuti akhadabisala atola guta, utsi waakutosumuka muguta, pamwepo iwo adabwelela nkupha wanthu waku Ayi.

²² Wanthu wa Izraeli anango akhali muguta adabula achiyamba kumenya wanthu waku Ayi, iwo adakhala pakati paa Izraeli mbali zentse uku nawuku; Izraeli adaapha kufikila kudasala kulibe ne m'bodzi wamoyo ne adathawa.

²³ Koma mambo waku Ayi adamutola wamoyo achimuyendesa kwa Joshuwa.

²⁴ Wanthu wa Izraeli paadamaliza kupha wanthu waku Ayi muchipululu mwaakhaathamangisa, adabwelela ku Ayi, achikapha namulomo wabhemba wanthu wentse akhadasala.

²⁵ Nakutenepo wanthu wentse adafa ntsiku imweyo, amuna naakazi adafika, masawuzande khumi namawili (12,000) yawanthu wentse wamu Ayi.

²⁶ Joshuwa adapitiliza kulata dipa lake ku Ayi kufika amala kucheneka wanthu wentse akhali m'mwemo.

²⁷ Wanthu wa Izraeli adapamba bzifuwo nasipodyo yentse ikhali mugutamo, ninga kuwuziwa kukhadachitiwa Joshuwa na Chawuta.

²⁸ Joshuwa adatentha guta la Ayi, adalisiya lawa mathele kwalini nalini. Matheleyo yachalipo nalelo.

²⁹ Joshuwa adachita kuti chitanda chamambo waku Ayi chimangililiwe pamuti mpaka nthawe yakumawulo, pakudoka kwadzuwa Joshuwa adawuza wanthu kuti achose chitanda chake pamuti. Adatakula chitanda chake achichithusa pansuwo wamuguta. Adagwezeka mudwi waminyala padzulu pachitandacho, nalelo minyalayo ichalipo pamwepo.

Kuwelengewa kwantemo paphili la Ebhali

³⁰ Joshuwa adamangila Chawuta Mulungu waa Izraeli mbuto yakupelekela ntsembe paphili la Ebhali,

³¹ kuwuziwa kudachitiwa wana wa Izraeli na Mozisi mulanda wa Chawuta, kuteyeza bzikhadanembewa mubhukhu lantemo wa Mozisi lichiti, Mbuto yakupelekela ntsembe, imangiwe naminyala ilibe kusemewa nasimbi ili yentse. Aphe apeleke mpfupo yakutenthelatu kwa Chawuta pamwepo, nantsembe yakudelekha.

³² Joshuwa ali pamwepo, patsogolo pawanthu wa Izraeli, adanemba pomwe pamwala ntemo wa Mozisi.

³³ Wana wa Izraeli wentse, anyakubwela nanzika zam'mwemo, naakulu-akulu namanduna naatongi wawo, akhali pamwepo adayima adanyangana Bhokisi la Chibvano la Chawuta, adayima mbali zentse za Bhokisi la Chibvano, patsogolo paanyantsembe wa Mulungu wachi Levi akhatakula Bhokisi la Chibvano la Chawuta. Kati-nakati yawo ikhali kutsogolo kwaphili la Gerizimu, inango kati-nakati ikhali kutsogolo kwaphili la Ebhali, kuteyeza bzaakhadawuziwa pakuyamba na Mozisi mulanda wa Chawuta, kuti a Izraeli adalisiwe.

³⁴ Pamwepo Joshuwa adawelenga mafala yentse yantemo yakudalisa nayakutembelela, kuteyeza bzentse bzikhadanembewa mubhukhu lantemo.

³⁵ Palibe ne fala libodzi laadawuziwa na Mozisi laalibe kuwelenga Joshuwa kwaa Izraeli wentse akhadakochezana pamwepo, akazi nawana nawachilendo wentse awo akhakhala pakati pawo.