Joshuwa 7 - Bhukhu la Kuyamba

Kutaza kwa Akani

¹ Koma wanthu wa Izraeli alibe kuwonesa chikhulupililo pabzinthu bzakuyela bzidalewedwa na Chawuta kuti bzichenekewe. Akani mwana wa Karimi, Karimi mwana wa Zabhudhi, Zabhudhi mwana wa Zera wanshowo wa Judha, ndiye adatakula bzinthu bzinango pabzinthu bzikhadapelekewa kwa Chawuta. Pomwe ukali wa Chawuta udagakila wanthu wa Izraeli.

² Joshuwa adatuma amuna kuchoka ku Jeriko achiyenda ku Ayi, pafupi na Bheti-aveni, chakumabveladzuwa kwa Bheteli, adati kwayiwo, “Yendani mukanyangane dziko.” Amunawo adayenda kanyangana dziko la Ayi.

³ Paadabwelela kwa Joshuwa iwo adati, “Wanthu wentse ngaleke kubzishupa kuyenda, ngakuyende wanthu masawuzande mawili panango matatu kamenya Ayi, lekani kuyendesa wanthu wentse, pakuti wanthu ali kumweko mbaang'ono-ng'ono.”

⁴ Nakutenepo wanthu masawuzande matatu ndiwo adayenda, koma wanthu adathamangisiwa nawanthu waku Ayi.

⁵ Pamwepo amuna waku Ayi adapha wanthu makumi matatu naatanthatu, adaathamangisa kuyambila pansuwo mpaka ku Shebharimu, achiwaphela m'matelo m'mwemo. Pamwepo mitima yaa Izraeli idabva mantha, achimala mphamvu.

⁶ Pamwepo Joshuwa naakulu-akulu wa Izraeli adang'amba bzakubvala bzawo, achikagona chafufumimba pantsi patsogolo pa Bhokisi la Chibvano la Chawuta, mpaka kumawulo. Adabzidzola dotha mumisolo yawo achiwonesa kulila kwawo.

⁷ Joshuwa adalila, “Aa, Mfumu Mulungu wangu! Mudayambusilanyi wanthu awa kuchoka kung'ambu kwa Jorodhani kumabveladzuwa. Thangwe lanyi Chawuta kutipeleka m'manja mwaa Amori kuti aticheneke? Bzikhadatikomela ninga mudatisiya kung'ambu kwa Jorodhani kumabveladzuwa kwatikhali?

⁸ Ko Mfumu niniti tani, pakuti a Izraeli athawa azondi wawo?

⁹ Pakuti a Kenani nawanthu wentse wamudziko lino an'zabva bzachitika, an'zatizungunuka achithima dzina lathu padziko lentse! Imwe mun'zachita tani nambili yadzina lanu ikulu?”

¹⁰ Chawuta adati kwa Joshuwa, “Sumuka! Thangwe lanyi kugona chafufumimba tenepa?”

¹¹ “Wanthu wa Izraeli adataza! Adaphwanya chibvano changu, alibe kuteyeza bzandidaawuza kuti achite. Adatakula bzinthu bzandidaawuza kuti acheneke, adaba achibziyikha pakati pabzinthu bzawo.

¹² Ndiye thangwe lache wana wa Izraeli ankwanisa lini kuyimisana naazondi wawo. Adathawa azondi wawo, pakuti iwo akhafunika kuphewa. Ine nin'zapitiliza lini kukutsogolelani, kufikila mwachosa bzinthu bzakuyela bzili pakati panu bzidalewedwa kuti bzichenekewe!”

¹³ Sumuka! Chenesa wanthu, awuze kuti, “Bzicheneseni mukonzekele mangwana, pakuti Chawuta Mulungu wa Izraeli wati, ‘Pakuti pana bzinthu bzakuyela bzikhafunika kuchenekewa. Nakutenepo imwe a Izraeli munkwanisa lini kukunda azondi wanu, kufikila mwachosa bzinthu bzimwebzo pakati panu!

¹⁴ Mangwana machibese-bese munfunika kubwela namishowo yentse. Nshowo uninga wasankhuliwa na Chawuta um'bwela pafupi, dzinza lentse, dzinza linsankhuliwa lim'bwela banja nabanja, banja linsankhuliwa lim'bwela munthu namunthu.’ ”

¹⁵ “Munthu an'zaphatiwa ana bzinthu bzimwebzo bzidalewedwa kuti bzichenekewe, iye nabzinthu bzake bzentse bzaanabzo an'zatenthewa namoto, pakuti adaphwanya chibvano cha Chawuta, pomwe nathangwe lakuti adachita chinthu chin'nyazisa mu Izraeli.”

¹⁶ Nakutenepo Joshuwa adalamuka machibese-bese mangwana yache, achibwelesa a Izraeli pafupi nshowo nanshowo, nakutenepo nshowo wa Judha udaphatiwa.

¹⁷ Pamwepo nshowo wa Judha udapita, dzinza la Zera ndilo lidaphatiwa, adabwelesa pafupi dzinza lentse la Zera munthu namunthu, banja la Zabhudhi ndilo lidaphatiwa.

¹⁸ Joshuwa adabwelesa pafupi wabanja la Zabhudhi munthu namunthu, Akani mwana wa Karimi, mwana wa Zabhudhi mwana wa Zera, wanshowo wa Judha, ndiye adaphatiwa.

¹⁹ Pamwepo Joshuwa adati kwa Akani, “Mwanangu, kuza Chawuta Mulungu wa Izraeli, umudumbize, ndiwuze kuti n'chinyi chawudachita, leka kundibisa nee chibodzi chokha pabzinthu bzawudachita.”

²⁰ Akani adadayila Joshuwa, iye adati, “Chadidi, ine ndidatazila Chawuta Mulungu wa Izraeli, ndidachita tenepa.

²¹ Pakati pasipodyo idapambiwa, ndidawona n'khanjo wabwino waku Shinari namasheleni yasiliva yakhalema mashekele mazana mawili nachigodo chagolidhe chikhalema mashekele makumi mashanu, ndidabzifuna nkubzitakula ndichibzibisa. Nakutenepo bzinthu bzimwebzo ndidabzibisa pantsi patenti yangu, siliva ndiyo ili pantsi pabzinango bzentse.”

²² Nakutenepo Joshuwa adatuma atumiki. Adathamanga kutenti kukhadabisiwa bzinthubzo, wanthu paadafika kutenti adakawona bzinthubzo bzidabisiwa mutenti yake, siliva ndiyo ikhali pantsi.

²³ Iwo adabzitakula nkati mwatenti achikabzipeleka kwa Joshuwa nakwawana wa Izraeli wentse. Adabzikhuthula pantsi patsogolo pa Chawuta.

²⁴ Joshuwa naa Izraeli wentse adatakula Akani mwana wa Zera, nasiliva nan'khanjo nachigodo chagolidhe nawana wake wachimuna nawachikazi nantiti wang'ombe namadhonki namabila yake, natenti yake nabzentse bzaakhanabzo, achiyenda naye kuchigowa cha Akori.

²⁵ Joshuwa adati, “Thangwe lanyi udatibwelesela nyathwa? Chawuta wabwelesambo nyathwa kwayiwe.” Wanthu wentse wa Izraeli adatema Akani naminyala pabodzi nawentse waakhanawo, achiwatentha namoto.

²⁶ Adagwezeka mudwi waminyala padzulu pake pabodzi nabzinthu bzake, nalelo uno minyalayo ilipo pamwepo. Nakutenepo mbuto imweyi in'chemelewa nadzina lakuti chigowa cha Akori. Pamwepo kugaka kwawukali wa Chawuta kudamala.