Joshuwa 6 - Bhukhu la Kuyamba

Kukundiwa kwa Jeriko

¹ Misuwo yamipanda ya Jeriko ikhakhala idafungiwa, nathangwe lakugopa wana wa Izraeli, palibe akhabvumiziwa kubula panja panango kupita nkati.

² Chawuta adati kwa Joshuwa, “Nyangana, ndayikha guta la Jeriko m'manja mwako, mazimambo yalene yentse naanyankhondo wamphamvu.

³ Iwe nawankhondo wako muzungunuke guta kabodzi pantsiku yokha-yokha. Muchite tenepo kwantsiku zitanthatu.

⁴ Anyantsembe wa Mulungu anomwe atakule wunda zanyanga zamabila patsogolo pa Bhokisi la Chibvano. Pantsiku yachinomwe iwe nawankhondo wako muzungunuke guta kanomwe kentse, anyantsembe alize wunda zawo.

⁵ Tsapano anyantsembe wa Mulungu paan'zapitiliza kuliza wunda zawo, wanthu wentse azakuwise, pamwepo mpanda waguta un'zagwelatu pantsi, munthu wentse achipita napaadanyanganana napo.”

⁶ Joshuwa mwana wa Nuni, adachemela anyantsembe wa Mulungu, adati kwayiwo, “Takulani Bhokisi la Chibvano la Chawuta, anyantsembe wa Mulungu anomwe atakule wunda zinomwe zaminyanga yamabila ayende patsogolo palene.”

⁷ Joshuwa adati kuwanthu, “Yendani patsogolo, fambani muzungunuke guta, wankhondo wakukonzeka apite patsogolo pa Bhokisi la Chibvano la Chawuta.”

⁸ Joshuwa paadawuza wanthu, anyantsembe wa Mulungu anomwe akhatakula wunda zaminyanga ya mabila, adayenda patsogolo pa Chawuta achiliza wunda zawo, anyantsembe wa Mulungu akhadatakula Bhokisi la Chibvano la Chawuta akhali m'mbuyo mwawo.

⁹ Anyankhondo wakukonzeka adakochela patsogolo paanyantsembe akhaliza wunda, kumambuyo kwawo kukhana anyantsembe akhadatakula Bhokisi la Chibvano, wunda zichiliziwa.

¹⁰ Tsapano Joshuwa adawuza wanthu kuti, “Lekani kuchemelela, ne kubveka fala lanu, panango kuchosa lili lentse nkamwa mwanu kufikila ine ndakuwuzani bzakuchita.”

¹¹ Nakutenepo iye adachitisa kuti Bhokisi la Chibvano la Chawuta lizungunuke guta kabodzi, adabwelela pomwe m'matenti achigona usiku umwewo m'matenti.

¹² Joshuwa adalamuka machibese-bese pantsiku yachiwili, anyantsembe achitakula Bhokisi la Chibvano la Chawuta.

¹³ Anyantsembe wa Mulungu anomwe akhatakula wunda, ndiwo adakochela patsogolo pa Bhokisi la Chibvano la Chawuta achiliza wunda zawo. Patsogolo pawo pakhana anyankhondo wakukonzeka achiteyelewa naanyantsembe akhadatakula Bhokisi la Chibvano la Chawuta, wakuliza wunda achiliza wunda zawo.

¹⁴ Pantsiku yachiwili adazungunuka pomwe guta kabodzi achibwelela pansasa, adachita tenepo kwantsiku zitanthatu.

¹⁵ Pantsiku yachinomwe adalamuka machibese-bese chakumadandakucha, achizungunuka guta ninga bzaadachita pakuyamba. Ntsiku imweyo ndiyo yaadazungunuka guta kanomwe kentse.

¹⁶ Paadazungunuka kachinomwe kentse, anyantsembe wa Mulungu paadazaliza wunda zawo, Joshuwa adakuwa kuwanthu, “Chemelelani, pakuti Chawuta wayikha kale guta limweli m'manja mwanu.”

¹⁷ “Guta limweli nabzinthu bzentse bzili m'mwemo ngabzipelekewe kwa Chawuta, kuti bzichenekewe. Koma hule Rahabhi basi, nawabanja lake waanawo munyumba mwake ansala wamoyo, pakuti adabisa atumiki watidatuma.”

¹⁸ “Koma imwe chenjelelani kuchoka pabzinthu bzidalewedwa kuti bzichenekewe, mukabzitakula mun'chitisa kuti nsasa waa Izraeli uphwanyiwe, muchibwelesa nyathwa.

¹⁹ Siliva yentse yam'mwemo nagolidhe, nabzombo bzankuwa nasimbi m'bzakuyela kwa Chawuta. Bziyendesewe muniyikhiwa chuma cha Chawuta.”

²⁰ Anyantsembe adaliza wunda zawo, wanthu paadabva kulila kwawunda, adakuwa kwene-kwene, pamwepo mpanda udagwa pantsi. Nakutenepo wanthu wentse adapita muguta, napaakhadanyanganana napo, achitola gutalo.

²¹ Iwo adapha wanthu wentse akhali mugutamo namulomo wabhemba, adapha amuna naakazi akulu naang'ono namititi yang'ombe namabila namadhonki.

²² Joshuwa adati kwaamuna awili adayenda kanyangana dziko, “Yendani munyumba mwahule lile, mukam'bulise iye nawentse waanawo, kuteyeza kulumbila kwamudachita kwayiye.”

²³ Nakutenepo alumbwana wale adayenda kanyangana dziko, adayenda kabulisa Rahabhi naapayi wake naamayi wake, nawabanja lake nawentse waakhanawo. Adaapasa pakukhala kunja kwansasa waa Izraeli.

²⁴ Pamwepo adatentha guta namoto, nabzinthu bzentse bzikhali m'mwemo, kudasala siliva nagolidhe, nabzombo bzankuwa nabzasimbi, adabziyikha munyumba mukhachengetelewa chuma cha Chawuta.

²⁵ Koma Joshuwa adachiza Rahabhi hule lile, nawanyumba yaapayi wake, nawentse waakhanawo, ali wamoyo, iye akukhala pakati paa Izraeli nalelo, thangwe lakuti iye adabisa akadidiya adatumiwa na Joshuwa kanyangana Jeriko.

²⁶ Nthawe imweyo Joshuwa adalumbila kwayiwo kuti, “Munthu wentse an'zamanga guta la Jeriko, an'zakhala wakutembelelewa patsogolo pa Chawuta.” Munthu an'zamanga tsinde laguta la Jeriko, mwana wake wakuyamba an'zafa. Munthu an'zamanga misuwo yaguta an'zafelewa namwana wake mung'ono.

²⁷ Nakutenepo Chawuta adatsogolela Joshuwa, mbili yake idafika kumadziko yentse.