Joshuwa 5 - Bhukhu la Kuyamba

¹ Mazimambo yentse yaa Amori, yakung'ambu kwa Jorodhani chakumadokelo, namazimambo yentse yaa Kenani akhali yamphepete mwanyanja adabva kuti Chawuta adawumisila madzi wana wa Izraeli pa Jorodhani kufikila ayambuka, mitima yawo idachita mantha, akhalibe ne moyo nathangwe labzidachitiliwa a Izraeli.

Kugwatiwa khanda lachimuna kwaa Izraeli pa Giligali

² Panthawe imweyo Chawuta adati kwa Joshuwa, “Konza bzisu bzaminyala ugwate ntsonga zachimuna wanthu wa Izraeli wam'badwe wachiwili.”

³ Nakutenepo Joshuwa adakonza bzisu bzaminyala achigwata makanda yachimuna wana wa Izraeli paakhali paphili la Gibheyati-haraloti.

⁴ Joshuwa adaagwata khanda lachimuna nathangwe lakuti, amuna wentse akhadziwa kumenya nkhondo adachoka ku Ijipiti, adafela munjila paakhazungayila muchipululu.

⁵ Ne, wanthu wentse adabula mu Ijipiti adagwatiwa khanda lachimuna, koma wanthu wentse adabaliliwa munjila muchipululu paadachoka ku Ijipiti ndiwo akhalibe kugwatiwa khanda lachimuna.

⁶ Wanthu wa Izraeli adafamba muchipululu kwamagole makumi manayi, kufikila amuna wentse akhamenya nkhondo adachoka mu Ijipiti amala kufa, thangwe lakuti alibe kutetekela Chawuta. Chawuta adalumbila kuti iwo aniwona lini dziko laadalumbila kuzapasa makholo yawo, dziko liniyelela wuchi nankaka.

⁷ Nakutenepo wana wawo ndiwo waadayikha pambuto yawo, awo adazagwatiwa khanda yachimuna na Joshuwa, pakuti akhanati agwatiwa khanda paakhali pawulendo.

⁸ Kugwatiwa khanda lachimuna kwawanthu wentse pakudamala, iwo adakhala pambuto zawo m'misasa kufikila bzilonda bzawo bzapola.

⁹ Chawuta adati kwa Joshuwa, “Lelo ndakungulusa ndichichosa kunyazisiwa kwanu kwakukhala alanda mu Ijipiti.” Mbuto imweyi adayipasa dzina lakuti Giligali mpaka lelo.

¹⁰ Wana wa Izraeli paakhadazika matenti pa Giligali mudambo pafupi na Jeriko, adasekelela phasika chakumawulo pantsiku yakhumi nanayi yamwezi wakuyamba.

¹¹ Mangwana yache padamala phasika, ntsiku imweyo adadya chakudya chamudziko limwelo, adadya mikate ikhalibe chakufutisa namapila yakukazinga.

¹² Mangwana yache mana idaleka kuwoneka, paadadya chakudya chamudziko m'mwemo, wanthu wa Izraeli alibe kuzadya pomwe mana, koma iwo adadya michelo yamudziko la Kenani mugole limwelo.

Joshuwa namunthu akhadaphata bhemba

¹³ Joshuwa paakhali pafupi na Jeriko, adasumusa maso yake nkuwona mwamuna adayima patsogolo pake, adaphata bhemba m'manja lakupsolomola kale. Joshuwa adayenda kwayiye nkuti, “Ndiwe wathu panango waazondi wathu?”

¹⁴ Iye adati, “Nee, ndabwela ninga nkulu wankhondo ya Chawuta.” Pamwepo Joshuwa adagona chafufumimba achipemphela, iye adati, “Mbuye wangu, munfuna kuti mulanda wanu achite tani?”

¹⁵ Nkulu wankhondo ya Chawuta adati kwa Joshuwa, “Bvula shango zako pakuti mbuto yawudayima naminyendo yako iniyela.” Pamwepo Joshuwa adachita bzaadawuziwa.