Joshuwa 3 - Bhukhu la Kuyamba

Wanthu wa Izraeli aniyambuka Jorodhani

¹ Mangwana yache machibese-bese Joshuwa naa Izraeli wentse, adachoka ku Shitimu, achiyenda ku Jorodhani, adakhalako pamwepo anati ayambuka.

² Pakumala kwantsiku zitatu manduna yadapita pakati pamatenti,

³ yachiwuza wanthu kuti, “Mukawona Bhokisi la Chibvano la Chawuta Mulungu wanu, latakuliwa naanyantsembe wa Mulungu wachi Levi, pamwepo imwe muchoke pambuto zanu muliteyele,

⁴ kuti imwe mudziwe njila yamun'zafamba nayo, pakuti imwe munati mwafamba nanjila imweyi. Koma pazasale mbuto pakati pa Bhokisi la Chibvano nayimwe, koma pazakhale mbuto yamphimo yamakhalo masawuzande mawili pakati payimwe nalo, lekani kufika pafupi nalo.”

⁵ Joshuwa adati kwawanthu, “Bzicheneseni, pakuti mangwana Chawuta an'zachita bzidabwiso pakati panu.”

⁶ Joshuwa adati kwaanyantsembe wa Mulungu, “Takulani Bhokisi la Chibvano, muyende patsogolo pawanthu. Iwo adatakula Bhokisi la Chibvano achiyenda patsogolo pawanthu.”

⁷ Chawuta adati kwa Joshuwa, “Lelo niniyamba kukukuza pamaso paa Izraeli, adziwe kuti, ndina iwe bzandidachita kwa Mozisi.”

⁸ “Wuza anyantsembe wa Mulungu antakula Bhokisi la Chibvano kuti akafika mphepete mwa Jorodhani ayime.”

⁹ Joshuwa adati kwawana wa Izraeli, “Bwelani pafupi mubve mafala yakulewedwa na Chawuta Mulungu wanu.”

¹⁰ Joshuwa adati, “Dziwani kuti, Mulungu wamoyo ali pakati panu, antaza lini kukuthamangisilani a Kenani naa Hiti naa Hivi naa Perezi naa Girigashi naa Amori naa Jebhusi.

¹¹ Wonani, Bhokisi la Chibvano la Mfumu wapantsi pentse, liniyamba kuyenda patsogolo panu, pamunkayambuka Jorodhani.

¹² Nakutenepo imwe sankhulani amuna khumi naawili kunshowo waa Izraeli, panshowo wokha-wokha sankhulani mwamuna m'bodzi.

¹³ Anyantsembe wa Mulungu antakula Bhokisi la Chibvano la Chawuta, Mfumu wapantsi pentse, nzayo zawo pazinkaponda m'madzi mu Jorodhani, madzi yakhayelela kuchoka chakudzulu yankayima, yachigwezekana kuchita mudwi ubodzi.”

¹⁴ Nakutenepo wanthu adafuluka pamatenti yawo, achiyenda kayambuka Jorodhani, achitsogolelewa naanyantsembe wa Mulungu akhadatakula Bhokisi la Chibvano.

¹⁵ Anyantsembe wa Mulungu akhadatakula Bhokisi la Chibvano paadafika pa Jorodhani, paadachuza minyendo yawo mphepete mwamadzi, madzi yamu Jorodhani yadayima, (madzi yamu Jorodhani yakhafashukila nthawe yentse yakukolola),

¹⁶ madzi yakhachoka nachakudzulu yadagwezekana kuchita mudwi, kutali paguta la Adhamu lili pambali pa Zaretani. Madzi yakhayelela yachiyenda kunyanja ya Arabha, nyanja yamunyu, yadagwatikilatu. Wanthu adayambuka napakhadanyanganana na Jeriko.

¹⁷ Anyantsembe wa Mulungu, akhatakula Bhokisi la Chibvano la Chawuta adayima pakuwuma pakati pa Jorodhani, kufikila nshowo wentse wa Izraeli wamala kuyambuka.