Joshuwa 24 - Bhukhu la Kuyamba

Joshuwa anilewa-lewa nawanthu pa Shekemu

¹ Joshuwa adakocheza pabodzi mishowo yentse yaa Izraeli ku Shekemu. Adachemela akulu-akulu naatsogoleli naatongi namanduna yamu Izraeli, achikayima patsogolo pa Mulungu.

² Pamwepo Joshuwa adati kwawanthu wentse, “Chawuta Mulungu wa Izraeli wati, ‘Kholo lanu Tera nawana wake Abhurahamu na Nahori, awo kale akhakhala chakumabveladzuwa kung'ambu kwakamadzi ka Ufuratesi adatumikila anango amilungu.

³ Pamwepo ndidatola kholo lanu Abhurahamu kung'ambu kwakamadzi ka Ufuletesi ndichimuyendesa mudziko lentse la Kenani. Ndidachita kuti m'badwe wake ukhale uzinji kwene-kwene. Ndidampasa Isaki,

⁴ Isaki ndidamupasambo Jakobho na Esau. Esau ndidampasa dziko lamapili la Seyiri kuti likhale lake, koma Jakobho nawana wake adapolika kuyenda ku Ijipiti.

⁵ Tsapano ndidazatuma Mozisi na Aroni, ndidamenya Ijipiti nabzandidachita pakati pawo, pakumalizila ndidakuchosani.

⁶ Ndidachosa makholo yanu mu Ijipiti. Paadafika panyanja, wanthu wa Ijipiti adateyela makholo yanu nangolo zawo zankhondo nawamahachi mpaka pa Nyanja Ifuyila.

⁷ Makholo yanu yadalila kwa Chawuta, iye adayikha n'dima pakati payimwe nawanthu wa Ijipiti. Chawuta adachita kuti nyanja iwagwanile. Pomwe maso yanu yadawona bzandidachita kwawanthu wa Ijipiti. Mudakhala muchipululu kwantsiku zizinji.

⁸ Pamwepo ine ndidakubwelesani kudziko laa Amori, awo akhakhala kung'ambu kwa Jorodhani chakumabveladzuwa. Imwe pamudamenyana nawo ine ndidaayikha m'manja mwanu, muchitola dziko lawo, ndichiwacheneka patsogolo panu.

⁹ Pamwepo Bhalaki mwana wa Zipori, mambo wa Moabhi adasumuka kamenyana na Izraeli. Iye adatuma fala kwa Bhalamu mwana wa Bheyori kuti akutembeleleni.

¹⁰ Koma ine ndilibe kufuna kutetekela Bhalamu, ndidatochita kuti akudaliseni, nakutenepo ndidakupulumusani kuchoka m'manja mwake.

¹¹ Mudazayambuka Jorodhani muchibwela ku Jeriko. An'chilo wa Jeriko pabodzi naa Amori naa Perezi naa Kenani naa Hiti naa Girigashi naa Hivi naa Jebhusi adamenyana nayimwe. Koma ine ndidakukundisani wanthu amwewa.

¹² Tsapano ine ndidatumila malumi kumazimambo mawili yaa Amori, ndiyo yadaathamangisa patsogolo panu. Mulibe kukunda namabhemba panango utati.

¹³ Ndidakupasani dziko lamulibe kushupikila, namaguta yamulibe kumanga. Mudakhala m'mwemo, muchidya michelo yam'minda yamivayini nayam'minda yamiolive yamulibe kubzala.’ ”

¹⁴ Joshuwa adati, “Tsapano imwe gopani Chawuta, mumutumikile nantima wanu wentse mwakukwana mwakukhulupilika. Chosani amilungu adapembezewa namakholo yanu, kung'ambu kwakamadzi ka Ufuratesi na Ijipiti, tumikilani Chawuta basi.

¹⁵ Peno bzidayipa m'maso mwanu kutumikila Chawuta, lelo sankhulani wamunfuna kutumikila, panango kutumikila amilungu akhapemphelewa namakholo yanu mudziko lakung'ambu kwakamadzi ka Ufuratesi, panango amilungu waa Amori wamudziko lino lamukukhala. Koma ine nabanja langu tin'zatumikila Chawuta.”

¹⁶ Pamwepo wanthu adadayila, “Koma ise tingasiye lini Chawuta tichitumikila anango amilungu,

¹⁷ pakuti Chawuta Mulungu wathu ndiye adalombola makholo yathu muwulanda mudziko la Ijipiti, adachita bzilatizo bzatidawona namaso yathu. Adatichengeta pawulendo watidafamba nkati mwamishowo mwatikhapita namo.

¹⁸ Chawuta adatithamangisila mishowo yentse kuphatanizila a Amori akhakhala mudziko lino. Nayisembo pomwe tin'zatumikila Chawuta pakuti ndiye Mulungu wathu.”

¹⁹ Joshuwa adati kwawanthu, “Imwe mungakwanise lini kutumikila Chawuta, pakuti Mulungu niwakuyela, ni Mulungu wanchanje an'zakulekelelani lini bzakuyipa bzanu, panango kutaza kwanu.

²⁰ Mukasiya Chawuta muchikatumikila anango amilungu wachilendo, iye an'zakulinzani ngoto achizakulangani, an'zakumalani, an'zakuchitilani bzakuyipa, pambuyo pakukuchitilani bzabwino.”

²¹ Wanthu adati kwa Joshuwa, “Nee! Ise tin'zatumikila Chawuta.”

²² Pamwepo Joshuwa adati kwayiwo, “Imwe mwabzichitila umboni mwekha kuti mwasankhula kutumikila Chawuta.” Iwo adati, “Inde, ise takhala mboni.”

²³ Joshuwa adati, “Tsapano chosani amilungu wachilendo ali pakati panu, ikhani mitima yanu kwa Chawuta Mulungu wa Izraeli.”

²⁴ Wanthu adati kwa Joshuwa, “Ise tin'zatumikila Chawuta Mulungu wathu, tin'zatetekela bzentse bzaan'zalewa.”

²⁵ Nakutenepo Joshuwa adachita chibvano nawanthu ntsiku imweyo, adaapasa mitemo pa Shekemu kuti ayiteyeze.

²⁶ Pamwepo Joshuwa adanemba mafalayo mubhukhu lantemo wa Mulungu, adatola mwala ukulu achiwuyikha pantsi pamuti wamuoki pambuto yakuyela ya Chawuta.

²⁷ Joshuwa adati kwawanthu wentse, “Wonani, mwala uwu un'zakhala mboni pakati pathu, pakuti wabva mafala yentse yalewedwa na Chawuta kwayise, nakutenepo un'zakhala mboni yakukupasani mulandu, kuti muleke kutazila Mulungu wanu.”

²⁸ Nakutenepo Joshuwa adawuza wanthu kuti abwelele kumadziko yanthaka yawo.

Kufa kwa Joshuwa na Eliyazari

²⁹ Pambuyo payibzi, Joshuwa mwana wa Nuni mulanda wa Chawuta, adafa wawa namagole dzana nakhumi.

³⁰ Adamuyikha mudziko lanthaka yake ku Timunati-sera, mudziko lamapili la Efulemu, nachakudzulu kwaphili la Gaashi.

³¹ Wanthu wa Izraeli adapitiliza kutumikila Chawuta muntsiku zentse za Joshuwa, namuntsiku zaakulu-akulu akhadayikhiwa na Joshuwa, awo adawona mabasa yentse yadachitiliwa a Izraeli na Chawuta.

³² Mabondo ya Jozefi yadatakuliwa ku Ijipiti naa Izraeli yadayikhiwa ku Shekemu, muchigawo chamunda udaguliwa na Jakobho kwawana wa Hamori, apayi wa Shekemu, nabzigodo bzamasheleni dzana. Mbuto imweyo idazawa nthaka yam'badwe wa Jozefi.

³³ Eliyezari mwana wa Aroni adafa, achimuyikha pa Gibheya, muguta lamwana wake Finiyasi, laadapasiwa mudziko lamapili la Efulemu.