Joshuwa 22 - Bhukhu la Kuyamba

Joshuwa am'bweza mishowo yakumabveladzuwa kumiyi yawo

¹ Joshuwa adachemela nshowo wa Rubheni nawa Gadhi nakati-nakati yanshowo wa Manase,

² achiti kwayiwo, “Mudateyeza bzentse bzamudawuziwa na Mozisi mulanda wa Chawuta, mudatetekela bzandidakuwuzani kuti muzachite.

³ Ntsiku zizinji zimwezi mulibe kusiyana naabale wanu a Izraeli, mukhateyeza bzamudawuziwa na Chawuta Mulungu wanu.

⁴ Nakutenepo Chawuta Mulungu wanu wapeleka mpumulo kwaabale wanu kuteyeza kulumbila kwaadachita kwayiwo. Tsapano imwe bwelelani kumatenti yanu, kudziko lanthaka yanu lamudapasiwa na Mozisi mulanda wa Chawuta kung'ambu kwa Jorodhani chakumabveladzuwa.”

⁵ Koma uchenjelele kuteyeza bzifundiso nantemo wamudawuziwa na Mozisi mulanda wa Chawuta ule uniti, “Funa Chawuta Mulungu wako, ufambe munjila zake, nakuteyeza mitemo yake, umamatile payiye nakumutumikila nantima wanu nanzelu zanu zentse.”

⁶ Nakutenepo Joshuwa adaadalisa achiwawuza kuti ayende, iwo adayenda kumatenti yawo.

⁷ Tsapano kati nakati yanshowo wa Manase, Mozisi akhadaapasa kale dziko lawo mu Bhashani, pomwe kati nakati inango, Joshuwa akhadaapasa kale dziko pafupi naabale wawo chakumadokelo kung'ambu kwa Jorodhani. Joshuwa adaadalisa, achiwabweza kumatenti yawo,

⁸ adati kwayiwo, “Bwelelani kumatenti yanu nachuma chanu chizinji nabzifuwo bzanu nasiliva nagolidhe nankuwa nasimbi, nabzakubvala bzizinji. Gawanani naabale wanu sipodyo yaazondi wanu.”

⁹ Nakutenepo wanthu wa Rubheni nawa Gadhi nakati-nakati yanshowo wa Manase adabwelela kumiyi yawo. Adasiya a Izraeli ali pa Shilo mudziko la Kenani, iwo achibwelela kudziko lawo kudziko la Giliyadhi, laadatola kukhala nthaka yawo kuteyeza bzidalewedwa namulomo wa Chawuta kwa Mozisi.

Mbuto yakupelekela ntsembe pa Jorodhani

¹⁰ Tsapano nshowo wa Rubheni nawa Gadhi nakati-nakati yawanthu wa Manase paadafika kufupi na mphimpha ya Jorodhani, mudziko la Kenani, akali chakumadokelo kwa Jorodhani adamanga mbuto ikulu yakupelekela ntsembe.

¹¹ Wanthu wa Izraeli adabva kuti, “Wanthu wa Rubheni nawa Gadhi nakati-nakati yanshowo wa Manase amanga pakupelekela ntsembe kumalile kwadziko la Kenani, pafupi na Jorodhani, ng'ambu ino mudziko lawanthu wa Izraeli.”

¹² Tsapano wana wa Izraeli paadabzibva, adakochezana pa Shilo, kuti achite nawo nkhondo.

¹³ Pamwepo a Izraeli adatuma Finiyasi mwana Eliyezari nyantsembe wa Mulungu kunshowo wa Rubheni nawa Gadhi nakati-nakati yanshowo wa Manase mudziko la Giliyadhi.

¹⁴ Adayenda namanduna khumi, panshowo wokha-wokha wamabanja yaa Izraeli pakhachoka m'bodzi, ali n'tsogoleli panshowo waa Izraeli.

¹⁵ Paadafika mudziko la Giliyadhi, kwawanthu wa Rubheni nawa Gadhi nakati-nakati yanshowo wa Manase, adati kwayiwo,

¹⁶ “Gunyenye lentse la Chawuta lati, ‘Thangwe lanyi kuchita umaluku tenepa kwa Mulungu wa Izraeli. Mwapandukila Chawuta, nakubzimangila kwamwachita mbuto yakupelekela ntsembe?

¹⁷ Ko chakuyipa chamudachita pa Peyori ching'ono? Chidabwelesa matenda kugunyenye lentse la Chawuta, nalelo tinati tabzichenesa pachakuyipa chimwecho.

¹⁸ Koma lelo mwaakupandukila Chawuta pomwe? Tsono lelo mukamupandukila Chawuta, mangwana an'zakalipila gunyenye lentse la Izraeli.

¹⁹ Peno dziko lanu nilakupsipa kuti mupembeze Chawuta, yambukilani kuno kudziko la Chawuta kuna Tenti ya Chawuta, mukatole nthaka yanu pakati pathu. Imwe lekani kupandukila Chawuta panango kumpandukila ise pakubzimangila mbuto inango yakupelekela ntsembe, kunja kwambuto yakupelekela ntsembe ya Chawuta Mulungu wathu.

²⁰ Ko Akani mwana wa Zera, saadataya chikhulupililo nathangwe lakutakula bzinthu bzakuyela bzikhadapelekewa kwa Chawuta? Pamwepo ukali wa Chawuta udafikila gunyenye lentse la Izraeli. Iye alibe kufa yekha nathangwe lakutaza kwake.’ ”

²¹ Pamwepo wanthu wanshowo wa Rubheni nawa Gadhi nakati-nakati yawanthu wa Manase adadayila akulu-akulu wamabanja yaa Izraeli adati,

²² “Chawuta wamphamvu, Mulungu Chawuta, Chawuta wamphamvu, Mulungu Chawuta! An'dziwa, lekani Izraeli idziwe! Peno bzatidachita kukhali kupanduka panango kutaya chikhulupililo patsogolo pa Chawuta, lelo lekani kutichiza.

²³ Koma peno kumanga kwatidachita mbuto yakupelekela ntsembe patsogolo pa Chawuta kukhali kupanduka, panango kuti tipeleke mpfupo yakutenthelatu panango ntsembe yamphunga panango ntsembe yakuyanjana pamwepo, Chawuta pachake anfunika kutilanga.

²⁴ Nee, koma ise tidabzichita, tichibva mantha kuti kutsogolo wana wanu akazati kwawana wathu, ‘Ko imwe ndimwe yani kwa Chawuta Mulungu wa Izraeli?

²⁵ Pakuti Chawuta adayikha kamadzi ka Jorodhani kukhala malile pakati payimwe nayise, imwe wanthu wa Rubheni nawa Gadhi, mulibe chigawo kwa Chawuta.’ Nakutenepo wana wanu angazachitise kuti wana wathu azaleke kugopa Chawuta.”

²⁶ Nakutenepo ise tidazati, “Ngatimange mbuto yakupelekela ntsembe, koma ikhali lini yakupelekela ntsembe zakutentha panango mpfupo,

²⁷ koma izakhale mboni pakati payimwe nayise, pakati pamibadwe yathu im'bwela, kuti ise tiphatile basa Chawuta mu Tenti yake yakuyela nakupeleka ntsembe zakutentha nazakuyanjana. Pakuti wana wanu muntsiku zim'bwela an'zati kuwana wathu, ‘Mulibe chigawo mwa Chawuta.’ ”

²⁸ Ise tidakumbuka kuti, wana wanu akazabzilewa kwayise panango kum'badwe wathu un'zabwela, ise tin'zati, “Wonani, chifanikizo chambuto yakupelekela ntsembe kwa Chawuta, chaadamanga makholo yathu, mpakupelekela lini mpfupo zakutentha panango ntsembe zakutentha, koma kuti chizakhale umboni pakati payimwe nayise.

²⁹ Ise tingapandukile lini Chawuta, tingaleke lini kumuteyela thangwe lakuti tidamanga mbuto yakupelekela ntsembe zakutentha nantsembe zamphunga. Tingamange lini inango mbuto yakupelekela ntsembe kunja kwambuto yakupelekela ntsembe kwa Chawuta Mulungu wathu, ile ili patsogolo panyumba yakuyela.”

³⁰ Finiyasi nyantsembe wa Mulungu namanduna yagunyenye, naatsogoleli wamabanja yaa Izraeli waakhanayo, adabva bzidalewedwa nawanthu wanshowo wa Rubheni na Gadhi nakati-nakati yawa Manase, ibzi bzikhali bwino m'maso mwawo.

³¹ Finiyasi mwana wa Eliyezari nyantsembe wa Mulungu adati kwawanthu wa Rubheni nawa Gadhi nakati-nakati yawa Manase, “Lelo tawona kuti Chawuta ali pakati pathu, thangwe lakuti imwe mulibe kupandukila Chawuta, koma imwe mudachiza a Izraeli kuchoka m'manja mwa Chawuta.”

³² Pamwepo Finiyasi mwana wa Eliyezari nyantsembe wa Mulungu namanduna yaakhanayo adabwelela kuchoka kwawanthu wa Rubheni nawa Gadhi mudziko la Giliyadhi. Adabwelela ku Kenani kwaa Izraeli achikaalongosolela bzidachitika.

³³ Wanthu wa Izraeli paadabva bzidachitika adakondwa kwene-kwene, achilemekeza Mulungu. Alibe kuzalewa-lewa pomwe bzakuyenda kachita nawo nkhondo, nabzakukaphwanya dziko likhakhala wanthu wa Rubheni nawa Gadhi.

³⁴ Nakutenepo wanthu wa Rubheni nawa Gadhi adapasa dzina mbuto yakupelekela ntsembe ile kuti Mboni, pakuti iwo adati, “Ndiyo mboni pakati payimwe nayise kuti Chawuta ni Mulungu wathu.”