Joshuwa 21 - Bhukhu la Kuyamba

Maguta yaa Levi

¹ Akulu-akulu wamabanja yaazipayi waa Levi adabwela pafupi na Eliyezari nyantsembe wa Mulungu nakwa Joshuwa mwana wa Nuni, nakwaakulu-akulu wamabanja yanshowo wawanthu wa Izraeli.

² Ali pa Shilo mudziko la Kenani iwo adati kwayiye, “Chawuta adawuza Mozisi kuti, tidapasiwa maguta yakukhalamo, pabodzi nambuto zakudyesela bzifuwo bzathu.”

³ Nakutenepo wana wa Izraeli adapasa a Levi maguta aya nambuto zakudyesela bzifuwo bzawo kuchoka munthaka yawo, kuteyeza bzidalewedwa namulomo wa Chawuta.

⁴ Kuwombeza kwakuyamba kudagwela kwadzinza la Kohati kuteyeza mabanja yawo. A Levi wam'badwe wa Aroni nyantsembe wa Mulungu, adapasiwa maguta khumi namatatu kuchoka munshowo wa Judha nawa Simiyoni nawa Bhenjemani.

⁵ Wanthu wentse wadzinza la Kohati akhadasala adapasiwa maguta khumi nanjila yakuwombeza kuchoka kumabanja yanshowo wa Efulemu, pomwe kuchoka munshowo wa Dhani nakati-nakati yawanthu wanshowo wa Manase.

⁶ Wanthu wadzinza la Gerishoni adapasiwa maguta khumi namatatu nanjila yakuwombeza, kuchoka munshowo wa Isakari, nakunshowo wa Asheri nawa Nafitali, nakati-nakati yanshowo wa Manase mu Bhashani.

⁷ Dzinza la Merari kuteyeza mabanja yawo, adapasiwa maguta khumi namawili kuchoka kum'badwe wa Rubheni, wa Gadhi nawa Zebhuluni.

⁸ Wana wa Izraeli adachita bzakuwombeza kuti apase a Levi maguta nambuto zakudyesela bzifuwo, kuteyeza bzaadawuziwa na Chawuta mwa Mozisi.

⁹ Kuchoka kunshowo wawana wa Judha nanshowo wawana wa Simiyoni adapeleka maguta aya yalewedwa namadzina,

¹⁰ kuti yakhale yam'badwe wa Aroni, wadzinza la Kohati wanshowo wa Levi, pakuti kuwombeza kudagwela iwo pakuyamba.

¹¹ Adaapasa guta la Kiriyati-aribha mudziko lamapili la Judha, tsapano lin'chemelewa kuti Hebhuroni pabodzi nambuto zakudyesela bzifuwo. (Aribha akhali apayi wa Anaki.)

¹² Koma minda yagutalo namiyi yayene bzikhadapasiwa kale Kelebho mwana wa Jefune kukhala bzake.

¹³ M'badwe wa Aroni nyantsembe wa Mulungu adapasiwa guta la Hebhuroni, guta lakupotela munthu akhapha mwanzake mwakusaya kukumbukila nambuto zakudyesela bzifuwo, na Libhina nambuto yakudyesela bzifuwo,

¹⁴ na Jatiri nambuto yakudyesela bzifuwo na Eshitemowa nambuto yakudyesela bzifuwo

¹⁵ na Holoni nambuto yakudyesela bzifuwo na Dhebhiri nambuto yakudyesela bzifuwo

¹⁶ na Ayini nambuto yakudyesela bzifuwo na Juta nambuto yakudyesela bzifuwo bzawo na Bheti-shemeshi nambuto zakudyesela bzifuwo. Maguta yentse yadachoka munshowo wa Judha na Simiyoni yakhali pfemba.

¹⁷ Kushowo wa Bhenjemani adapasiwa Gibheyoni nambuto zakudyesela bzifuwo na Gebha nambuto zakudyesela bzifuwo

¹⁸ na Anatoti nambuto zakudyesela bzifuwo na Alimoni nambuto zakudyesela bzifuwo. Maguta yentse yakhali manayi.

¹⁹ Maguta yadapasiwa m'badwe wa Aroni nyantsembe wa Mulungu yakhali khumi namatatu nambuto zakudyesela bzifuwo.

²⁰ Wanthu wentse wadzinza la Kohati wamabanja yaa Levi adasala adagawiliwa maguta nanjila yakuwombeza kuchoka kunshowo wa Efulemu.

²¹ Iwo adapasiwa guta la Shekemu, guta lakupotela munthu akhapha mwanzake, nambuto zakudyesela bzifuwo bzawo, mudziko lamapili la Efulemu na Gezeri nambuto yakudyesela bzifuwo,

²² na Kibhizayimu na Bheti-horoni, nambuto zakudyesela bzifuwo bzawo, maguta yentse yakhali manayi.

²³ Kunshowo wa Dhani kudachoka, Eliteke nambuto zakudyesela bzifuwo na Gibhetoni nambuto zakudyesela bzifuwo

²⁴ na Ayijaloni nambuto zakudyesela bzifuwo na Gati-rimoni nambuto zakudyesela bzifuwo, maguta yentse yakhali manayi.

²⁵ Kukati-nakati yanshowo wa Manase kudachoka, Tanaki nambuto zakudyesela bzifuwo, Gati-rimoni nambuto zakudyesela bzifuwo, adapasiwa maguta mawili.

²⁶ Maguta yentse yadzinza lam'badwe wa Kohati ukhadasala yakhali khumi, nambuto zakudyesela bzifuwo bzawo.

²⁷ Kudzinza laa Gerishoni, wabanja linango la a Levi adapasiwa maguta mawili kuchoka kukati nakati yanshowo unango wa Manase, Golani mu Bhashani nambuto zakudyesela bzifuwo, guta lakupotela munthu akapha mwanzake na Bheeshitera nambuto zakudyesela bzifuwo, maguta yentse yakhali mawili.

²⁸ Kunshowo wa Isakari kudachoka, guta la Kishoni na Dhabherati nambuto zakudyesela bzifuwo

²⁹ na Jarimuti nambuto zakudyesela bzifuwo na Eniganimu nambuto zakudyesela bzifuwo, maguta yentse yakhali manayi.

³⁰ Kunshowo wa Asheri kudachoka maguta manayi, Mishali nambuto zakudyesela bzifuwo na Abhidhoni nambuto zakudyesela bzifuwo,

³¹ na Helikati nambuto zakudyesela bzifuwo na Rehobhi nambuto zakudyesela bzifuwo maguta yentse yakhali manayi.

³² Kunshowo wa Nafitali adapasiwa maguta matatu, Kedheshi ili mu Galileya nambuto zakudyesela bzifuwo, guta lakupotela munthu akapha mwanzake na Hamoti-dhori nambuto zakudyesela bzifuwo na Karitani nambuto zakudyesela bzifuwo.

³³ Maguta yamabanja yentse yadzinza la Gerishoni yakhali khumi namatatu nambuto zakudyesela bzifuwo.

³⁴ A Levi adasala wam'badwe wa Merari, adapasiwa maguta kuchoka kunshowo wa Zebhuluni, adapasiwa Jokineyamu nambuto zakudyesela bzifuwo na Karita nambuto zayene zakudyesela bzifuwo

³⁵ na Dhimina nambuto zakudyesela bzifuwo na Nahalali nambuto zakudyesela bzifuwo, maguta yentse yakhali manayi.

³⁶ Kunshowo wa Rubheni adapasiwa, Bhezeri nambuto zakudyesela bzifuwo na Jahazi nambuto zakudyesela bzifuwo

³⁷ na Kedhemoti nambuto yakudyesela bzifuwo, na Mefayati nambuto zakudyesela bzifuwo, maguta yakhali manayi.

³⁸ Kunshowo wa Gadhi kudachoka maguta manayi, Ramoti mu Giliyadhi nambuto zakudyesela bzifuwo bzawo, guta lakupotela munthu akapha mwanzake na Mahanayimu nambuto zakudyesela bzifuwo

³⁹ na Heshibhoni na Jazeri nambuto zakudyesela bzifuwo bzawo, maguta yentse yakhali manayi.

⁴⁰ Nakutenepo maguta yadagawiliwa mabanja yam'badwe wa Merari nanjila yakuwombeza namabanja yaa Levi akhadasala yakhafika khumi namawili.

⁴¹ Maguta yadapasiwa a Levi nambuto zakudyesela bzifuwo bzawo nkati mwanthaka yawana wa Izraeli kuti ikhale yawo, yakhali makumi manayi namasele.

⁴² Maguta yamweya, paguta lokha-lokha pakhana mbuto yakudyesela bzifuwo.

A Izraeli antola dziko kukhala nthaka yawo

⁴³ Nakutenepo Chawuta adapasa a Izraeli dziko lentse laadalumbila kuzapasa makholo yawo. Adalitola kukhala lawo, iwo nkukhala m'mwemo.

⁴⁴ Chawuta adachita kuti mudziko lentse mukhale nan'delekho, kuteyeza kulumbila kwaakhadachita kumakholo yawo. Palibe ne m'bodzi paazondi wawo adakwanisa kuyimisana nawo, pakuti Chawuta akhaapasa mphamvu zakukunda azondi wawo.

⁴⁵ Palibe ne chibodzi chabwino chaakhadatsimikiza Chawuta kwaa Izraeli chidagwela pantsi, bzentse bzidachitika.