Joshuwa 2 - Bhukhu la Kuyamba

Joshuwa antuma akadidiya ku Jeriko

¹ Joshuwa mwana wa Nuni, adatuma amuna awili kabisila, adachoka ku Shitimu achiyenda kanyangana dziko la Jeriko, iye adati, “Yendani mukanyangane dziko, maka-maka guta la Jeriko.” Nakutenepo iwo adayenda, nkufika panyumba pahule akhachemelewa nadzina lakuti Rahabhi, achigona pamwepo.

² Mambo wa Jeriko adawuziwa kuti, “Pana amuna waku Izraeli abwela usiku kuzanyangana dziko.”

³ Pamwepo mambo waku Jeriko adatuma fala kwa Rahabhi, adati, “Bulisa amuna abwela kwayiwe, apita munyumba mwako, pakuti abwela kuzanyangana dziko lino.”

⁴ Koma nkaziyo akhadatobisa kale amunawo, iye adati, “Chadidi, amunawo abwela kwayine, koma ndilibe kudziwa kuti achoka kuponi.

⁵ Pakudayamba kuchita n'dima, chakumawulo, pakhafungiwa nsuwo, amunawo adabula, nin'dziwa lini kuti ayenda kuponi, mukakulumiza kuwateyela muniwaphata.”

⁶ Koma iye akhadaakwizika mudzulu muntsodzi mwanyumba, akhadaabisa pantsi pamiti yamifulakisi ikhadagwezeka padzulu panyumbayo.

⁷ Nakutenepo wanthu adaateyela nanjila ikhayenda ku Jorodhani, achikafika pakhayambukila wanthu. Wanthu paadabula muguta achiwateyela, nsuwo waguta la Jeriko udafungiwa.

⁸ Akadidiya anati agona, Rahabhi adakwila kuntsodzi mudzulu mwanyumbayo,

⁹ adati kwayiwo, “Nin'dziwa kuti Chawuta wakupasani kale dziko lino, pomwe kugopsa kwanu kwatigwela. Wanthu wentse aphatiwa kale namantha, akutotetemela.

¹⁰ Pakuti tidabva kuwumisa kwaadachita Chawuta Nyanja Ifuyila patsogolo panu pamudabula mu Ijipiti. Tidabva pomwe bzamudachita kumazimambo mawili yaa Amori, yakumabveladzuwa kung'ambu kwa Jorodhani Sihoni na Ogi yamudacheneka.

¹¹ Patidabzibva, mitima yathu idaphatiwa namantha, ntima wamunthu wentse udamala mphamvu, nathangwe layimwe, pakuti Chawuta Mulungu wanu ni Mulungu wakudzulu napantsi.

¹² Nakutenepo, lumbilani kwayine nadzina la Chawuta, pakuti ine ndakuchitilani chifundo, nayimwembo mun'zachitilambo chifundo wabanja laapayi wangu, ndipaseni chilatizo chakuwonesa kukhulupilika kwanu kuti,

¹³ mun'zachiza apayi naamayi wangu wamoyo, naazimano wangu naazinana, namabanja yawo yentse, mutipulumuse kuyimpfa.”

¹⁴ Amunawo adati kwayiye, “Bzili bwino kuti ise tiphewe pana kuti iwe ufe! Iwe ukaleka kulewa bzatafambila, ise tin'zawonesa chifundo nachikhulupililo kwayiwe, Chawuta akatipasa dziko lino.”

¹⁵ Pamwepo Rahabhi adaabulusa napazhanela nathambo, pakuti nyumba yake ikhali nkati mwampanda waguta.

¹⁶ Iye adati kwayiwo, “Yendani kumapili, kuchitila kuti wakukuteyelani aleke kukugumanani. Mukabisale kwantsiku zitatu, kufikila wakukuteyelaniwo abwelela, muchizayenda ulendo wanu.”

¹⁷ Amunawo adati kwayiye, “Tin'zaphatiwa lini namulandu nakutilumbilisa kwawachita,

¹⁸ koma patin'zabwela mudziko lino, uzamangilile kathambo kafuyila pazhanela pawatibulusa napo, uzakocheze apayi naamayi wako naabale wako nawentse wabanja laapayi wako munyumba mwako.

¹⁹ Munthu am'bula kunja kwansuwo wanyumba yako achiyenda munjila akafa, gazi lake lin'zakhala pansolo payiye, ise tin'zaphatiwa lini namulandu.

²⁰ Koma ukawuza wanthu bzatafambila, ise tin'zaphatiwa lini namulandu pakutilumbilisa kwawachita.”

²¹ Iye adati, “Ngabzichitike ninga kulewa kwamwachita.” Pamwepo iye adaaleka achiyenda, iye adamangilila kathambo kafuyila pazhanela.

²² Akadidiya wale, adayenda kabisala m'mapili kwaadakakhala ntsiku zitatu, kufikila wakuwateyela abwelela. Amuna akhaateyela adaapsaga munjila zentse koma alibe kuwawona.

²³ Pamwepo amuna awiliwo adabuluka m'phili, achiyambuka Jorodhani achikafika kwa Joshuwa mwana wa Nuni. Adamuwuza bzentse bzaadawona.

²⁴ Iwo adati kwa Joshuwa, “Chadidi n'chakuti, Chawuta wayikha kale dziko lentse m'manja mwathu. Wanthu wentse adaphatiwa kale namantha aakutogopa thangwe layise.”