Joshuwa 19 - Bhukhu la Kuyamba

Dziko lidapasiwa Simiyoni

¹ Kuwombeza kwachiwili kudafikila m'badwe wa Simiyoni, kuteyeza mabanja yawo. Adapasiwa nthaka yawo yadziko pakati panshowo wa Judha.

² Maguta yanthaka yawo yakhali, Bheeri-shebha na Shebha na Moladha

³ na Hazari-shuwali na Bhala na Ezemu

⁴ na Elitoradhi na Bhetuli na Horima

⁵ na Zikilagi na Bheti-marikabhoti na Hazarisusa

⁶ na Bheti-libhayoti na Sharuheni. Maguta yentse yakhali khumi namatatu namiyi yayene.

⁷ Kuzabwela pomwe, Ayini na Rimoni na Eteri na Ashani. Maguta yentse yakhali manayi namiyi yayene,

⁸ kuphatanizila miyi yentse ikhadazungunuka maguta mpaka ku Bhaalati-bheyeri naguta la Rama laku Rama-negebhu. Iyi ndiyo nthaka idapasiwa m'badwe wa Simiyoni kuteyeza mabanja yawo.

⁹ Nthaka idapasiwa m'badwe wa Simiyoni ikhali nkati mwadziko yanthaka ya Judha, pakuti chigawo chidapasiwa m'badwe wa Judha chikhali chikulu kwene-kwene. Nakutenepo nshowo wa Simiyoni udapasiwa nthaka yawo pakati panthaka ya Judha.

Dziko lidapasiwa Zebhuluni

¹⁰ Kuwombeza kwachitatu kudagwela m'badwe wa Zebhuluni kuteyeza mabanja yake. Dziko lanthaka yake likhafika pa Saridhi.

¹¹ Malile yake yakhapita nachakumadokelo yachikafika ku Marala, yachikafika ku Dhabhesheti nakukamadzi kakumabveladzuwa kwa Jokineyamu.

¹² Yakhayambila ku Saridhi yachipita nakumbali inango yachakumabveladzuwa kufika kumalile yaku Kisiloti-tabhori, yachipita naku Dhabherati mpaka ku Jafiya.

¹³ Kuchoka pamwepo yachipitilila kuyenda chakumabveladzuwa kufika ku Gati-heferi naku Etikazini, yachiyenda ku Rimoni yachigonyoka kuyenda ku Neya.

¹⁴ Malile yachakudzulu yakhazungunuka naku Hanatoni yachikamalila kuchigowa cha Ifitaheli.

¹⁵ Kuphatanizila guta la Katati nala Nahalali nala Shimironi nala Idhala nala Bhetelehemu. Maguta yentse yakhali khumi namawili namiyi yayene.

¹⁶ Iyi ndiyo nthaka yam'badwe wa Zebhuluni kuteyeza mabanja yawo, maguta yamweya namiyi yayene.

Dziko lidapasiwa Isakari

¹⁷ Kuwombeza kwachinayi kudafikila m'badwe wa Isakari kuteyeza mabanja yawo.

¹⁸ Madziko yawo yakhali, Jezireyeli na Kesuloti na Shunemu

¹⁹ na Hafarayimu na Shiwoni na Anaharati

²⁰ na Rabhiti na Kishoni na Ebhezi

²¹ na Remeti na Eniganimu na Enihadha na Bheti-pazezi.

²² Malile yamweyo yakhafika pomwe ku Tabhori naku Shahazuma naku Bheti-shemeshi, yachikamalila pa Jorodhani. Maguta yentse yakhali khumi namatanthatu namiyi yayene.

²³ Iyi ndiyo nthaka yam'badwe wa Isakari kuteyeza mabanja yawo, namaguta namiyi yawo.

Dziko lidapasiwa Asheri

²⁴ Kuwombeza kwachishanu kudafikila m'badwe wa Asheri kuteyeza mabanja yawo.

²⁵ Dziko lawo likhaphatanizila maguta ya Helikati na Hali na Bheteni na Akishafi

²⁶ na Alameleki na Amadhi na Mishali yachikafika pa Karimeli chakumadokelo na Shihori-libhinati,

²⁷ yachilungama chakumabveladzuwa yachiyenda ku Bheti-dhagoni yachikafika ku Zebhuluni nakuchigowa cha Ifitaheli chakudzulu kwa Bheti-emeki naku Neyiyeli, yachiyenda nachakudzulu mpaka ku Kabhuli,

²⁸ ku Ebhuroni, ku Rehobhi, ku Hamoni, ku Kana, mpaka ku Sidhoni ikulu.

²⁹ Tsapano malile yadzikolo yadazagonyoka yachilungama ku Rama, kufika kuguta la Tire, guta lakuchinjiliziwa, yachizungunuka kulungama ku Hosa, yachimalila panyanja, kuphatanizila Mahalabhi, na Akizibhi,

³⁰ na Uma na Afeki na Rehobhi, maguta yentse yakhali makumi mawili namawili namiyi yayene.

³¹ Iyi ndiyo nthaka yam'badwe wa Asheri kuteyeza mabanja yawo, maguta yamweya namiyi yawo.

Dziko lidapasiwa Nafitali

³² Kuwombeza kwachitanthatu kudafikila m'badwe wa Nafitali kuteyeza mabanja yawo.

³³ Malile yawo yakhayambila pa Helefi pamuti wamuoki waku Zaananimu yachikafika ku Adhami-nekebhu naku Jabhineyeli mpaka ku Lakumi, yachikamalila ku Jorodhani.

³⁴ Malileyo yakhagonyoka yachilungama chakumadokelo, yachipita naku Azinoti-tabhori, yachilungama ku Hukoki yachigumana na Zebhuluni chakunyantsi na Asheri chakumadokelo, na Judha chakumabveladzuwa pa Jorodhani.

³⁵ Maguta yakhadachinjiliziwa yakhali, Zidhimu na Zeri na Hamati na Rakati na Kinereti

³⁶ na Adhama na Rama, na Hazori

³⁷ na Kedheshi na Edhireyi Enihazori

³⁸ na Yironi na Migidhaleli na Horemu na Bheti-anati na Bheti-shemeshi. Maguta yentse yakhali khumi napfemba namiyi yayene.

³⁹ Iyi ndiyo ikhali nthaka yam'badwe wa Nafitali kuteyeza mabanja yawo, maguta namiyi yayene.

Dziko lidapasiwa Dhani

⁴⁰ Kuwombeza kwachinomwe kudafikila m'badwe wa Dhani kuteyeza mabanja yawo.

⁴¹ Dziko laadapasiwa kukhala nthaka yawo likhaphatanizila, Zora na Eshitaoli na Irishemeshi

⁴² na Shaalabhinu na Ayijaloni na Itila

⁴³ na Eloni na Timuna na Ekironi

⁴⁴ na Eliteke na Gibhetoni na Bhaalati

⁴⁵ na Jehudhi na Bhene-bheraki na Gati-rimoni

⁴⁶ na Mejarikoni na Rakoni nadziko likhadanyanganana na Jopa.

⁴⁷ Wanthu wa Dhani paadatolelewa dziko lawo, adayenda kamenya guta la Leshemu. Nakutenepo iwo adapamba guta limwelo achipha wanthu akhali m'mwemo. Adapha wanthu wentse namulomo wabhemba achitola dzikolo kukhala nthaka yawo, gutalo adalipasa dzina lakuti Dhani, dzina lakholo lawo.

⁴⁸ Iyi ndiyo nthaka idapasiwa m'badwe wa Dhani, kuteyeza mabanja yawo, maguta yamweya namiyi yayene.

Joshuwa ndiye akhali wakumalizila kupasiwa dziko

⁴⁹ Wanthu wa Izraeli paadamaliza kugawa dziko kukhala nthaka yawo, adapeleka mbali inango yadziko kuchoka nkati mwawo kwa Joshuwa mwana wa Nuni kuti ikhale nthaka yake.

⁵⁰ Ninga kulewa kwaadachita Chawuta, kuti Joshuwa angapasiwe guta lentse laadakumbila. Joshuwa adasankhula guta la Timunati-sera lamudziko lamapili la Efulemu. Nakutenepo iye adamanga pomwe guta achikhala m'mwemo.

⁵¹ Izi ndizo nthaka zidagawiwa na Eliyezari nyantsembe wa Mulungu na Joshuwa mwana wa Nuni naatsogoleli wanyumba zaazipayi wawo wanshowo wa Izraeli. Adachita bzakuwombeza kwa Chawuta, nthawe yaakhali pansuwo wa Tenti yakugumanilana pa Shilo. Nakutenepo iwo adazamaliza kugawa dziko.