Joshuwa 18 - Bhukhu la Kuyamba

Kugawiliwa dziko kwawanthu wentse

¹ Tsapano gunyenye lentse lawana wa Izraeli adakochezana pa Shilo, adazika Tenti yakugumanilana pamwepo. Dziko limwelo lidagwela m'manja mwawo.

² Koma padasala mishowo minomwe yawana wa Izraeli ikhanati yagawiliwa nthaka yadziko.

³ Nakutenepo Joshuwa adati kwawana wa Izraeli, “Thangwe lanyi mukuleka kuyenda katola dziko lamudapasiwa na Chawuta Mulungu waazipayi wanu?”

⁴ “Ndipase amuna atatu kuchoka panshowo wokha-wokha, ndiwatume kuti ayende akanyangane dziko lentse, akanembe dziko lin'zakhala nthaka yawo, achizabwela kuzandiwuza namulomo bzaaninga awona.

⁵ Dziko limwelo azaligawe mubzigawo bzinomwe. Judha an'zapitiliza kukhala mudziko lachakunyantsi, wanyumba ya Jozefi an'zapitiliza kukhala mudziko lachakudzulu.

⁶ Munembe pantsi dziko limwelo mubzigawo bzinomwe, mubwelese bzinembobzo kwayine. Tsapano ine nin'zakuwombezelani patsogolo pa Chawuta Mulungu wathu.

⁷ A Levi an'gawiliwa lini mbuto pakati panu, pakuti unyantsembe wa Chawuta ndiyo nthaka yawo. Nshowo wa Gadhi nawa Rubheni nakati-nakati yanshowo wa Manase adapasiwa kale nthaka yawo kung'ambu kwa Jorodhani chakumabveladzuwa na Mozisi mulanda wa Chawuta.”

⁸ Nakutenepo amunawo adayenda kanyangana dziko, Joshuwa adaawuza kuti, “Yendani mukanyangane dziko lentse mukanemba bzamuninga mwawona, mukamaliza muzabwelele kwayine, ndichizawombeza patsogolo pa Chawuta pa Shilo.”

⁹ Nakutenepo amunawo adayenda kanyangana dziko lentse, adanemba mubhukhu bzinembo bzamaguta mubzigawo bzinomwe. Achibwelela kwa Joshuwa pansasa ku Shilo.

¹⁰ Joshuwa adawombeza kwa Chawuta paakhali pa Shilo, pomwe adagawa dziko kwawana wa Izraeli kuteyeza nshowo wawo.

Dziko lidapasiwa Bhenjemani

¹¹ Nthawe yakuwombezela m'badwe wa Bhenjemani kuteyeza mabanja yawo idafika. Dziko laadapasiwa likhali pakati panshowo wa Judha nawa Jozefi.

¹² Malile yawo yambali yachakudzulu yakhayambila pa Jorodhani yachiyenda nakumatelo yachakudzulu kwa Jeriko, yachipita nachakumadokelo kwadziko lamapili yachimalila kuchipululu cha Bheti-aveni.

¹³ Kuchoka pamwepo, malileyo yakhapita nachakunyantsi kumatelo yaguta la Luzi, ilo tsapano lin'chemelewa kuti Bheteli. Yakhayenda yachipolika chakunyantsi kwa Ataroti-adhari paphili lachakunyantsi kwa Bheti-horoni.

¹⁴ Malileyo yadagonyoka kuyenda chakunyantsi kuteyeza mbali yachakumadokelo yaphili yachinyanganana naguta la Bheti-horoni, yachikamalila pamuyi wa Kiriyati-bhaali, uwo un'chemelewa kuti Kiriyati-jeyarimu, guta lam'badwe wa Judha. Aya yakhali malile yachakumadokelo.

¹⁵ Malile yambali yachakunyantsi yakhayambila kunja kwa Kiriyati-jeyarimu, yachilungama ku Efuroni, mpaka kuntsantsa yamadzi ya Nefutowa,

¹⁶ pamwepo malile yampolika pomwe namunyantsi mwaphili likhadanyanganana nachigowa cha Hinomu, chakudzulu kum'malila chigowa cha Refayimu, yachiyenda pomwe kunyantsi kwachigowa cha Hinomu, chakunyantsi kwamatelo yaa Jebhusi, mpaka ku Enirogeli,

¹⁷ yachigonyoka pomwe yachiyenda nachakudzulu yachikafika ku Enishemeshi, yachiyenda naku Geliloti guta likhadanyanganana napampata wa Adhumimu, pomwe yachipolika kumwala wa Bhohani (Bhohani akhali mwana wachimuna wa Rubheni),

¹⁸ yachipita napamatelo yachakudzulu kwa Bheti-arabha yachipolika kuchigowa cha Jorodhani,

¹⁹ yachipita pomwe nachakunyantsi kwamatelo ya Bheti-hogila, yachimalila chakudzulu kumpamba wanyanja yamunyu, chakunyantsi yakhamalila pa Jorodhani. Aya ndiyo yakhali malile yachakunyantsi.

²⁰ Kamadzi ka Jorodhani ndiyo yakhali malile yachakumabveladzuwa. Iyi ndiyo ikhali nthaka yam'badwe wa Bhenjemani, kuteyeza mabanja yawo, namalile yawo kumbali zentse.

²¹ Maguta yam'badwe wa Bhenjemani kuteyeza mabanja yawo yakhali, Jeriko na Bheti-hogila na Emeki-kezizi na

²² Bheti-arabha na Zemarayimu na Bheteli

²³ na Avimu na Parahi na Ofira na

²⁴ Kefaramoni na Ofini na Gebha, maguta yentse yakhali khumi namawili namiyi yayene.

²⁵ Kuzabwela Gibheyoni na Rama na Bheeroti na

²⁶ Mizipa na Kefira na Moza

²⁷ na Rekemu na Iripeyeli na Taralahi

²⁸ na Zela na Hayelefu na Jebhusi, tsapano in'chemelewa kuti Jerusalema, na Gibheya na Kiriyati-jeyarimu. Maguta yentse yakhali khumi namanayi namiyi yayene. Iyi ndiyo ikhali nthaka yam'badwe wa Bhenjemani kuteyeza mabanja yawo.