Joshuwa 17 - Bhukhu la Kuyamba

Dziko la Manase lachakumadokelo

¹ Dziko lachakumadokelo kwa Jorodhani lidagwatiliwa wanthu wanshowo wa Manase nanjila yakuwombeza, pakuti ndiye akhali mwana wakuyamba wa Jozefi. Makiri mwana wakuyamba wa Manase, Makiri apayi wa Giliyadhi adapasiwa dziko la Giliyadhi nala Bhashani, pakuti akhali nyabezi wabzankhondo.

² Dziko lentse lachakumadokelo kwa Jorodhani lidagawiliwa nshowo wa Manase udasala, kuteyeza mabanja yawo yaniti, Abhiyezeri na Heleki na Asiriyeli na Shekemu na Heferi na Shemidha. Awa akhali amuna wam'badwe wa Manase mwana wa Jozefi, kuteyeza mabanja yawo.

³ Tsapano Zelofehadhi akhali mwana wa Heferi, Heferi akhali mwana wa Giliyadhi, Giliyadhi akhali mwana wa Makiri, Makiri akhali mwana wa Manase, Manase alibe kubala mwana wachimuna, adabala wana wachikazi basi, aya ndiyo madzina yawana wake wachikazi, Mahila na Nowa na Hogira na Milika na Tiriza.

⁴ Wana wachikaziwo adayenda kwanyantsembe wa Mulungu Eliyezari nakwa Joshuwa mwana wa Nuni nakumanduna kwaadakati, “Chawuta adawuza Mozisi kuti atipasembo nthaka yadziko pabodzi naabale wathu.” Joshuwa adaapasa nthaka yawo yadziko pakati paabale wawo wana waapayi wawo, kuteyeza bzidachoka pamulomo wa Chawuta.

⁵ Nathangwe limwelo Manase adapasiwa bzigawo khumi, kuchosako dziko la Giliyadhi na Bhashani yakumabveladzuwa kung'ambu kwa Jorodhani,

⁶ pakuti wana wachitsikana wa Manase adapasiwambo nthaka yawo yadziko pakati pawana wake wachimuna. Dziko la Giliyadhi lidagawiliwa nshowo wentse wa Manase ukhadasala.

⁷ Malile yadziko la Manase yakhayambila kwa Asheri yachifika ku Mikimetati, chakumabveladzuwa kwa Shekemu yachiyenda nachakunyantsi kumbali yajanja ladidi kukhakhala wanthu waku Enitapuwa.

⁸ Dziko la Tapuwa likhali la Manase, koma guta la Tapuwa lam'malile ya Manase, likhali lawana wa Efulemu.

⁹ Malileyo yakhapolika nakukamadzi ka Kana. Maguta yentse yachakunyantsi kwakamadzi kamweka pakati pamaguta ya Manase yakhali ya Efulemu. Malile ya Manase yakhayenda pomwe nachakudzulu kwakamadzi, yachikamalila panyanja.

¹⁰ Dziko lachakunyantsi likhali la Efulemu, dziko lachakudzulu likhali la Manase. Malile yawo ikhali nyanja. Asheri infikika nachakudzulu, chakumabveladzuwa kukhana Isakari.

¹¹ Manase akhana maguta yanango pomwe mudziko la Isakari namudziko la Asheri yaniti, Bheti-sheyani namiyi yayene na Ibhileyami namiyi yayene namaguta yamu Dhori (Nafati-dhori) namiyi yayene namaguta yamu Enidhori namiyi yayene namaguta yamu Tanaki namiyi yayene namaguta yamu Megidho namiyi yayene, lachitatu likhali guta la Nafati.

¹² Koma wanthu wa Manase alibe kukwanisa kutola maguta yamweyo, nakutenepo a Kenani adapitiliza kukhala mumadziko yamweyo.

¹³ Ne wana wa Izraeli paadazalimba, alibe kuthamangisa a Kenani wentse akhakhala pakati pawo, koma akhaaphatisa basa lachibhalo.

Efulemu nawanthu wa Manase wakumadokelo ankumbila kuthimiziliwa mbuto

¹⁴ M'badwe wa Jozefi udati kwa Joshuwa, “Thangwe lanyi kutipasa chigawo chibodzi chadziko nanjila yakuwombeza kukhala nthaka yathu? Ise ndise azinji kwene-kwene pakuti Chawuta adatidalisa.”

¹⁵ Joshuwa adati kwayiwo, “Peno ndimwe azinji kulumizani muyende m'mathengo yadziko laa Perezi nalaa Refayimu mukabzikonzele pakukhala pamwepo, pakuti dziko lamapili la Efulemu niling'ono kwayimwe.”

¹⁶ Wanthu wanshowo wa Jozefi adati, “Dziko lamapili latidawona ise tinkwana lini. Pomwe a Kenani an'khala kudambo ana ngolo zasimbi, nawentse akukhala, mu Bheti-sheyani namiyi yayene naawo akukhala muchigowa cha Jezireyeli.”

¹⁷ Joshuwa adawuza wanthu wanshowo wa Jozefi nawa Efulemu nawa Manase kuti, “Ndimwe azinji, pomwe ndimwe wakulimba, nakutenepo mungawombezelewe lini mbuto ibodzi.

¹⁸ Tsapano dziko lamapili lin'zakhala lanu, ne lingakhale thengo, mulichenese likhale lanu mpaka kum'malila malile. Mun'zathamangisa a Kenani akukhala mudziko limwelo, ne angakhale ana ngolo zasimbi, ne angakhale ali wakulimba.”