Joshuwa 15 - Bhukhu la Kuyamba

Dziko lidapasiwa Judha

¹ Dziko lidagawiliwa nshowo wawanthu wa Judha kuteyeza mabanja yawo, likhayambila chakunyantsi lichikafika kumalile ya Edhomu, mpaka chakunyantsi kwachipululu cha Zini.

² Malile yawo yachakunyantsi yakhayambila pam'malila nyanja yamunyu, kuchoka pampamba uninyangana chakunyantsi.

³ Malile yamweyo yakhayenda chakunyantsi kwampata wa Akirabhimu kuyenda naku Zini, yachikhwizika nachakunyantsi kwa Kadheshi-bhareneya, yachipita naku Hezironi, kafika ku Adhari, yachigonyoka pomwe kafika ku Karika,

⁴ yachipita naku Azimoni, yachiyenda kukamadzi kaku Ijipiti yachikamalila panyanja. Aya ndiyo malile yako yachakunyantsi.

⁵ Nyanja yamunyu, ndiyo yakhali malile yakumabveladzuwa yachikafika padzalo la Jorodhani. Malile yambali yachakudzulu yakhayambila mumpamba mwanyanja kafika padzalo la Jorodhani,

⁶ malileyo yachilungama ku Bheti-hogila, yachikapita nachakudzulu kwa Bheti-arabha, kufika kumwala wa Bhohani. (Bhohani akhali mwana wachimuna wa Rubheni).

⁷ Malile yamweyo yakhayambila pachigowa cha Akori, yachikwiza yadalungama ku Dhebhiri, yachigonyoka chakudzulu, yadalungama ku Giligali, pakhadanyanganana napampata wa Adhumimu m'mbali yachakunyantsi kwachigowa, yachipita nakuntsantsa ya Enishemeshi mpaka ku Enirogeli;

⁸ malileyo yaniyenda nakuchigowa cha Hinomu chakumadokelo, kumatelo yachakunyantsi kwaphili laa Jebhusi, kukhana guta la Jerusalema; yankwiza padzulu paphili lidanyanganana nachigowa cha Hinomu chakumadokelo chakudzulu kumapeto kwagowa la Refayimu.

⁹ Malile yamweyo yakhachokela padzulu paphili yachifika pantsantsa ya Nefutowa, yachilungama kumaguta yakufupi naphili la Efuroni, yachifika ku Bhaala iyo ikhachemelewa pomwe kuti Kiriyati-jeyarimu,

¹⁰ malile yamweyo yakhazwengelela nachakumadokelo kwa Bhaala, yachikafika kuphili la Seyiri, yachipita nachakumatelo yakudzulu kwaphili la Jeyarimu, iyo ikhachemelewa pomwe kuti Kesaloni, yachibuluka ku Bheti-shemeshi, yachipita naku Timuna.

¹¹ Malileyo yakhapita pomwe nakumatelo yachakudzulu kwaphili laku Ekironi yachizwengelela kafika ku Shikeroni, yachipita nakuphili la Bhaala yachikafika ku Jabhineyeli yachimalila panyanja.

¹² Malile yakumadokelo ikhali nyanja ikulu nam'mphepete mwayene. M'malile yamweyo ndimo mukhakhala wanthu wa Judha kuteyeza mabanja yawo.

Kelebho antola guta la Dhebhiri na Hebhuroni

¹³ Joshuwa adagawila Kelebho mwana wa Jefune, mbali inango yadziko pakati pawanthu wa Judha, kuteyeza bzidachoka pamulomo wa Chawuta. Kelebho adapasiwa guta la Kiriyati-aribha, ilo ntsiku zino lin'chemelewa kuti Hebhuroni. Aribha akhali apayi wa Anaki.

¹⁴ Kelebho adathamangisa wana atatu wa Anaki, Sheshayi na Ahimani na Talimayi, wam'badwe wa Anaki.

¹⁵ Paadachoka pamwepo iye adazayenda kamenyana nawanthu akakhala mu Dhebhiri, iyo kale-kale ikhambachemelewa nadzina lakuti Kiriyati-seferi.

¹⁶ Kelebho adati, “Munthu an'zamenya guta la Kiriyati-seferi achilitola, nin'zampasa mwana wangu wachitsikana Akisa kuti akhale nkazi wake.”

¹⁷ Otiniyeli mwana wa Kenazi, nkulu wa Kelebho ndiye adalitola, nakutenepo Otineli adapasiwa Akisa kukhala nkazi wake.

¹⁸ Pantsiku yafeshita yan'chato Otiniyeli adapembzelela Akasa nkazi wake kuti akumbile munda kwaapayi wake. Iye paadafika kwaapayi wake achibuluka padhonki lake, Kelebho adati kwayiye, “Ukufunanyi.”

¹⁹ Iye adati kwaapayi wake, “Ndipaseni daliso, pakuti dziko lamudandipasa nimbuto yakuwuma kwene-kwene, ndipaseni pomwe n'chela wamadzi.” Nakutenepo Kelebho adapasa Akasa mwana wake michela yachakudzulu nayachakunyantsi.

Maguta ya Judha

²⁰ Iyi ndiyo nthaka yadziko idapasiwa wanthu wa Judha kuteyeza mabanja yawo.

²¹ Maguta yawanthu wanshowo wa Judha yachakunyantsi chambali yakumalile ya Edhomu yakhali, Kabhuzeyeli na Edheri na Jaguri

²² na Kina na Dhimona na Adhadha

²³ na Kedheshi na Hazori na Itinani na

²⁴ Zifu na Telemu na Bheyaloti

²⁵ na Hazori-hadhata na Keriyoti-hezironi likhachemelewa pomwe kuti Hazori

²⁶ na Amamu na Shema na Moladha

²⁷ na Hazari-gadha na Heshimoni na Bheti-peleti

²⁸ na Hazari-shuwali na Bheeri-shebha na Bhiziyotiya

²⁹ na Bhaala na Limu na Ezemu,

³⁰ kuchizabwela Elitoradhi na Kesilu na Horima,

³¹ na Zikilagi na Madhimana na Sanisana,

³² na Lebhayoti na Shilihimu na Ayini na Rimoni. Maguta yentse pabodzi namiyi yayene yakhafika makumi mawili napfemba.

³³ Aya ndiyo maguta yakhali mubzigowa, Eshitaoli na Zora na Ashina,

³⁴ na Zanowa na Eniganimu na Tapuwa na Enamu

³⁵ na Jarimuti na Adhulamu na Soko na Azeka

³⁶ na Shaarayimu na Adhitayimu na Gedhera na Gedherotayimu. Maguta yentse pabodzi namiyi yayene yakhafika khumi namanayi.

³⁷ Kuzabwela Zenani na Hadhashi na Migidhali-gadhi

³⁸ na Dhilani na Mizipa na Jokitiyeli

³⁹ na Lakishi na Bhozikati na Egiloni

⁴⁰ na Kabhoni na Lahimasi na Kitilishi

⁴¹ na Gedheroti na Bheti-dhagoni na Naama na Makedha. Maguta yentse pabodzi namiyi yayene yakhafika khumi natanthatu.

⁴² Pakhana yanango pomwe maguta yakhali, Libhina na Eteri na Ashani

⁴³ na Ifuta na Ashina na Nezibhi

⁴⁴ na Keyila na Akizibhi na Maresha, maguta yentse pabodzi namiyi yayene yakhafika pfemba.

⁴⁵ Ekironi namaguta namiyi yayene,

⁴⁶ kuchoka ku Ekironi kufika kunyanja, nabzentse bzikhali kumbali ya Ashidhodhi, namiyi yentse ikhadazungunuka.

⁴⁷ Kuzabwela Ashidhodhi namaguta yayene namiyi yayene na Gaza namaguta yayene namiyi yayene, kufika kukamadzi kaku Ijipiti nam'malile mwakene.

⁴⁸ Mudziko lamapili mukhana, Shamiri na Jatiri na Soko

⁴⁹ na Dhana na Kiriyati-sana iyo ikhachemelewa pomwe kuti Dhebhiri,

⁵⁰ kuzabwela Anabhi na Eshitemowa na Animu

⁵¹ na Gosheni na Holoni na Gilo. Maguta namiyi yayene yakhafika khumi nalibodzi.

⁵² Kuchizabwela Arabhu na Dhuma na Eshani

⁵³ na Janimu na Bheti-tapuwa na Afeka

⁵⁴ na Humuta na Kiriyati-aribha iyo ikhachemelewa kuti Hebhuroni na Ziori. Maguta pfemba namiyi yayene.

⁵⁵ Kuzabwela Mawoni na Karimeli na Zifu na Juta

⁵⁶ na Jezireyeli na Jokidheyamu na Zanowa

⁵⁷ na Kayini na Gibheya na Timuna. Maguta yakhafika khumi namiyi yayene.

⁵⁸ Kuzabwela Halihuli na Bheti-zuri na Gedhori,

⁵⁹ na Maarati na Bheti-anoti na Elitekoni, maguta yakhafika matanthatu namiyi yayene.

⁶⁰ Kuzabwela Kiriyati-bhaali iyo ikhachemelewa pomwe kuti Kiriyati-jeyarimu na Rabha, maguta mawili namiyi yayene.

⁶¹ Muchipululu mukhana maguta aya, Bheti-arabha na Midhini na Sekaka

⁶² na Nibhushani guta lamunyu na Enigedhi, yentse pabodzi yakhali matanthatu namiyi yayene.

⁶³ Wanthu wa Judha alibe kukwanisa kuthamangisa a Jebhusi akhakhala mu Jerusalema, nakutenepo a Jebhusi akukhala nawanthu wa Judha mu Jerusalema nalelo.