Joshuwa 14 - Bhukhu la Kuyamba

Kugawiwa kwadziko lakumadokelo kwa Jorodhani

¹ Iyi ndiyo nthaka idagawiliwa wanthu wa Izraeli mu Kenani. Nyantsembe wa Mulungu Eliyezari na Joshuwa mwana wa Nuni naakulu-akulu wanyumba zaazipayi wawo wanshowo waa Izraeli, ndiwo adagawa mbutozo.

² Nthaka yawo idagawiwa nanjila yakuwombeza kwa Mulungu ichipasiwa mishowo pfemba nakati-nakati, ninga kuwuziwa kukhadachitiwa Mozisi na Chawuta.

³ Mozisi akhadatogawila kale nthaka kumishowo miwili nakati-nakati yachakumabveladzuwa kung'ambu kwa Jorodhani, koma a Levi ndiwo alibe kupasiwa nthaka yadziko pakati pawo.

⁴ Wanthu wa Jozefi akhana mishowo miwili, nshowo wa Manase nawa Efulemu. Koma a Levi ndiwo alibe kugawiliwa mbuto yawo yadziko, adapasiwa maguta yakukhala nambuto zakudyesela bzifuwo bzawo nambuto zakuyikha bzinthu bzawo.

⁵ Wanthu wa Izraeli adachita bzaadawuziwa Mozisi na Chawuta. Nakutenepo adagawa dziko.

Hebhuroni impasiwa Kelebho

⁶ Pamwepo wanthu wa Judha adabwela kwa Joshuwa pa Giligali. Kelebho mwana wa Jefune wanshowo wachi Kenizi adati kwayiye, “Munkumbuka bzidalewedwa na Chawuta kwa Mozisi munthu wa Mulungu pa Kadheshi-bhareneya bzayiwe nayine.

⁷ Mozisi mulanda wa Chawuta paadandituma kuchoka ku Kadheshi-bhareneya kuzanyangana dziko lino, ndikhali mwamuna wamagole makumi manayi. Nakutenepo ine ndidabwelela ndichimuwuza bzikhali muntima mwangu.

⁸ Koma abale wangu wandidayenda nawo adabwela achilewa mafala yakhagopsa wanthu. Koma ine ndidakhulupilila Chawuta Mulungu wangu mwakukwana.

⁹ Mozisi ntsiku imweyo adalumbila adati, ‘Chadidi dziko lawaponda naminyendo yako lin'zakhala nthaka yako nakum'badwe wako kufika lini nalini. Pakuti iwe wawonesa chikhulupililo kwa Chawuta Mulungu wangu mwakukwana.’

¹⁰ Nakutenepo, wonani, Chawuta wandisiya wamoyo kwamagole makumi manayi namashanu kuteyeza kulewa kwaadachita kwa Mozisi, a Izraeli paakhafamba muchipululu. Koma lelo ndawa munthu wamagole makumi masele namashanu.

¹¹ Koma nalelo ndichadalimba ninga kulimba kwandikhadachita ntsiku yaadandituma Mozisi. Mphamvu zandinazo zidandolingana nazandikhanazo nthawe imweyo, ninkwanisa kubula kuyenda kamenya nkhondo ndichibwelela.

¹² Nakutenepo ndipaseni dziko lamapili lidalewedwa na Chawuta ntsiku imweyo. Imwe mun'dziwa kuti wanthu wachi Anakimu an'khala kumweko ana maguta yansaya kufikika. Koma peno Chawuta ana ine, ninkaathamangisa kuteyeza kulewedwa kwabzidachitiwa na Chawuta.”

¹³ Pamwepo Joshuwa adadalisa Kelebho mwana wa Jefune achimpasa guta la Hebhuroni kuti likhale nthaka yake.

¹⁴ Nakutenepo Hebhuroni idakhala nthaka ya Kelebho mwana wa Jefune wachi Kenizi mpaka nalelo, nathangwe lakuti iye adakhulupilila Chawuta Mulungu wa Izraeli mwakukwana.

¹⁵ Dziko la Hebhuroni likhambachemelewa pomwe nadzina lakuti Kiriyati-aribha. Aribhayo akhali munthu nkulu pakati paa Anakimu. Pamwepo mudziko mudawa nan'delekho kuchoka munkhondo.